¹ God Yawe, ol narapela kantri i kam long ples bilong yu na ol i bagarapim haus holi bilong yu; Ol i mekim Jerusalem i kamapim bikpela bagarap. ² Ol i givim ol dai bodi bilong ol wokman bilong yu olsem kaikai bilong ol pisin bilong skai na ol bodi bilong ol bilip manmeri bilong yu lo ol wel animol bilong graun. ³ Ol i kapsaitim blut bilong ol olsem wara i raunim Jerusalem na i nogat wanpela i stap long planim ol. ⁴ Mipela i kamap manmeri bilong sem tru long ai bilong ol manmeri i stap klostu long mipela na ol i tok bilas na mekim planti tok pilai i no gutpela long mipela. ⁵ Wanem taim nau, God Yawe? Bai yu belhat olgeta taim? Wanem taim bai stretpela belhat bilong yu i lait olsem paia? ⁶ Kapsaitim belhat bilong yu long ol kantri husat i no save long yu na ol kindom we i no save kolim nem bilong yu. ⁷ Long wanem ol i bin mekim nogut long Jekop na bagarapim ol haus lain bilong em. ⁸ Yu noken holim ol sin bilong ol tumbuna bilong mipela na tok bek long mipela, tasol larim pasin bilong marimari bilong yu mas i kam long mipela, long wanem mipela i stap olsem samting nating. ⁹ Helpim mipela, God Yawe bilong kisim bek man, long gutpela na biknem bilong yu. Kisim bek mipela na lusim ol sin bilong mipela long gutpela nem bilong yu. ¹⁰ Bilong wanem na ol kantri bai i tok olsem, "God Yawe bilong ol i stap we?" bekim bek blut bilong ol wokman bilong yu i mas kamap long ol kantri lo ai bilong mipela. ¹¹ Larim krai bilong pen bilong ol kalabus lain i kam long yu, wantaim bikpela strong bilong yu i ken mekim ol pikinini bilong dai bai i stap laip. ¹² Bekim bek i go long laip bilong ol kantri i stap klostu long mipela 7-pela taim pei nogut bihainim mak bilong tok nogut ol i mekim long yu, Bikpela. ¹³ Olsem na mipela ol manmeri bilong yu na ol sipsip bilong banis bilong yu bai i givim tenkyu long yu oltaim. Mipela bai i tokaut long biknem bilong yu long ol lain tumbuna bilong mipela i kam bihain.