¹ Harim mi skulim yupela ol manmeri bilong mi, putim yau na harim ol toktok kam aut long maus bilong mi. ² Bai mi opim maus bilong mi na tokaut insait long ol tok bokis, bai mi singsing long ol samting hait bilong bipo. ³ Dispela em ol samting mipela i bin harim na lainim ol long en, ol dispela samting ol tumbuna bilong mipela i bin tokim mipela long en. ⁴ Mipela bai i no inap haitim long ol tumbuna bilong ol. Bai mipela tokim ol nupela lain tumbuna bilong ol long ol gutpela pasin bilong God Yawe, ol stron bilong em na ol kain kain gutpela samting em i bin mekim. ⁵ Em i kamapim na stronim ol tok bilong kontrak bilong em insait long Jekop na em i makim na givim wok long wanpela lo bilong em insait long Israel. Em i givim lo long ol tumbuna bilong mipela bai ol i mas lainim ol pikinini bilong ol long dispela lo. ⁶ Em i givim lo olsem bai ol tumbuna husat i kam bihain bai i save long ol tok bilong lo bilong em na ol pikinini husat i no kamap yet na ol tu long taim bilong ol bai tokim ol tumbuna bilong ol. ⁷ Olsem bai ol putim bilip bilong ol insait long God Yawe na bai ol i no inap long lusim tingting long ol wok bilong em tasol bai ol i holim pasim stron ol lo bilong em. ⁸ Em olsem na bai ol i no ken kamap olsem ol tumbuna bilong ol, husat i bin stap het stron na sakim tok tumas, bel bilong ol dispela lain i no bin i stap stret na spirit bilong ol i no bin stap pas tru wantaim God Yawe. ⁹ Ol lain tumbuna bilong Efraim i bin kisim bunara bilong pait wantaim ol, tasol long dei bilong pait ol i lusim na tanim bek. ¹⁰ Ol i no tingim na holim pasim kontrak bilong God Yawe wantaim ol na ol i no laik tru long bihainim ol lo bilong em. ¹¹ Ol i lus tingting long ol wok bilong em na ol dispela gutpela samting em i bin soim ol. ¹² Ol i lusim tingting long ol gutpela samting em i bin mekim long ai bilong ol lain tumbuna bilong ol long Isip, long graun bilong ol Soan. ¹³ Em i bin brukim solwara i go long tupela hap na kisim ol i go kamap long hap sait, em i mekim wara i bruk long tupela hap na i sanap olsem banis. ¹⁴ Taim tulait i stap yet, em i go pas long ol wantaim klaut na long olgeta nait wantaim lait bilong paia. ¹⁵ Em i brukim ston insait long ples nating na em i givim planti wara long ol, ol wara inap long pulamapim mak bilong daun bilong solwara. ¹⁶ Em i mekim ol liklik wara i kam aut long ol ston na mekim ol liklik han wara i ron olsem ol bikpela wara. ¹⁷ Tasol ol i go het yet long mekim sin na kamapim birua wantaim em, sakim tok bilong Bikpela Antap Tru long ples nating. ¹⁸ Ol i traim God Yawe long bel bilong ol taim ol i askim em long kaikai long inapim hangre bilong ol long kaikai tasol. ¹⁹ Ol i tok pait long God Yawe na i tok olsem, "Tru tru bai God Yawe inap long redim wanpela tebol kaikai bilong mipela insait long ples nating?" ²⁰ Lukim, taim em i paitim ston, wara i sut i kam autsait na ol han wara i pulap na ron i go. Tasol bai em inap long givim yumi bret tu? Bai em inap long redim na givim mit long ol manmeri bilong em? ²¹ God Yawe i belhat taim em i harim dispela, olsem na paia bilong belhat bilong em i kukim ol lain bilong Jekop na belhat bilong em i kirapim pait long Israel, ²² long wanem ol i no bin bilip long God