¹ Yesus nepan ngagai perau, ngelayang danau nya ke seberai, alu datai ba nengri Iya Empu. ² Urang alu mai nga gai Iya siko lelaki ke sakit tungkut, gali ba peninduk. Leboh Yesus meda pengarap sida, Iya alu bejako enggau urang ke sakit tungkut nya, “Anang takut, anak! Dosa nuan udah diampun.” ³ Sekeda pengajar Adat alu bejako enggau pangan diri, “Urang to bejako busung!” ⁴ Tang Yesus nemu peragam ati sida, alu ko Iya bejako, “Nama kebuah kita berunding jai baka nya alam ati kita? ⁵ Ni ti nyamai agi disebut, ‘Dosa nuan diampun,’ tauka ‘Angkat nuan, alu pulai ke rumah’? ⁶ Tang ngambi ka kita nemu Anak Mensia bisi kuasa ngampun dosa di dunya to” --Iya alu bejako ngagai urang ke sakit tungkut nya -- “Angkat nuan, bai peninduk nuan, alu pulai ke rumah.” ⁷ Lelaki nya angkat, alu pulai ke rumah. ⁸ Leboh urang mayoh meda nya, sida takut, alu muji Allah Taala ti udah meri kuasa ti besai baka nya ngagai mensia. ⁹ Leboh Yesus bejalai ari endur nya, Iya tepeda ka siko pengumpul cukai ke benama Matius, duduk ba endur ngumpul cukai. Ko Yesus bejako ngagai iya, “Titihka Aku.” Matius angkat, alu nitihka Iya. ¹⁰ Leboh Yesus benung makai alam rumah Matius, mayoh pengumpul cukai enggau urang ke bedosa datai alu makai enggau Iya sereta enggau sida murid Iya. ¹¹ Leboh urang Farisi meda nya, sida alu bejako ngagai murid Iya, “Nama kebuah Guru kita begulai makai enggau pengumpul cukai sereta enggau urang ke bedosa?” ¹² Leboh Yesus ninga nya, Iya alu bejako, “Urang ke gerai nda begunaka dokter, tang semina urang ke sakit. ¹³ Mupuk kita alu pelajar ka reti jako to: ‘Aku begunaka pengasih, ukai penyembah.’ Laban Aku datai ukai ngangau ka urang ke lurus, tang ngangau ka urang ke bedosa.” ¹⁴ Udah nya sida murid-murid Yohanes Pemaptis datai ngagai Yesus, alu nanya Iya, “Nama kebuah kami enggau urang Farisi selalu bepuasa, tang murid Nuan nda?” ¹⁵ Ko Yesus bejako ngagai sida, “Kati bala pengabang ba gawa tikah ngulit seagi-agi lelaki ke ditikah nya meruan enggau sida? Maya deka datai endur lelaki ke ditikah nya deka diambi ari sida. Nya baru sida deka bepuasa. ¹⁶ Nadai urang nampal baju ti lama ngena cebik kain ti baru, laban cebik kain ti baru ka ngasoh kain ti lama carik, alu ngasoh baju nya balat agi carik. ¹⁷ Lalu nadai mega urang nyimpan anggur ti baru alam kambut anggur ti lama, enggai ke kambut nya pecah, alu anggur nya deka naya, alu kambut nya ancur, tang anggur ti baru di simpan alam kambut ti baru. Nya baru anggur enggau kambut nya meruan badas.” ¹⁸ Leboh Yesus agi benung bejako ngagai sida, siko pemesai urang Yahudi datai, nyembah di mua Iya, alu bejako, “Anak indu aku baru udah parai. Tang aku minta Nuan datai alu ngengkah ka jari Nuan ba atas iya, ngambika iya idup baru.” ¹⁹ Yesus angkat alu nitih ka iya, sama enggau sida murid Iya. ²⁰ Siku indu ke sakit begetah pengelama udah dua belas taun ngasak damping agi Yesus datai ari belakang, lalu negu puting kelambi Yesus, ²¹ laban ko indu nya bejako alam ati diri, “Enti aku negu gari Iya, aku deka gerai.” ²² Yesus nguing, tepedaka indu nya, alu bejako, “Anak, anang takut! Pengarap nuan udah ngeraika nuan.” Indu nya alu gerai tekala nya. ²³ Leboh Yesus datai ba rumah pemesai nya, alu tepeda ka bala urang ke besepu kesuling, enggau urang ke begau, ²⁴ Iya alu bejako ngagai sida, “Pansut kita ari to! Laban anak mit to ukai parai, tang tinduk!” Sida alu ketawa ka Iya. ²⁵ Tang leboh semua urang udah diburu pansut, Yesus tama, alu megai jari anak mit nya. Anak mit nya alu angkat. ²⁶ Berita pasal nya nyerekai di serata menua nya. ²⁷ Lebuh Yesus bejalai ari endur nya, dua iko urang ke buta niteh ka Iya, alu ngangau, “Anak Daud, kasih ka kami!” ²⁸ Leboh Yesus tama ngagai rumah nya, urang buta ke dua iko nya alu datai ngagai Iya. Iya alu bejako ngagai seduai iya, “Kati seduai pecaya ke Aku uleh ngerai ka seduai?” “Kami pecaya, Tuhan!” ko seduai iya nyaut. ²⁹ Yesus alu nego mata seduai iya, alu bejako, “Awak ka utai ti dikarap ka seduai nyadi!” ³⁰ Mata seduai iya alu tebuka. Yesus alu berat-rat nangkan seduai iya enggau jako, “Anang madah ka utai to ngagai urang!” ³¹ Tang seduai iya angkat ari endur nya, alu madah ka berita pasal Yesus di serata menua nya. ³² Leboh urang dua iko nya mupuk ari endur nya, siko lelaki ke bago laban antu dibai ngagai Yesus. ³³ Leboh antu nya udah diburu, urang nya alu bejako, alu semua urang balat alit ati, ko sida, “Nadai utai baka to udah kala dipeda di menua Israel!” ³⁴ Tang ko urang Farisi bejako, “Iya muru antu ngena kuasa raja antu.” ³⁵ Yesus bejalai ngagai semua nengri nggau kapung desa, ngajar alam sinagoge, nusi Berita Badas pasal Perintah Allah Taala, alu ngerai ka urang ari semua macam pemedih nggau penyakit. ³⁶ Leboh Iya meda bala urang mayoh, Iya kasih ka sida laban sida irau ati sereta nadai daya, baka bedus ti nadai urang ngibun. ³⁷ Iya alu bejako ngagai sida murid Iya, “Utai ti diketau mayoh, tang urang ke ngetau mimit. ³⁸ Nya alai besampi minta ngagai Tuhan ke bempu umai ngirum ka mayoh agi urang ngetau.”