Gutpela man bilong pilai musik. Song bilong ol pikinini man bilong Kora. ¹ Harim dispela, yupela ol manmeri, putim yau, yupela husat i stap long dispela graun, ² liklik na bikpela, man i gat kago na man i nogat kago olgeta. ³ Maus bilong mi bai i tokaut long gutpela tingting na bel bilong mi bai i luksave long ol gutpela tingting. ⁴ Mi bai putim yau kam klostu long harim ol tok piksa na mi bai kirapim ol tok piksa bilong mi wantaim gita. ⁵ Bilong wanem bai mi pretim ol taim nogut na sapos man nogut i banisim lek bilong mi? ⁶ Bilong wanem bai mi pret long ol man husat i save bilip long ol bikpela moni, biknem bilong ol na apim ol yet long planti gutpela samting ol i gat? ⁷ Em i tru olsem nogat wanpela man i ken helpim brata bilong em o bai God Yawe long kisim bek em. ⁸ Long kisim bek laip bilong wanpela man na pe bilong em i antap tumas na nogat wanpela man bai bekim dispela dinau. ⁹ I nogat wanpela man bai i stap laip oltaim na bodi bilong em bai i no inap long sting. ¹⁰ Man i gat gutpela tingting bai i dai na ol longlong man na ol man i nogat save ol bai i dai na narapela lain bai kisim samting bilong ol. ¹¹ Hait tingting bilong ol i olsem, ol famili bilong ol bai i stap oltaim na ples we ol i stap long en long olgeta lain bilong ol, ol bai kolim nem bilong graun bilong ol bihain long nem bilong ol yet. ¹² Tasol man i gat planti samting i no inap long stap laip. Em i wankain olsem ol wel animol i save i dai. ¹³ Dispela pasin bilong ol em i nogut na bihain long ol na ol man i tok orait long ol toktok bilong ol na strongim ol. Sela* ¹⁴ Ol i wankain olsem sipsip na ol i makim ol long go long ples bilong man i dai pinis na dai bai i kamap olsem bosman bilong ol. Ol stretpela man bai bosim ol long monin taim na ol bai kaikai bodi bilong ol long ples bilong dai man na ol bai i nogat hap long stap. ¹⁵ Tasol God bai i kirapim mi bek ken long strong bilong ples bilong dai na em bai i kisim mi. Sela* ¹⁶ Noken pret sapos wanpela man i gat planti samting na biknem bilong em i go antap tru. ¹⁷ Taim em i dai em i no inap kisim ol dispela samting i go na biknem bilong em i no inap tru long go daun bihainim em. ¹⁸ Em i amamasim bel bilong em taim em i stap laip na ol man i apim nem bilong yu taim yu stap laip, ¹⁹ em bai i go bek ken long ol lain bilong papa bilong em na ol bai i no inap lukim lait ken. ²⁰ Wanpela man husat i gat planti samting tasol i no gat gutpela tingting em i wankain olsem wel animol i save dai na bagarap.