Yawe na ol i no putim bel na tingting bilong ol long helpim bilong em. ²³ Ol skai antap i harim tok bilong God Yawe na em i opim dua bilong ol skai. ²⁴ Em i givim mana olsem ren i kam daun long ol, bai ol i kaikai na long heven em i givim ol pikinini kaikai bilong wit. ²⁵ Ol manmeri i kaikai ol bret bilong ol ensel. Kaikai em i salim long ol i planti na pulap tru. ²⁶ Em i mekim win bilong san kamap i ron antap long skai na long stron bilong em, em i givim stia long win i kirap long saut. ²⁷ Em i salim mit i kam daun long ol olsem ren na planti pisin olsem ol wesan bilong solwara. ²⁸ Ol i pundaun long namel ples bum bilong ol na pundaun raunim ol haus sel bilong ol. ²⁹ Olsem na ol kaikai na pulap. Em i givim ol wanem ol i hangre tru long kaikai. ³⁰ Tasol ol i no inap long pulap yet na kaikai bilong ol i stap yet long maus bilong ol. ³¹ Long dispela belhat bilong God Yawe, em i birua long ol na kilim ol stronpela man bilong ol. Em i daunim daunim ol yangpela man bilong Israel. ³² Maski wanem i kamap long ol na ol i go het yet long mekim sin, ol i no bilipim ol gutpela pasin em i bin mekim. ³³ Long dispela as tasol, God Yawe i sotim ol dei bilong laip bilong ol na ol yia bilong ol i pulap wantaim bikpela poret. ³⁴ Long ol taim God Yawe i givim pen sua long ol, ol bai i traim long painim em, bai ol tanim i kam long em na bai ol wok hat tru long painim em. ³⁵ Bai ol i kisim tingting ken olsem God Yawe em i ston bilong ol na dispela God Yawe Antap Tru i save rausim ol long hevi. ³⁶ Tasol maus bilong ol i pulmapim em wantaim tok win tasol na ol i giaman long em wantaim ol tok ol i mekim. ³⁷ Long wanem bel bilong ol i no pas stron long em na ol i no i stap tru long ol kontrak bilong em. ³⁸ Tasol, em i bin marimari na lusim sin bilong bel hait bilong ol na i no bagarapim ol. Yes, planti taim em i holim bek belhat bilong em na i no kirapim birua bilong em long ol. ³⁹ Em i skelim ken tingting bilong em na luksave olsem ol i kamap long bodi tasol, wanpela win em i save kam i go tasol na i no inap long tanim bek. ⁴⁰ Amaspela taim ol i bin sakim tok na bikhet long em insait long ples nating na ol i mekim bel bilong em i krai tru long hap ples i no gat samting long en. ⁴¹ Gen na gen ol traim God Yawe na bagarapim bel bilong dispela Holipela man bilong ol lain Israel ⁴² Ol i no bin tingim pawa bilong em, long wanem em i bin rausim ol long han bilong ol birua, ⁴³ taim em i kamapim ol kainkain sain insait long Isip na ol gutpela samting long ol hap graun bilong Soan. ⁴⁴ Em i tanim ol wara bilong Isip i go kamap blut olsem bai ol i no ken drin long han wara bilong ol. ⁴⁵ Em i salim ol planti na planti moa lang husat i daunim ol na ol rokrok i pulap na karamapim olgeta graun bilong ol. ⁴⁶ Kaikai bilong gaden bilong ol em i givim ol binatan grasopa long kaikai na kaikai bilong hatwok bilong ol i go long ol bikpela grasopa. ⁴⁷ Em i bagarapim ol wain gaden bilong ol long ais ren na ol sikamo diwai bilong ol wantaim planti ais ren. ⁴⁸ Em i salim ais ren antap long ol bulmakau bilong ol na tromoi ol hap paia bilong klaut i pairap antap long olgeta abus ol i save lukautim. ⁴⁹ Ol hotpela paia bilong belhat bilong em i larim i kam antap long ol. Em i