¹ Are tavairaro Ihura vainti nampai vovano kia koqe aaraqaa virera, kia vira noraiqaakera atiraitira, nena qorara ihaaqama kera tinantema kera, vi vaiintiraravata tiraro koqe aaraqaa vuarira. Qaraaka vaiintiara tireva, nena qata vakaarara tinantema kera, vikaravata minti tiana. ² Nahenti kontara tireva, nena norara tinantema kera, vikaravata minti tiana. Qaraaka nahentiara tirera, nena aura nakaarara tinantema kera, vikaravata minti tiharama ihaaqama kera variqira vuana. ³ Tavairaro tentoqa nahen tiqaa raqikika kia vaivera, are vira koqe okarama autu amitaane. ⁴ Tentoqa nahenti vairamanta vika vaintivarave, vika naintivarave vaivera, vika homa viraqaa raqikivara. Vika nai noka qokave,naaqu taatokave, haaru nai vika raqikirara iriha,vate vika nai nokaqaave,nai taatokaqaave, raqikiqi vuata. Vika mintiaqi viha, Kotira kaiqa vare vaivaro Kotiva vikara quaheharoma varianaro. ⁵ Tentoqa nahentivano nariaraa vairava, viva Kotira vekaiqiharo variqiro viharo, entaqivata aatitairaqaavata Kotirara ti kahaqiarire tiro, vira aaramaqiro vuanaro. ⁶ Tentoqa nahenti vovano nai quahaainararaqai iriqiro vi vaiva vaireva, vi nahentiva qaqi variqiro viharovata, viva utuvi nahentira voqaarama vairo. ⁷ Are maa uvara vaiinti nahenti tiva nimiraro vikaqaa kia uvavano vaira koqemake variqi vuata. ⁸ Vaiinti vovano nai vaiinti nahentiqaa kia koqema kero raqiki vairera, vi vaiintiva Karaitira uvara qumina uvavema tianaro. Vi vaiintiva kia Kotira uvara quqaave ti variaka vikavata naatarakero voqaamakero qora vaiinti vanoma varianaro. ⁹ Are tentoqa nahenti autu vatareva iharama, tavairaro nahenti vovano qorainti vohaiqaqai varatero vairava vovata kontaiqama viro 60 ihi vara kairera, vira autuqai vatana. ¹⁰ Vi nahentirara koqe kaiqa vare vai nahentirave ti vai nahentivama variari. Vi nahentiva koqema kero nai vainti varaqaa raqikiqiro vi vaimanta noruqamavi nahentivama variari.Vi nahentiva koqema kero niaraihainauka nai naavuqi ntita vatero kara nimi vaira nahentivama variari. Vi nahentiva Kotira vaiinti nahenti kaiqa vara nimite vaira nahentivama variari. Viva maaraqi vai vaiinti nahentika kahaqama nimite vaira nahentivama variari. Viva koqe kaiqa, vo kaiqa vo kaiqa varaqiro vi vaira nahentivama variari. Minti vai nahenitika autuqai vataate tiana. ¹¹ Qaraaka tentoqa nahentiara kia vika autu vataate tiana. Vi nahentika Karaitirara noraiqaake iriqi vi, viraqaahai vika qaiqaa vaati varaataa iramanta Karaitira kaiqa qaqirama kevara. ¹² Vi nahentika hoqare nai kauqu aiqiqaa aqukeha tivate uvara qaqirakera kaara uvama varevara. ¹³ Qaraaka tentoqa nahenti okara vaireva, mantimama vairo; vika kia kaiqa vararaiti, qumina vaiha voqi voqi qumina vi ani vaiha vora turoqarama amite vora turoqarama amite i varira.Vika vokiaka kaiqaravata qumina irikeha tivaqi vi variara. Vika kia voka tiva nimi varia uvara viraqai tiva nimi variara. ¹⁴ Qaaraka tentoqa nahentivano mintiantorave ti, te virara tiha, Are qaiqaa