Song bilong Devit. ¹ Skelim mi, God Yawe, long wanem mi save wokabaut wantaim gutpela pasin. Mi save bilip long God Yawe na mi no save gat tupela tingting. ² Sekim mi gut, God Yawe na traim mi, traim mi long luksave long ol pasin nogut insait long bel bilong mi! ³ Ol stretpela promis bilong yu i stap long ai bilong mi na bai mi wokabaut long ol stretpela pasin bilong yu. ⁴ Mi no save pas wantaim ol man bilong giaman na mi no inap wok bung wantaim ol man bilong giaman. ⁵ Mi no save laikim ol man bilong bung na mekim sin na mi no save stap wantaim ol man bilong mekim pasin nogut. ⁶ Mi wasim han bilong mi na mi nogat asua. Mi save go klostu long alta bilong yu, God Yawe, ⁷ long singim ol song bilong litimapim nem bilong yu long olgeta gutpela wok yu mekim. ⁸ God Yawe, mi save laikim haus we yu stap long en na ples we strong bilong yu i stap long en. ⁹ Yu noken rausim mi i go wantaim ol sin man na ol man husat i save gat laik long kilim man, ¹⁰ ol man bel bilong ol i pulap wantaim tingting nogut na husat han sut bilong ol i save pulap long kisim ol hait samting bilong bagarapim ol narapela. ¹¹ Tasol long mi, bai mi wokabaut wantaim gutpela pasin na sori long mi na kisim mi bek. ¹² Lek bilong mi i sanap antap long stretpela graun na taim mi bung wantaim ol manmeri bai mi lotu long God Yawe.