¹ Te ne rumpataa vaiinti nahentikara tirera. Ne nintaqaa raqiki vaina vaiintira koqe okara autu amiteha vira uva iriqi vuata. Ne mintiaqi vi vaivaro vovano kiama vira kaara Kotirara ora uva tianaro. Vovano kiama ho tinavu maara uvaravata qora uvave tianaro. ² Niqaa raqiki vaira vaiintiva Ihura vainti vairera, viva ni qata vaakaukama variarara ti, ne kia qora okara vira autu amitaraiti, ne voqavata koqemake vira uva iriqi viha vira kaiqa vara amitaata. Vi vaiintivavata Ihurara quqaave tivakero Kotirara muntuka vatairara ti, ne koqemake vira kaiqa vara amiteha vira kahaqamaqi vuata. Timotio, are vi uvara vaiinti nahenti tiva nimiqira vuana. ³ Vaiinti vovano anintero tinavu Noravano Ihu Karaitiva quqaa ti uvara qaqirakero, viva tenavu iriqi vi vauna uvaravata qaqira kero vo uva maara tirera. ⁴ Vi vaiintiva nai autuaraqai iriharo tiro, viva kia quqaa maara okara kankomakero iri vai vaiintivavama varianaro. Mintimake varia vaintika avu aatoqi tirorira uvave, antua uvave, tivaqaima varianaro.Vika mintimake ti varia uvara kaara vaiinti nahenti nai toma amite nai toma amitemaqi vihave, nai ati nai ati ihave, nariara nariara qora uva tivariarave, nariara naraira qora avu qaato utuqi vi variara. ⁵ Vaiinti nahenti vi uvara iriqi vi varia varo vika avu aatovano oraiqama vimanta Kotira uva quqaa uva qaqirake, vo uva vo uva ti variara kaara nai ati naia ati i variara. vika nai irike tiha, kaiqe Kotira avataqi vuaina aararaqaahai monuve, vo haika vohaikave varaare, ti variara. ⁶ Vaiintivano Kotiva ami haikarara vatauro tivakero quahairera, quqaama viva Kotira aaraqaa vinaraqaahairo koqe haika airi haika vatavama varianaro. ⁷ Tenavu vataini qovaraiqama vuna entara kia vo haikavata vare anunara. Tenavu maa vatara tutaake vuaina entara kia vo haikavata ho vare virara. ⁸ Virara irihama tenavu tavaariraro karave, qutavaaqave, ho vairera, tenavu virara homa vatauro tiari. ⁹ Monu airaira vareraraqai noraiqaake iri varaika variavaro vika avatara haikavano ravaaqavu kaimanta hampi kaiqa varaataa imanta qora kaiqa, vo kaiqa vo kaiqa vare variara. Mintiaqi viha virara kaara vika qoraiqamavi ekaara vehiqama vi taiqa vivara. ¹⁰ Vaiinti nahenti monuara voqamake muntuka ntimanta iriqi vi variaraqaahairo ekaa ora kaiqa, vo kaiqa vo kaiqavano qovarama vi vaira. Te tavauramanta vaiinti vonavu monuara voqamake muntuka ntimanta, vira kaara vika Ihura uva qaqira kaavaro vo maara vo maaravano vika ravaaqavu kaivaro vika muntukavano oraiqama vimanta variara. ¹¹ Ho Timotio, are Kotira vaiintivano varianarara tira, eka qora okara aatu ruqemakera kantama vuana. Are avuqavu variaina okarara iriqira vuana. Kotira aaraqaaqai nuvaqira vuana. Ihurara kempukaiqaamakera iriqira vuana. Vaiinti nahenti qihaaqama nimitaqira vuana. ¹² Vaiintinavu kantamaqi viha nai atarake nai atarake qiantema kera, nena ekaa enta qaqi variqi vina koqaara varenarave tivakehara kantamaqira vuane tiro. Kotiva ari aarama taira. Haaru Kotiva ari aarai entara are airi vaiinti nahenti nivuqaa vaihara te Kotira aaraqaaqai virerave tianara. ¹³ Kotiva vaivarora tiro, ekaa haikavano qaqi variqiro vi vaira. Ho te Kotira avuqavata, Pontiusi Pairativa vainaini vaiharo koqema kero vira tiva ami vaintira Ihu Karaitira avuqaavata, vaihama ariara maa uvara kempukaiqamake turo: ¹⁴ Te ariqaa tiva tauna uvaraqaa koqemakero raqikiqira vihara kia hampi vo uva vi uvaraqaa taaqautaraitira, koqema kera vi uvaraqaa raqikiqira vi vairaro ekaara enta tinavu Noravano Ihu Karaitiva qovaraiqiarira. ¹⁵ Naatiara Kotiva tivataaina entaraqaa Ihu Karaitiva qaiqaa qovaraiqama vuanaro. Ike, Kotiva voqamakero koqema nimite vaiva, viva ekaa haikaqa raqiki vaivama vairo. Viva ekaa avuhainaa vaiinti vika Avuhainaavama vaira. Viva ekaa nora vaintive nora enselive, vika Noravanoma vairave. ¹⁶ Vivaqaima ekaa enta qaqi variqiro vi vaiva vaiharo viva voqamakero aatairaqa variqi, vi vaivaro vovano vira qaumanto vuarirava aarava kia vaivaro vira tavai vaiintiva kia vaivaro vira tavaarirava vaiintivavata kia varianaro. Viva mintimake vairara irihama, kaiqenavu vira autuqai noraiqama keha virara ekaa enta kempukavano variqiro vuarire tiare. Quqaama turo. ¹⁷ Maa vataraqaa airi haika vateka are vika tiva nimiramanta vika kia nai autu tuahereha tenavu nora vaiinti nahenti vauro tiata. Vikara kia nenta haikara vahuqa variaina haikarara noraiqaake iriqi viraiti, Kotiraqai noraiqaake iriqi vuate tiana. Tinavuara koqemake variqi vuate tiro, Kotiva ekaa haika ihaqaama keraharo tinavu timi vaira. ¹⁸ Are airi haika vatekara koqe kaiqa, vo kaiqa vo kaiqa varaqi vuate tiana. Are vikara nenta haikara hini ihaqaama keha rairake vokavata nimiate tiana. ¹⁹ Vika mintiaqi vi vaivaro naantiara naaaruvaini vika koqaavano qeramaviro vaira, viraqaahai vika quqaiqamake qaqi variqi vi okararavata vare, qaqi variqi vivara. ²⁰ Timotio, Kotiva ari ami kaiqaraqaa koqemakera raqikiqira vihara vi kaiqara varaqira vuana. Vo vaiitinavu kia Kotirara iriraiti, vika nai irikeha tiha, maara uvavano vaireva vira okaravano maantimama vaivo, tivakeha qumina uvaqai ti vriara. Are vi uvara ti variaka tauvaqa utu nimitaana. ²¹ Hini vaiinti nahenti vika uvara quqaa uva okarave tivakeha vika Kotira aara qaqirake qora aaraqaaqai ni variara Kotiva ni qaqurihama nimiteharo koqema nimitaira variate, tiro.