qorainti varatera vainti vataqi vihara viraqaa raqikiqira vuane, turo. Vi nahentiva mintirera, tinavu navutaiqama timite variaka kiama ho vi nahentira kara tinavuqaa uva vatevara. ¹⁵ Te tavauramanta tentoqa nahenti hininavu koqe aara qaqirake tuqantaavi Sataanira aaraqaaqai vi variara. ¹⁶ Nahenti vovano Ihura vainti vaiharo tavairaro vira naavuqi tentoqa nahenti vovano vairera, viva viraqaa raqikiqiro vuari. Viva mitiramanta Ihura vaiinti nahenti vokika homa tentoqa nahenti vonavu nariaraa vaikaqaa raqikiqi vivara. ¹⁷ Elda vaiintinavuqihai vonavu koqemake vi kaiqara vare vaivera, are tiramanta vika vi vaiintinavuka koqaa voqavata nimiata. Vo vaiintinavu kia popoharaiti, kempukaiqama keha kotira uva tiva nimiqi viha, vi uvara okaravata vutuke vika numiqe varia vaiintinavukara, te avuniqamake vinavukara iriha mintima turo. ¹⁸ Kotira vukuqi mintimama tiro uiti auru rakavuarire tira, are purumakau vita vatairaro uiti vi vaura aiqu ntavaqiro vi anina purumakaura vira no rumpa terorave. Vira no qaqi kairaro purumakauvano vi kaiqara vareharo homa vi karara hini naanarove, tira. Kotira vukuqi uva vovano mintima tiro; vora kaiqa vara amitaira vaiintiva homa nai koqaa varanarove, tira. ¹⁹ Vaiinti vohaiqavanoqai elda vaiinti voqaa uva vatareva auti vairera, kia vi vaiintira uva iriana. Vaiinti taaraqantae, taaramonavue, tiha tenavu tavauraro vi vaiintiva ora kaiqa varaivo tivera, are vinavuka uvama iriane. ²⁰ Are tavaira nora vaintinavu quqaa qora kaiqa vara kaivera, are vinavuka ntita varera vaiinti nivuqaa vaiharama vainavuka nitiana. Are mintiramanta hini vaiinti nahenti vira taveha, vika qeteha hauri tenavuvata mintiarorave tivakeha variata. ²¹ Timotio, te Kotira avuqaavata, Ihu Karaitira avuqaavata, enselinavu nivuqaavata vaihama, te ariara kempukaiqamake tiha; Te ari tiva amuna uvara are vi uvara tiva nimiqira vihara kia vo vaiintiara ti navunaarave tivakera vi uvara qihaaqama kera vira tiva amiraitira, vo vatanaa vaiinti kempukaiqama kera tiva amiane, turo. Are nena navunaakavata vo vatanaa vaiintivata vohaa qarama kera uva tiva nimiana. ²² Kia paparuqama kehara nena kauqu vo vaiintiqaa vatehara vira noraiqama kairaro Kotira kaiqa varaarira. Hauri are mintiraro vi vaiintiva kia koqema kero Kotira kaiqa varairaro ariqaavata uva variantora. Vokiaka qora kaiqavano arivata utu varaantorave tira, are koqe kaiqaqai varaqira vuana. ²³ Kia qaqi qumina anamariqai namaqira vuana. Rovaravano vo enta vo enta ari ari vairara tira, are uaini inaaraiqa nairaro ari vikokavano ho variarira. ²⁴ Hini vaiintinavu qoqaa vaiha qora kaiqa vare variavaro uvavano vaaka vikaqaa qovaraiqi vaira. Hini vaiintinavu kukeqavi vaiha qora kaiqa vare variavaro vika qora kaiqa vare varia uvava naantiarainima qovaraiqianaro. ²⁵ Vira voqaara vaiinti nahenti koqemake vare varia kaiqava qoqaama vairo. Kukeqavi vaiharo koqe kaiqa vare vairava vairaro naantiara vira koqe kaiqavanovata qoqaama varianaro.