¹ Tasol nau God Yawe i tok olsem, em yet i bin wokim yu, Jekob na em yet i bin wokim yu, Israel. ''Yupela i noken pret long wanem mi bin kisim bek yupela pinis. Mi kolim nem bilong yupela na yupela i bilong mi. ² Taim yu brukim ol wara, mi bai stap wantaim yu na ol wara bai i no inap karamapim yu. Taim yu wokabaut namel long paia bai em i no inap kukim yu na tang bilong paia bai ino inap bagarapim yu. ³ Mi God Yawe, God bilong yupela, Em i Holi God bilong Israel, Helpim bilong yupela. Mi bin givim Isip olsem pei bilong baim bek yupela, Kus na Seba olsem senis bilong yupela. ⁴ Yu dia tumas na narakain long ai bilong mi, mi laikim yu, olsem na bai mi givim ol manmeri long senisim yu na arapela ol man na bai yupela i kisim ples bilong ol. ⁵ Noken pret, long wanem mi stap wantaim yupela. Bai mi kisim ol pikinini bilong yupela i kam long hap san kamap na hap san i go daun na bungim yupela. ⁶ Bai mi tokim hap bilong not olsem, 'Kisim ol i kam long mi,' na long hap saut, 'Noken holim wanpela i stap long hap, ' long olgeta hap graun kisim ol pikinini man bilong mi i stap longwe i kam na ol pikinini meri i stap longwe hap graun i kam. ⁷ Olgeta man husait i kolim nem bilong mi. Em mi bin wokim ol long kisim biknem bilong mi yet. Long husait mi wokim, yes mi mekim ol. ⁸ Kisim ol ai pas manmeri i kam, maski ol i gat ai na ol yau pas i kam, maski ol i gat yau. ⁹ Olgeta kantri i bung wantaim na ol manmeri i stap wantaim. Husait inap tokaut klia long yumi long wanem ol samting bai i kamap bihain? Ol i ken kisim ol witnes bilong ol i kam bai yumi save olsem ol i tok tru, ol manmeri bai harim na tokaut olsem, 'Em i tru.' ¹⁰ Yupela i witnes bilong mi,'' God Yawe i tokaut, ''Na wokman bilong mi em mi makim pinis, olsem na bai yupela i save na bilip long mi na save olsem mi dispela God. I no gat wanpela god i stap paslain long mi na bai i no gat wanpela god i stap bihain long mi. ¹¹ Mi, Mi yet God Yawe, i no gat wanpela man bilong kisim bek yupela, Nogat, em mi tasol. ¹² Mi bin tokaut, mi bin kisim bek na mi bin autim tok olsem, i no gat narapela god i stap namel long yupela. Yupela ol witnes bilong mi, ''God Yawe i tok, ''Mi tasol mi God. ¹³ Long nau long dispela dei na i go, Em Mi Yet mi stap na nogat wanpela man inap rausim yupela long han bilong mi. Na husait inap sakim strong bilong mi na stopim mi?'' ¹⁴ God Yawe i tok olsem, Man bilong kisim bek yupela em God Holi bilong Israel. ''Long yupela tasol mi salim ol soldia i go pait long Babilon na olgeta i ranawe na amamas bilong ol Babilon i tanim kamap sori na krai. ¹⁵ Mi God Yawe, mi God Holi, mi kamapim Israel, mi king bilong yupela.'' ¹⁶ God Yawe i tok olsem, mi i mekim rot i kamap long bikpela solwara, ¹⁷ Em i kisim ol karis na ol hos, ami na ol bikpela lain ami. Ol i pundaun olgeta na i no inap kirap gen, ol i olsem lait bilong lam i go daun na i pinis. ¹⁸ ''Noken tingting moa long ol samting i kamap pastaim na ol samting i kamap bipo. ¹⁹ Lukim, nau bai mi kamapiml nupela samting nau em i stat long kamap, yupela i no lukim? Mi bai mekim rot i kamap long ples nating na ol wara bai ron long ples nating. ²⁰ Ol wel abus bilong ol hap graun bai i givim biknem long mi, ol wel dok na ol bikpela pisin, long wanem, mi save givim ol wara long bik bus na ol wara i ron long ples nating, bai ol manmeri bilong mi i dring, ²¹ mi wokim ol dispela manmeri bilong mi yet olsem na bai ol i litimapim biknem bilong mi. ²² Tasol Jekop, yu no bin singaut long mi, Israel yu les pinis long mi. ²³ Yu no kisim wanpela sipsip bilong yu i kam long mi na mekim ofa bilong paia i kukim olgeta na lotu long mi. Mi no askim yupela long givim mi ofa bilong wit na givim hevi long yupela long ol ofa i gat gutpela smuk smel. ²⁴ Yupela i no baim kanda i gat gutpela smel long moni, yupela i no givim mi gris bilong abus olsem ofa bilong yupela, tasol yupela i givim hevi long mi long ol sin na pasin nogut bilong yupela. ²⁵ Yes, Mi Yet i save rausim ol pasin nogut bilong yupela long biknem bilong mi na mi no inap moa tingim ol sin bilong yupela. ²⁶ Toksave long mi gen long wanem samting i bin kamap. Yumi mas stretim tok wantaim na bai mi save olsem yupela i nogat asua. ²⁷ Nambawan papa bilong yupela i bin mekim sin na ol lida bilong yupela i no bihainim lo bilong mi. ²⁸ Olsem na bai mi mekim ol pris i kamap doti, bai mi mekim Jekop i bagarap olgeta na ol bai tok bilas na daunim nem bilong Israel.''