¹ " Sapos yu lusim heven na kam daun! Ol maunten bai i guria long pes bilong yu, ² taim paia i kukim ol diwai na i mekim wara i boil. Nem bilong yu bai kamap ples klia long ol birua bilong yu na ol kantri bai pret long stap long pes bilong yu! ³ Sampela taim i go pinis, taim yu mekim narakain samting em mipela i no tingting long en, yu save kam daun na ol maunten i pret long sanap long pes bilong yu. ⁴ Long bipo tru i no gat wanpela man i bin harim o luksave na nogat wanpela ai i lukim ol narepela God i wankain olsem yu i save mekim samting long em na wait long em. ⁵ Yu kam long helpim ol lain i save amamas long mekim stretpela pasin na i save bihainim pasin yu laikim. Yu save belhat taim mipela i mekim sin. Long pasin bilong yu tasol yu save kisim bek mipela. ⁶ Mipela olgeta i kamap olsem man i gat doti na olgeta stretpela pasin bilong mipela i wankain olsem rabis blut i pas long hap laplap. Mipela olgeta i drai wankain olsem ol lip bilong diwai na pasin sin bilong mipela i kamap olsem win kisim mipela i go longwe tru. ⁷ I no gat wanpela man i singaut long nem bilong yu na i sanap wantaim yu. Yu bin haitim pes bilong yu long mipela na yu larim ol sin bilong mipela i bagarapim mipela. ⁸ God Yawe, yu papa bilong mipela, mipela i olsem graun tasol, yu man bilong mekim sospen graun na mipela olgeta i kamap long han bilong yu. ⁹ No ken belhet God Yawe na noken tingim ol sin bilong mipela na birua long mipela, plis marimari long mipela ol lain bilong yu. ¹⁰ Ol biktaun bilong yu i save i stap holi nau i nogat moa man i stap na Saion tu i no gat man moa. Jerusalem i bagarap olgeta. ¹¹ Paia i bagarapim pinis naispela haus holi we ol papa bilong mipela i save go na givim biknem long yu na olgeta gutpela samting i bagarap na hat long stretim. ¹² God Yawe olsem wanem na yu larim mipela i stap olsem? bai yu lukim mipela i stap olsem na bai mipela i karim hevi?