Gutpela man bilong pilai musik. Song bilong Devit. ¹ Insait long yu, God Yawe, mi painim ples hait bilong mi, noken larim bagarap i kam long mi. Helpim mi long stretpela pasin bilong yu. ² Harim mi na helpim mi kwiktaim, kamap strongpela ples hait bilong mi olsem banis long lukautim mi. ³ Yu strongpela banis tru bilong mi, long nem bilong yu, soim rot na lukautim mi. ⁴ Rausim mi long umben ol i bin haitim bilong mi, yu ples hait bilong mi. ⁵ Long han bilong yu mi putim spirit bilong mi, yu bai helpim mi, God Yawe, yu God bilong stretpela pasin. ⁶ Mi no save laikim tru ol manmeri husat i save lotu long ol god giaman, tasol mi bilip long God Yawe. ⁷ Mi bai pulap wantaim amamas long bihainim promis bilong yu long wokabaut stret, yu lukim hevi bilong mi na yu save long bel hevi bilong mi. ⁸ Yu no putim mi long han bilong ol birua bilong mi. Yu putim lek bilong mi long bikpela hap ples. ⁹ Marimari long mi, God Yawe, bilong wanem mi stap long hevi, Ai bilong mi i no inap long lukluk gut na bel bilong mi i no stap gut. ¹⁰ Laip bilong mi i pulap wantaim wari na olgeta dei long laip bilong mi i pulap wantaim pen. Mi nogat strong bilong wanem sin, bilong mi i daunim mi na ol bun bilong mi i slek olgeta. ¹¹ Long ol birua bilong mi tasol, ol manmeri i save luk daun long mi, Ol wantok bilong mi i stap wantaim pret long samting i kamap long mi na ol lain husat i save long mi i pret nogut tru. Ol lain husat i lukim mi long liklik han rot i ranawe. ¹² Ol i lusim tingting long mi olsem daiman ol i save lusim tingting long em. Mi olsem wanpela graun sospen i bruk. ¹³ Mi harim planti ol pret toktok long olgeta hap olsem, ol i pasim tok long bagarapim mi. Ol i pasim tok long kilim mi i dai. ¹⁴ Tasol mi bilip long yu, God Yawe, mi tok, ''Yu God bilong mi.'' ¹⁵ Laip bilong mi i stap long han bilong yu. Rausim mi long han bilong ol birua bilong mi na ol lain husat i laik bagarapim mi. ¹⁶ Larim marimari bilong yu i stap long wokman bilong yu, helpim mi long wokabaut long stretpela pasin oltaim. ¹⁷ Noken larim mi pilim sem, God Yawe, mi singaut long yu! Larim ol man nogut i pilim sem! na larim ol i stap isi long ples bilong ol dai man. ¹⁸ Mi laik yu mekim maus bilong ol man i save giaman i mas pas. Mekim olsem long ol man husat i save hapim ol yet na long man husat i save bagarapim ol narapela man. ¹⁹ Ol gutpela pasin bilong yu i bikpela tumas long ol manmeri husat i daunim ol yet na stap aninit long yu, yu mekim long ol husat i painim ples hait long yu bai olgeta manmeri i lukim! ²⁰ Yu haitim ol manmeri long ol man nogut insait long haus bilong yu. Yu haitim ol gut long ol man bilong mekim ol kainkain tok nogut. ²¹ Litimapim God Yawe, em i soim mi promis bilong gutpela pasin bilong wokabaut stret oltaim, taim mi stap insait long biktaun ol birua i banisim long en. ²² Maski sapos mi hariap long tok olsem, '' bai rausim mi long lain bilong em,'' Mi krai long yu helpim mi na yu harim beten bilong mi. ²³ Laikim God Yawe, yupela husat i save holim pas bilip na bihainim em. God Yawe i save lukautim ol manmeri i save bihainim stretpela pasin tasol em i save bekim pei long ol man nogut long wankain skel ol i mekim long en. ²⁴ Stap strong, yupela husat i bilip long God Yawe long helpim yupela.