Gutpela man bilong pilai musik.Song bilong Devit. ¹ God Yawe! King i amamas long strong bilong yu. Em i amamas bikpela tru long wanem yu bin kisim em bek ken! ² Yu givim pinis ol samting bel bilong em i laikim long en na yu no holim bek ol samting em i askim long maus bilong en. Sela ³ Yu kisim planti blesing i kam long em na yu putim kep long het bilong em ol i bin wokim long gol tasol. ⁴ Em i askim yu long laip na yu givim em, yu givim em longpela taim long stap oltaim oltaim. ⁵ Biknem bilong em i bikpela tru, long wanem, yu helpim em na yu givim nem na strong long em. ⁶ Oltaim yu save givim blesing bilong i stap oltaim long em na yu mekim em i amamas tru, long wanem yu stap klostu long em. ⁷ Long wanem king i bilip long God Yawe, long gutpela kontrak bilong God Antap we i no inap surik. ⁸ Yu bai holim olgeta birua bilong yu, han sut bilong yu bai holim husat i no save laikim yu. ⁹ Long taim yu belhat, yu bai kukim ol long bikpela paia i hat tumas. God Yawe bai bagarapim ol wantaim belhat bilong em na paia bai kukim na pinisim ol. ¹⁰ Yu bai bagarapim ol pikinini bilong ol long olgeta hap graun na tumbuna pikinini bilong ol namel long ol kainkain man. ¹¹ Ol i kamapim tingting nogut long bagarapim yu, dispela tingting nogut bilong ol bai i no inap kamap! ¹² Yu bai sutim ol wantaim spia bilong yu na ol bai tanim na go bek ken. ¹³ God Yawe, yu stap antap tru, long strong bilong yu, mipela bai singim song na litimapim nem bilong yu.