salim hevi, belhat na kain kain trabol olsem ol wokman bilong em long kamapim bagarap. ⁵⁰ Em i stretim wanpela rot bilong belhat bilong em, em i no pasim ol long dai tasol em i salim ol i go insait long ol kain kain hevi olsem long Isip. ⁵¹ Em kilim olgeta namba wan pikinini man insait long Isip, namba wan pikinini husat i stap stron bilong ol insait long haus sel bilong Hem. ⁵² Em i go paslain na kisim ol manmeri bilong em i go autsait olsem ol sipsip na em i stiaim ol long wokabaut abrusim ples nating olsem wanpela lain sipsip. ⁵³ Ol i wokabaut gut wantaim nogat poret bilong wanem em yet i go paslain long ol, tasol solwara i daunim ol birua bilong ol. ⁵⁴ Na em i kisim ol i kam kamap long boda mak bilong graun holi bilong em, long dispela maunten holi bilong em we em i bin winim wantaim han sut bilong em. ⁵⁵ Em i rausim ol narapela manmeri husat i stap pas long ol rot bai ol i go na em i makim na givim graun bilong ol wanwan bai i kamap bilong ol olgeta. Em i sindaunim ol lain Israel long wan wan famili bilong ol yet insait long haus sel bilong ol yet. ⁵⁶ Tasol ol i traim em na sakim tok bilong God Yawe Antap long Olgeta na ol i no holim pasim stron ol tok bilong tambu bilong em. ⁵⁷ Tasol ol i no i stap stret na ol i mekim pasin bilong man i giaman olsem ol papa bilong ol. Ol i olsem bunara we man i no inap putim tingting long en long mekim wanpela samting. ⁵⁸ Long wanem ol i mekim em i belhat wantaim ol ples antap bilong lotu long giaman god bilong ol na ol kirapim em long belhat long ol wantaim giaman god bilong ol. ⁵⁹ Taim God Yawe i harim dispela, em i bel hat na givim beksait olgeta long Israel. ⁶⁰ Bikpela i lusim na givim beksait olgeta long Sailo ples bilong bum na lotu, dispela haus sel we em i bin i stap insait namel long ol manmeri. ⁶¹ Em i larim stron bilong em bai narapela i kalabusim na givim biknem bilong em i go long han bilong ol birua. ⁶² Em i givim ol manmeri bilong em i go long bainat na em i belhat long ol dispela lain husat em i bin makim ol bilong em yet. ⁶³ Ol yangpela man bilong ol paia i kukim na ol yangpela pikinini meri nogat hamamas singsing bilong marit. ⁶⁴ Bainat i daunim ol pris bilong ol na ol meri bilong ol i no inap long krai. ⁶⁵ Bikpela em i kirap olsem wanpela ol i kirapim nau tasol long slip, olsem man bilong pait husat i bikmaus bihain long drin wain. ⁶⁶ Em i raunim ol birua bilong em i go bek na em putim ol long i stap insait long dispela sem i stap oltaim. ⁶⁷ Em i givim beksait long haus sel bilong Josep na em i no makim ol lain famili na tumbuna bilong Efraim. ⁶⁸ Em i makim ol lain tumbuna bilong Juda na maunten bilong em Saion em save laikim tru. ⁶⁹ Em i wokim ples stap bilong em olsem ol heven antap na olsem graun em i bin kamapim bai i stap oltaim. ⁷⁰ Em yet i makim Devit, wokman bilong em na i bin rausim em namel long ol sipsip. ⁷¹ Em i kisim em kam autsait taim em wok long bihainim na putim was long ol mama sipsip na ol yangpela bebi sipsip, em i kisim em long kamap wasman bilong Jekop, ol manmeri bilong em na bilong Israel husat em i makim bilong em yet. ⁷² Devit i bin wasman bilong ol wantaim stretpela pasin long bel bilong em na em i bin lukautim ol long han bilong em gut tru.