¹ Dispela graun na olgeta samting i stap long en i bilong God Yawe. Na ol manmeri bilong dispela graun ol tu i bilong em tasol. ² Long wanem em i wokim graun antap long solwara na mekim i kamap antap long ol bikpela wara tu. ³ Husat inap i go antap long maunten bilong God Yawe na husat inap sanap insait long haus holi bilong em? ⁴ Man husat i no save mekim sin na bel bilong em i klin na i no lotu long ol god giaman na i no save mekim ol tok giaman long ol promis em i mekim. ⁵ Em inap kisim ol gutpela samting na ol stretpela pasin i kam long God Yawe olsem em i helpim bilong em. ⁶ Dispela em ol manmeri husat i save painim pes bilong God bilong Jekop. Sela ⁷ Yupela ol manmeri, apim het bilong yupela i go antap tru. Yupela ol dua i stap oltaim i mas op na King i gat biknem tru em i ken kam insait! ⁸ Husait em i King i gat biknem tru? God Yawe, yu strongpela na yu bikpela, God Yawe, yu save strong tumas long taim bilong pait. ⁹ Yupela ol manmeri, apim het bilong yupela i go antap tru. Yupela ol dua i stap oltaim i mas op na King i gat biknem tru em i ken kam insait! ¹⁰ Husat em i king i gat biknem tru? God Yawe bilong olgeta lain em i King i gat biknem tru. Sela