Song bilong Devit.
1
Long yu God Yawe, mi krai long yu, yu strong bilong mi na yu noken lusim mi. Sapos yu no harim mi, bai mi bihainim husat ol i go daun long matmat.
2
Harim krai na singaut bilong mi taim mi askim yu long helpim mi, taim mi hapim han bilong mi i go long ples holi bilong yu.
3
Noken rausim mi i go wantaim ol manmeri i no save mekim gutpela pasin na ol lain bilong mekim pasin nogut na husat i save toktok gut wantaim ol narapela lain tasol ol i gat pasin nogut insait long bel bilong ol.
4
Givim ol wanem samting pasin bilong ol i laikim long en na bekim ol les pasin bilong ol we i antap tumas. Bekim bek ol samting ol i bin mekim long ol pasin bilong ol na givim ol wanem samting ol bai i kisim.
5
Long wanem ol i no save gut long wok bilong God Yawe na ol wok em i bin mekim long han bilong em, em bai rausim ol i go daun na i no inap mekim ol i kamap ken.
6
Amamas na givim biknem long God Yawe long wanem em i harim askim bilong mi!
7
God Yawe em i strong bilong mi na ples hait bilong mi, bel bilong mi i bilip long em na em i save helpim mi. Olsem tasol bel bilong mi i save amamas moa na bai mi singim song na litimapim nem bilong em.
8
God Yawe em i strong bilong ol manmeri bilong em na em i ples hait bilong ol manmeri em i makim ol pinis.
9
Lukautim ol manmeri bilong yu na blesim ol na kamap wasman bilong ol na lukautim ol oltaim.