Song bilong Devit, bilong kisim bek tingting. ¹ God Yawe, Taim yu belhat long mi, yu noken krosim mi na kalabusim mi. ² Spia bilong yu i brukim skin bilong mi na han bilong yu i pusim mi i go daun. ³ Yu belhat long mi na mi pilim bikpela pen long olgeta bodi bilong mi. Long sin bilong mi tasol, sik bilong mi i no pinis insait long ol bun bilong mi. ⁴ Pasin nogut bilong mi i karamapim mi na em i kamap olsem bikpela hevi long mi. ⁵ Ol sua bilong mi i gat planti susu na smel long wanem, sin bilong mi i nogut tru. ⁶ Olgeta dei baksait bilong mi i bruk i go daun na mi save pilim daun tru na em i save mekim mi i wokabaut wantaim krai olgeta dei. ⁷ Insait long bodi bilong mi, mi pulap long strongpela pen na mi no gat strong long bodi bilong mi. ⁸ Bodi bilong mi em i dai na em i bagarap tru na mi slip i go daun, long wanem bel bilong mi i pen nogut tru na mi singaut strong. ⁹ Bikpela, yu lukim bel bilong mi wantaim strongpela tingting na pen mi gat em i no hait long yu. ¹⁰ Bel bilong mi i hevi na strong bilong mi i lus na ai bilong mi i no lukluk gut. ¹¹ Ol wantok na ol poroman i go longwe long mi, bilong wanem mi bagarap long sua na ol lain i stap klostu long mi tu ol i lusim mi na i go longwe. ¹² Ol man husat i laik kilim mi, ol i wokim umben long holim mi. Ol man husat i painim mi long bagarapim mi, ol i mekim ol tok nogut long bagarapim mi na mekim ol giaman tok olgeta taim. ¹³ Tasol, mi save stap olsem wanpela yau pas man i no save harim tok na tu mi save stap olsem wanpela maus pas man husait i no save toktok. ¹⁴ Mi save stap olsem wanpela man husat em i no save harim tok na bekim. ¹⁵ Tru mi wet long yu, God Yawe, yu bai harim krai bilong mi, God Bikpela bilong mi. ¹⁶ Tasol mi mekim dispela tok olsem, ol birua bilong mi i noken lukluk long mi taim lek bilong mi wel na mi pundaun, ol bai mekim nogut long mi. ¹⁷ Olsem klostu mi pundaun na mi pilim wanpela kain pen oltaim. ¹⁸ Mi tingim sin bilong mi na mi tokaut long pasin nogut bilong mi. ¹⁹ Tasol ol birua bilong mi i planti tumas na planti man i save les nating long mi long i nogat as long en. ²⁰ Mi bin mekim gutpela pasin long ol, tasol ol i bekim wantaim nogut pasin. Taim mi wok strong long mekim gutpela pasin, ol i tok bek na kotim mi. ²¹ Yu noken givim baksait long mi, God Yawe, God bilong mi, yu noken i go longwe long mi. ²² Man bilong kisim bek mi, Bikpela bilong mi, yu kam hariap na helpim mi.