¹ God Yawe, bilong wanem yu givim baksait long mipela olgeta? Bilong wanem na yu belhat moa yet long ol sipsip long banis bilong yu? ² Yu tingim ol manmeri bilong yu, husat yu bin baim long taim bipo, ol wan lain husat yu bin baim bek long kamap ol lain bilong yu yet na Maunten Saion em ples yu save stap. ³ Kam lukim ol ples i bagarap pinis, olgeta bagarap ol birua i bin mekim insait long holi ples. ⁴ Ol birua bilong yu i bin krai bikpela namel long ples yu bin makim, ol i stretim ples na putim ol fleg bilong pait i go antap. ⁵ Ol katim wantaim bikpela tamiok na tromoi i go wankain olsem ol save mekim insait long bikpela bus. ⁶ Ol i bagarapim i go liklik na brukim daun ol piksa ol i wokim long diwai, ol brukim ol wantaim tamiok na hama. ⁷ Ol i putim paia lon ples holi na bagarapim ples bilong yu, em ples yu save stap long en na ol i pundaunim go daun long graun. ⁸ Ol i tok olsem long bel bilong ol, "Bai mipela i bagarapim gut tru olgeta". Ol kukim olgeta ples bum long dispela hap graun. ⁹ Mipela i no lukim moa ol mak, ol profet i no moa stap na nogat man namel long yumi bai save dispela samting bai i pinis long wanem taim. ¹⁰ Hamas taim stret bai ol birua i tok bilas long yu God Yawe? Bai ol birua i tok bilas long nem bilong yu i save stap oltaim? ¹¹ Bilong wanem na yu holim bek han bilong yu, em han sut bilong yu? Rausim han sut bilong yu long klos bilong yu na bagarapim ol. ¹² Bipo taim yet God Yawe i bin stap King bilong mi. Em i save kisim bek ol manmeri antap long ples graun. ¹³ Yu save brukim solwara long namel long stron bilong yu, yu brukim het bilong ol bikpela wel abus bilong solwara. ¹⁴ Yu brukim ol het bilong bikpela snek leviatan na yu givim go long ol lain i save stap long ples nating bai ol i kaikai. ¹⁵ Yu brukim na opim ol wara i stap wantaim ol liklik han wara, yu mekim olgeta bikpela wara i save ron i drai. ¹⁶ Dei em i bilong yu na nait tu em i bilong yu, yu putim san na mun long ples bilong ol. ¹⁷ Yu bin putim olgeta mak long graun, yu bin wokim taim bilong san na taim bilong ais i pundaun. ¹⁸ Tingim ol pasim ol birua i bin toktok long bagarapim yu, God Yawe ol hambak lain i bin tok baksait long nem bilong yu. ¹⁹ Noken givim laip bilong pisin balus bilong yu long wel abus. Noken lusim tingting olgeta long laip bilong ol manmeri bilong yu husat i stap long bagarap. ²⁰ Tingim bek tok promis bilong yu, long wanem, ol ples tudak bilong graun i pulap wantaim ol ples bilong hevi na bagarap. ²¹ Noken larim ol manmeri stap long bagarap i go bek wantaim sem, larim na ol manmeri husat i stap trangu na bagarap i ken litimapim nem bilong yu. ²² God Yawe, kirap na stronim biknem bilong yu yet, tingim wanem ol man husat i save mekim ol tok i nogut long yu olgeta dei ²³ Noken lus tingting long nek bilong ol birua bilong yu o, bikmaus bilong ol lain husat oltaim i save daunim nem bilong yu.