¹ Lukim, wokman bilong mi, mi givim strong long em na makim em na mi save amamas long em. Mi putim Spirit bilong mi long em na bai em i kisim stretpela pasin i kam long ol manmeri. ² Em bai i no inap krai bikpela o singaut, bai ol man i inap harim nek bilong em long ol han rot. ³ Taim ol i nogat strong em bai i no inap larim ol i kisim bagarap, o taim ol i laik helpim em bai em i no inap larim ol i dai olsem lam i nogat oil long lait. Em bai bihainim olgeta stretpela lo bilong em. ⁴ Em bai i no inap les o brukim dispela stretpela lo inap em i mekim dispela lo i kamap bikpela long olgeta hap bilong graun, ol lain i stap long nambis tu i weit long kisim dispela lo bilong em. ⁵ Dispela em wanem God Yawe i tok, man husait i mekim heven na putim aut ples klia na man husait i mekim graun wantaim olgeta samting i save kamap antap long en na em dispela man husait i givim laip long ol manmeri na i givim laip tu long ol samting i save stap antap long en. ⁶ "Mi, God Yawe, i singautim yu na bai mi holim han bilong yu long wokabaut long stretpela pasin. Bai mi mekim yu i kamap olsem kontrak bilong ol manmeri na stap olsem lait namel long ol narapela lain manmeri, ⁷ long opim ol ai pas i lukluk gen na mekim ol kalabus man long haus kalabus i stap long tudak i go fri. ⁸ Mi yet mi God Yawe, dispela em Nem bilong Mi na ol gutpela bilong Mi bai Mi no inap skelim wantaim narapela o Biknem bilong Mi long ol god giaman ol man i wokim. ⁹ Lukim, ol gutpela samting i kamap pastaim, na nau mi laik tokaut long kamapim ol niupela samting. Bipo long ol dispela samting i kamap bai mi tokim yupela pastaim." ¹⁰ Singim ol nupela song i go long God Yawe na litimapim biknem bilong em long olgeta hap bilong graun, yupela ol lain i save ron antap long solwara wantaim olgeta samting i stap insait long en, na ol lain i stap long nambis. ¹¹ Larim ol manmeri long ples nating na ol biktaun i singaut strong na ol liklik ples i stap insait long Keda, singaut na amamas! Na ol manmeri i stap long taun Sela, yupela tu i singaut na singsing antap long het bilong maunten. ¹² Larim ol i givim biknem na glori long God Yawe na tokaut long gutpela pasin bilong em long nambis. ¹³ God Yawe bai i go olsem wanpela strongpela man bilong pait na em bai soim olsem em i belhat nogut tru. Yes, em bai singaut strong na mekim ol singaut bilong pait, long soim dispela strong bilong em long ol birua bilong em. ¹⁴ Longpela taim mi bin stap isi na mi holim mi yet bek, na nau bai mi singaut olsem meri i pilim pen long karim pikinini, bai mi soim belhat bilong mi na bagarapim olgeta samting. ¹⁵ Bai mi bagarapim olgeta bikpela na liklik maunten olsem samting nating na bai mi mekim olgeta diwai na ol gras i drai na bai mi mekim ol liklik ailan i kamap long ol bikpela wara na draim olgeta ol raun wara. ¹⁶ Bai mi kisim ol ai pas i go long rot ol i no save na wanem kain rot tu bai mi i go pas long ol. Bai mi i go pas long ol na kamapim lait namel long ol insait long tudak na bai mi stretim ol rot i no stret. Bai mi mekim dispela ol samting na mi no inap givim baksait long ol. ¹⁷ Tasol, Ol lain husait i save bilip long ol piksa ol man i wokim long han na tok "Yu god bilong mipela," ol dispela kain manmeri bai i sem nogut tru. ¹⁸ Harim, yupela ol iyau pas na yupela ol ai pas bai yupela i ken lukim. ¹⁹ Husait i ai pas tasol em i wokman bilong mi? O iyau pas olsem man bilong karim toksave bilong mi i go? Na husait i ai pas olgeta olsem man i mekim kontrak wantaim mi, o ai pas olsem wokman bilong God Yawe? ²⁰ Maski yupela lukim planti samting, tasol yupela ino inap save, ol iyau bilong yupela i op tasol yupela ino inap harim. ²¹ God Yawe i amamas long man i save bihainim olgeta stretpela lo bilong em na mekim lo bilong em i kamap gutpela olgeta. ²² Tasol ol dispela manmeri ol birua i kisim ol i go na bagarapim ol na putim ol insait long hul bilong graun na kalabusim ol long haus kalabus, nogat man inap long helpim ol na tok, "Bringim ol i kam bek!" ²³ Namel long yupela husait bai harim gut ol dispela tok? Na husait bai bihainim dispela tok long nau na bihain taim tu? ²⁴ Husait i givim Jekop long han bilong ol stilman na ol Israel long han bilong ol man bilong bagarapim ol? Ating em ino God Yawe, husat yumi bin sin long em, ol pasin bilong em yumi les long bihainim na ol lo bilong em yumi sakim? ²⁵ Long dispela as tasol na em i kapsaitim belhat bilong em long ol na larim ol i bungim hevi insait long pait, belhat bilong em i olsem paia i raunim ol, tasol ol i nogat gutpela save na paia i laik kukim ol, tasol i no kisim tru long bel bilong ol.