¹ Bihain long dispela taim, Devit na ol ami bilong em i go pait wantaim ol Filistia na i winim ol. Em i kisim taun Gat wantaim ol ples i stap klostu long en na rausim long han bilong ol Filistia. ² Na bihain em i winim ol Moab na ol lain Moab i stap aninit long Devit na givim takis i go long em. ³ Bihain Devit i winim Hadadesa, king bilong Joba long Hamat taim Hadadesa i wok long go long kisim graun i stap arere long wara Yufretis. ⁴ Devit i kisim 1,000 karis bilong em na 7,000 soldia i sindaun long hos na 20, 000 soldia bilong wokabaut. Devit i bagarapim lek bilong olgeta hos na i larim 100 tasol bilong pulim ol karis. ⁵ Taim ol Aram bilong Damaskas i kam bilong helpim Hadadesa king bilong Joba, Devit i kilim 22,000 man bilong Aram. ⁶ Bihain, Devit i putim sampela soldia bilong em long Aram bilong Damaskas na ol Aram i stap aninit long em olsem ol wokman na i givim takis i go long em. Long wanem hap em i go pait, God Yawe i save helpim Devit long winim pait. ⁷ Devit i kisim ol hap plang long ol ofisa bilong Hadadesa, em ol plang ol i wokim long gol na i kisim i go long Jerusalem. ⁸ Devit i kisim planti bras tru long Teba na Kun em ol biktaun bilong Hadadesa. Bihain Solomon i kisim dispela bras na i wokim bikpela dis ol i kolim ''Solwara'' na ol pos na i wokim ol narapela samting long bras. ⁹ Taim Tou, king bilong Amat i harim olsem Devit i winim olgeta ami bilong Hadadesa king bilong Joba, ¹⁰ Tou i salim Hadoram, pikinini man bilong em i go long Devit long tok amamas na givim presen long em. Em i mekim olsem long wanem, Devit i pait wantaim Hadadesa na i winim em na tu Tou i bin pait wantaim Hadadesa. Tou i salim planti presen ol i wokim long gol, silva na bras i go long Devit. ¹¹ King Devit i makim ol dispela samting bilong God Yawe wantaim ol silva na gol em i bin kisim long ol kantri olsem Idom, Moap na ol lain bilong Amon na ol Filistia na Amelek. ¹² Abisai, pikinini man bilong Seruia i kilim 18,000 man bilong Idom long Ples daun i gat planti Sol. ¹³ Em i putim ol sampela soldia bilong em long Idom na ol lain Idom i stap aninit long Devit olsem wokman bilong em. Wanem hap Devit i go pait, God Yawe i save helpim em long winim pait. ¹⁴ Devit i bosim olgeta hap long Israel na em i mekim gutpela na stretpela pasin long olgeta lain bilong em. ¹⁵ Joap, pikinini man bilong Seruia i stap namba wan kepten bilong ami na Jehosafat, pikinini man bilong Ahilud i lukautim buk bilong gavman. ¹⁶ Sadok, pikinini man bilong Ahitub na Ahimelek, pikinini man bilong Abiata i stap pris na Safsa i stap olsem kuskus. ¹⁷ Benaia, pikinini man bilong Jeoiada i bosim ol lain Keret, Pelet na ol pikinini man bilong Devit i stap olsem ol nambawan ofisa klostu long king.