¹ Kotira Maraquravano vutukero maa uvara mintima tiro; naantiara vaiinti vo navu Karaitirara iriqi vi vai okaraara qaqirake, vinavuka vanaananavu una uva tiva nimi vai uvaraqai iriqi vivarave, tira. ² Vi vaiintinavuka maa entara ovaramavi quqaa uva ti variaka voqaara una uvaqai tivaqi vi variavaro vika toqaavu aruataara vaimanta vika kia kauriraiti, qora kaiqaqai vare variara. ³ Vinavuka vaiinti nahenti qioqama teha kia naraiti qaqi variqi vuate, ti variara. Vika minti ti variavaro Kotira uvavano kia mintimakero vaira. Tinavuara eka vi karara vi karara naate tiro, Kotiva vo kara vo kara autukero vataira. Virara irihama tenavu Karaitirara quqaave tivake Kotira quqaa uva iriqi viha tenavu homa vo kara vo kara Kotirara koqema iarao tivakeha namaqi virara. ⁴ Ekaa Kotiva autukero vatai karava koqe karaqaima vairo. Tenavu vo kara kia qioqama taraiti, ekaa karara Kotirara koqema iarao tivakeha homa namaqi virara. ⁵ Kotiva tivaro kara qovarama virara ti, tenavu Kotirara koqema iarao tivakeha homa tenavu ekaa karara koqe karaqai vaivo tivakeha narara. ⁶ Are vi uvara vi uvara Ihura vaiinti nahenti tiva namiqira virera, are Ihu Karaitira kaiqa vaiinti koqevama vainara. Are mintiaqira vi vairaro Kotira quqaa uva vano ari kara voqaara vairara are koqema kera Kotira aaraqaa vinara. ⁷ Vo uva vuri uva hampiqama keha una variqara ti varia uvarave, kontavano hampi uva ti variarave, are ekaa vi uvara tauvaqa utu amitaana. Are Kotira aaraqaa koqemakera ni vainarara, virara noraiqaakera iriqira vuana. ⁸ Vaiitivano aaraini niharo nai aiqu kauqu rantutaarirava vi haikava vira vaataqaima kahaqianaro. Vaiintivano Kotira aaraqaa niharo kempukaiqama kero ni vairava vira maraquravata kahaqama amitaanaro. Are Kotira aaraqaa vo enta vo enta kempukaiqaa kera ni vairaro ari avu aato muntukaqihairo ho vairara are maa entaravata, naantiara naaruvaini vaina entaravata, homa variqira vinara. ⁹ Maa uvara quqaa uva tivataara, vaiinti nahenti virara quqaa uvave tivakeha homa iriqi vivara. ¹⁰ Tenavu tiha, Qaqi variqiro vi vai Variqava, Kotiva, viva tinavu kahaqiarirava vaivo, ti vaunarara ti, tenavu vukaari utiha vira kaiqa varaqi vi vaunara. Kotiva eka vaiinti nahenti kuvantu nimite vaiva, viva Ihurara uqaave ti vainti nahentika kuvantuma nimitanaro. ¹¹ Maa uvara ari tiva amunara are vaiinti nahenti tiva nimiqi vihara, vi uvara iriqi vuate tiana. ¹² Vokika ariara tiha, Tavaate, viva araaka vaiintivanoqaima vaivo. Kia vira uva irirave, tivera, are kia vika qaqi kaira minti tivaqi vuata. Ihura vaiinti nahenti ariara koqe vaiintive tiate tira, are koqe uvaqai tivaqira vihara koqemakera variqira vuana. Vorara vorara muntuka vataqira vuana. Kotirara kempukaiqaa kera iriqira vuana. Hampi ni vai okarara tauvaqa utu amitehara variqira vuana. Are mintiaqira vi vaira vaiinti nahanti vikavata ari aanante koqemake variqi vivara. ¹³ Are ti veka vaiharama maa kaiqara varaqira vuana; vaiinti nahenti ruvaaquma kera vika nivuqaa himpi vaihara Kotira uva kaara ruva nimitera, vi uvara iriqi vuate tivakera, vi uvara okaravata avuqavuqama kera tiva nimiqira vuana. ¹⁴ Haaru elda vaiintinavu nai kauqu ariqaa vateha Kotira uva vo ari tiva ovarama amuvara are viraqaahaira Kotira kempuka vo varanara. Kotiva vi kempukara ari amitaira are kia tauru karaitira, virara iriqira vuana. ¹⁵ Ekaa vi haikarara tunara are vi kaiqaraqai varaqira vi vairamanta ekaa vaiinti nahenti ari kaiqa taveha virara quqaa koqe kaiqave tiata. ¹⁶ Are raurihara variane. Are koqe aaraqaaqai viharama koqe uvaqai vaiinti nahenti tiva nimiqira vuana. Are mintiaqira virera, Kotiva arivata ari uva iri vaikavata kuvantu nimitero ntitaanaro.