¹ Long taim bihain Nahas, king bilong ol manmeri bilong Amon i dai na pikinini man bilong em i kamap king na i kisim ples bilong papa bilong en. ² Devit i tok, "mi bai soim gutpela pasin long Hanu pikinini man bilong Nahas, long wanem papa bilong em i soim gutpela pasin long mi." Olsem na Devit i salim man bilong kisim tok i go soim olsem em i tingting yet long papa bilong em. Wokman bilong Devit i go long graun bilong ol Amon na kamap long Hanu, long mekim gut long em. ³ Tasol ol pikinini bilong king long Amon i tokim Hanun, "Yu ting Devit i onarim papa bilong yu long wanem em i salim ol man long mekim gut long yu? Yu noken larim ol wokman bilong em kam long yu long luksave na painim aut long kantri bilong ol inap long kam na bagarapim yumi?" ⁴ Na Hanun i holim pasim ol wokman bilong Devit, katim maus gras na katim sot ol kolos bilong ol klostu long bel, i go antap long as mit bilong ol na salim ol i go bek. ⁵ Taim ol i go tokim Devit long ol dispela pasin, em salim tok i go long bungim ol, long ol dispela man i sem nogut tru na hait. Na king i tok, "Stap long Jeriko inap ol maus gras i kamap bikpela na yupela i ken kam bek." ⁶ Taim ol Amon i lukim olsem ol i mekim Devit i bel nogut, Hanun na ol Amon i salim 1,000 kilo silva mani i go long ol Aram long baim ol karis na ol man bilong sindaun long hos bilong Naharaim, Maka na Soba. ⁷ Ol i baim ol 32,000 karis na king bilong Maka na ol ami bilong em, olgeta i kam na bung klostu long taun Medeba. Na ol Amon i bungim ol yet wantaim long biktaun bilong ol na kam aut long pait. ⁸ Taim Devit i harim dispela tok, em i salim Joap na olgeta ami bilong em long bungim ol. ⁹ Ol man bilong Amon i kam autsait pinis na wokim lain bilong pait klostu long dua bilong biktaun, taim ol king husat i kam i stap ol yet long ples bilong pait. ¹⁰ Taim Joap i lukim ol i wokim lain bilong pait na putim pes i kam pas na bihain, em i makim sampela ol gutpela man bilong Israel na i makim ol long pait wantaim ol Aram. ¹¹ Tasol long olgeta ol arapela ami, em i larim ol i go long han bilong brata bilong en Abisai na em i putim ol long lain bilong pait wantaim ol ami bilong Amon. ¹² Joap i pasim tok olsem, "Sapos ol Aram i strong tumas long mi, orait yu Abisai i mas kam na helpim mi. Tasol sapos ol ami bilong Amon i pait strong tru long yu, orait bai mi kam na helpim yu. ¹³ 'Sanap strong, na larim mipela soim mipela yet olsem mipela i gat strong bilong ol manmeri bilong mipela na long biktaun bilong God Yawe, olsem God Yawe inap wokim wanem i gutpela long ai bilong em." ¹⁴ Olsem na Joap wantaim ol ami bilong em i strong moa long pait wantaim ol Aram, long mekim ol i pret na ranawe long ami bilong Israel. ¹⁵ Taim ami bilong Amon i lukim olsem ol Aram i ranawe pinis, ol tu i ranawe long Abisai brata bilong Joap na i go bek insait long biktaun. Olsem na Joap i lusim ol lain bilong Amon na i go bek long Jerusalem. ¹⁶ Taim ol Aram i lukim olsem ol Israel i winim pait, ol i salim tok long sampela moa soldia i kam olsem long wara Yufretis, wantaim Sofak ofisa long ami bilong Hadatesa. ¹⁷ Taim ol i tokim Devit long dispela ol samting, em i bungim olgeta lain Israel i kam wantaim long brukim wara Jodan na ronim ol. Em i makim ol ami long pait wantaim ol lain Aram na ol i pait wantaim em. ¹⁸ Ol Aram i ranawe long ol Israel na Devit i kilim 7,000 Aram soldia i kam long karis na 40,000 soldia i wokabaut long graun. Em i kilim tu Sofak man i go pas long lukautim ami. ¹⁹ Taim olgeta arapela ol king husat i wokman bilong Hadatesa i lukim olsem ol Israel i winim pait, ol i kamapim wanbel wantaim Devit na helpim ol lain bilong en. Olsem na ol man bilong Aram i no moa laik long helpim ol Amon.