¹ Leboh Yesus udah tembu ngajar murid Iya ke dua belas iko nya, Iya angkat ari endur nya alu ngajar sereta nusi Berita Badas alam nengri di menua nya. ² Leboh Yohanes Pemaptis, ke ditutup alam rumah penjara, ninga pasal utai ti di kereja Kristus, iya alu ngasoh sekeda murid iya mai pesan to ngagai Yesus, ³ ko iya, “Kati Nuan to urang ke deka datai, tauka kami nganti urang bukai?” ⁴ Disaut Yesus, “Pulai kita alu padah ka ngagai Yohanes utai ti didinga nggau dipeda kita: ⁵ urang ke buta, meda; urang ke kait-kupit, bejalai; urang ke sakit kusta, dituci, urang ke benggal, ninga; urang ke parai, diangkat ke idup baru, alu Berita Badas ditusi ngagai urang ke umang. ⁶ Beberekat meh urang ke nda nulak Aku!” ⁷ Leboh sida murid Yohanes mupuk, Yesus alu belaboh bejako ngagai urang mayoh pasal Yohanes: “Nama utai ti deka dipeda kita leboh kita bejalai di menua puang? Buluh ti beguyap laban ribut? ⁸ Nama kebuah kita bejalai ngagai menua puang? Deka meda urang ke ngena gari ti badas? Urang ke ngena gari ti badas diau alam istana! ⁹ Nama utai ti deka dipeda kita? Deka meda siko nabi? Sigi amat, tang lebih ari nabi. ¹⁰ Nya meh urang ke dikenang ke dituleh: Peda meh, ‘Aku deka ngasoh seruan Aku bejalai dulu ari Nuan, Iya ti deka nyendiaka jalai ke Nuan.’ ¹¹ Enggau bendar Aku madah ngagai kita, ari semua urang ke udah di adai, nadai siko ke besai agi ari Yohanes Pemaptis. Tang Iya ke pemadu mit alam Perintah surga, lebih agi besai ari iya. ¹² Kenyau ari maya Yohanes Pemaptis, nyentuk ngagai diato, Perintah surga udah balat diserang, alu urang ke mangah nguji ngerampas Perintah nya ngena cara ti kasar. ¹³ Laban semua sida nabi enggau Adat Musa udah benabi nyentuk ngagai maya Yohanes datai, ¹⁴ alu enti kita deka nerima pesan sida, Yohanes nya meh Elia ke deka datai. ¹⁵ Awak ka urang ke bisi pending, ninga. ¹⁶ “Tang baka ni ko Aku manding ka rebak ti diato? Sida nya baka bala anak mit ke duduk di pasar, ¹⁷ alu bekangau ka pangan diri, ‘Kami nyepu kesuling ke kita, tang kita enggai betanda, Kami bekeduie nyabak, tang kita nda ngulit!’ ¹⁸ Laban Yohanes datai ukai deka makai ngirup; tang ko sida, ‘Iya dirasuk antu!’ ¹⁹ Anak Mensia datai, makai ngirup, tang ko sida, ‘Peda urang nya, bam, sereta pemabuk, bekaban nggau urang ke pengumpul cukai, nggau urang ke bedosa!’ Tang penemu-dalam Allah Taala dikamatka ulih utai ti dikereja penemu-dalam nya empu.” ²⁰ Yesus alu belaboh nganu nengri ti udah endur Iya ngereja mayoh kereja ajih, laban urang dia nda nesal ati ke dosa sida. ²¹ “Tulah meh nuan, Khorazim! Tulah meh nuan, Betsaida! Laban enti kereja ajih ti dikereja alam seduai, udah dikereja di Tirus nggau di Sidon, urang dia tentu lama udah nesal ati alu ngerasuk ka kain guni, alu ngerabu diri nggau amau. ²² Tang nggau bendar Aku madah ngagai kita, leboh Hari Pechara ila, Allah Taala deka lebih agi kasihka urang Tirus enggau urang Sidon, ari ti kasihka kita! ²³ Matthew 11:23-24 Lalu nuan, Kapernaum! Kati nuan deka diangkatka ke datai ke langit? nda, Nuan deka dibuai ngagai dunya urang parai! Laban enti kereja ajih ti dikereja alam nuan, udah dikereja di Sodom, nengri nya tentu agi meruan nyentuk ngagai sehari tu! ²⁴ Tang Aku madah ngagai nuan, leboh Hari Pechara ila, Allah Taala deka lebih agi kasihka Sodom, ari ti kasihka nuan!” ²⁵ Leboh maya nya Yesus bejako, “Aku meri terima kasih ngagai Nuan Apai, Tuhan ke bekuasa di surga enggau di dunya, laban Nuan udah ngelalai ka utai nya ari urang ke bepenemu-dalam sereta pandai, alu udah mandang ka sida ngagai bala anak mit. ²⁶ Sigi amat Apai, laban nya endang peneka Nuan. ²⁷ “Semua utai udah diberi Apai ngagai Aku. Nadai urang ngelala Anak, semina Apai aja, alu nadai urang ngelala Apai, semina Anak aja, enggau urang ke dipilih Anak endur Iya mandangka Apai. ²⁸ “Datai ngagai Aku semua kita ke lelak ngema utai ti berat, alu Aku deka ngasoh kita belelak. Ambi alu san tangkun Aku, alu belajar ari Aku, ²⁹ laban Aku nelap sereta baroh ati, alu belelak ka semengat kita. ³⁰ Laban tangkun Aku mudah, alu ma Aku lempung.”