Song bilong givim i go long tempel. Song bilong Devit. ¹ Mi bai litimapim nem bilong yu, God Yawe, long wanem yu bin apim mi i go antap na yu no larim ol birua bilong mi long amamas. ² God Yawe, Bikpela bilong mi, mi krai long yu bai helpim mi na yu oraitim mi. ³ God Yawe, yu bin kisim tewel bilong mi i kamaut long ples bilong ol spirit nogut na yu mekim mi i stap laip na mi no dai. ⁴ Litimapim nem bilong God Yawe, yupela ol manmeri i save bihainim em oltaim. Tok tenkyu taim yupela i tingim stretpela pasin bilong em. ⁵ Belhat bilong em i save kam long sotpela taim tasol bel isi bilong em i save stap oltaim oltaim. Wari i save kam long nait tasol amamas i save kam long monin. ⁶ Wantaim strongpela tingting mi tok, mi bai no inap long guria. ⁷ God Yawe, long gutpela pasin bilong yu, yu sanapim mi olsem strongpela maunten. Tasol taim yu haitim pes bilong yu, mi save pilim bikpela bel hevi. ⁸ Mi krai long yu, God Yawe na painim gutpela insait long yu, Bikpela bilong mi. ⁹ Wanem kain gutpela samting i stap insait long dai bilong mi, sapos mi go daun long matmat? Inap bai ol dai man i litimapim nem bilong yu? Inap bai ol tokaut long gutpela wok bilong yu? ¹⁰ Harim, God Yawe, marimari long mi na kamap helpim bilong mi. ¹¹ Yu bin tanim wari bilong mi i go long amamas, yu bin rausim sori klos bilong mi na karamapim mi wantaim amamas. ¹² Olsem na olgeta samting bilong mi bai litimapim nem bilong yu na i no inap stap isi. God Yawe Bikpela bilong mi, mi bai tok tenkyu long yu oltaim.