Song bilong Devit. ¹ Long yu, God Yawe, mi hapim laip bilong mi i go long yu. ² God bilong mi, mi bilip long yu. Noken larim mi sem na noken larim ol birua bilong mi i amamas long daunim mi. ³ Larim husat i bilip long yu i noken sem na husat i no gat bilip long yu i mas sem! ⁴ Givim save long mi long rot bai mi bihainim, God Yawe skulim mi long rot bai mi wokabaut. ⁵ Lukautim mi long tok tru bilong yu na skulim mi, bilong wanem yu tasol yu God Yawe husat i bin kisim bek mi na mi save bilip long yu olgeta taim. ⁶ Singaut na tingim God Yawe, ol gutpela pasin bilong yu na ol promis yu save mekim. Ol i save stap olgeta taim. ⁷ Noken tingim ol sin bilong mi taim mi yangpela yet na ol bikhet pasin bilong mi. Singautim mi long tingim ol gutpela promis bilong wanem long gutpela pasin bilong yu, God Yawe. ⁸ God Yawe em i gutpela na stretpela olsem na em i skulim ol sin manmeri long gutpela rot. ⁹ Em i save helpim ol lain husat i daunim ol yet long gutpela pasin na soim ol long rot. ¹⁰ Olgeta rot bilong God Yawe i strong na i pulap wantaim pasin bilong laikim na pasin bilong wokabaut stret long ol lain husat i bihainim promis na lukautim gut lo bilong em. ¹¹ Long biknem bilong yu tasol, God Yawe, rausim olgeta sin bilong mi, em i bikpela tru. ¹² Husat tru dispela man i save pret long God Yawe? Bikpela bai i soim em rot we em yet i mas makim. ¹³ Laip bilong em bai i go kamap gutpela na ol tumbuna bilong em ol bai i kisim graun. ¹⁴ Pasin laikim bilong God Yawe em i bilong ol lain husat i stap aninit long em na em i save mekim tok promis i kamap ples klia wantaim ol. ¹⁵ Ai bilong mi i save stap long yu olgeta taim God Yawe, long wanem em bai i rausim lek bilong mi long umben. ¹⁶ Tanim pes i kam long mi na sori long mi, long wanem mi wanpela tasol na mi kisim bagarap. ¹⁷ Ol hevi long laip bilong mi i kamap bikpela tumas, kisim mi i go aut long ol dispela hevi! ¹⁸ Lukim ol hevi na pen na hatwok bilong mi na lusim olgeta sin bilong mi. ¹⁹ Lukim ol birua bilong mi, ol i planti tru na ol i no laikim mi wantaim gutpela bel. ²⁰ Lukautim mi na rausim mi long han bilong ol birua na noken larim mi sem long wanem yu tasol yu ples hait bilong mi. ²¹ Larim strongpela na stretpela pasin bilong yu i lukautim mi, long wanem mi bilip long yu. ²² Helpim ol Israel, God Yawe, long olgeta hevi na trabel bilong ol.