¹ Bo bainti bano baura, bira autu Nikotimasirabe tuba. Biba Parisi bainti bano baiharo Juda iata bainti bata bauba. ² Bi baintiba bo enta'i Ihu binaini aniro tiharo, "Nora bainti baubo, tenabu tabaura are iata bainti banobe, Kotiba ai atitaiba tubuarababe. Nanahikae are mintiana'a tenabu tabauro, biba kiama nai bihaikra mintitirio Kotiba kia bikantiro baibaro." ³ Ihuba Nikotimasira tibamiro tiharo, "U'ai'akema ai tibamuro, bainti bano kia anirantero arakai'a biraba, kiama biba Kotira Batuka'i ori etanarobe." ⁴ Nikotimasiba bira irero tiharo, "Nantiakeroe bainti bano arakai'a buanarobe, biba noru'a biro? Biba hoe e'a nai nora auha'i ori'etairo, anirantero e'a batakanarobe?" ⁵ Ihuba bira tibamiro tiharo, U'ai'akero, bainti bano Aiho'a bata namai'a bata, kia arakai'a biraba kiama Kotira Batuka'i ori etanarobe. ⁶ Nanahikae baata bano obara taira, bira baata bano irabe, nanahikae Aiho bano obarai'a taira, bira Aiho bano irabe. ⁷ Te bi ubara tiaira kia are rabukubuane, are arakai'ama buane.' ⁸ Ubai bano taie bireba tira minima bibaibo. Are bira aubai'aima irinabe, iboma kiama are tabera taihairoe aniro, taie buainara. Boha ariroma baibo bainti tabae Aiho'a arakai'a buaina." ⁹ Nikotimasiba bira irero tiharo, " Bihaikaba nantia keroe obarai ianarobe?" ¹⁰ Ihuba bira anirantero tibamiro tiharo, "Are Isireri batana iata bainti banobe, mintibama nantibae bi haikarara te tura are kia kankoiaro." ¹¹ U'ai'akema ai tibamuro, tenabu nanahikae u'ai'ake tabauna hikarama tenabu tibauro, nanahikae tentanabu tabauna birama tiba o'ai'uro. Iboma nanahikae tenabu tuna kiama ne bira'a mara'ura utuabo. ¹² Mintima bataihaina hikara te tiai kia ne mara'ura utiraiti, nantiakee te narubai haina hikara tiai ne mara'ura utibarabe? ¹³ Kiama bo bainti bano bata narubaini orubibo, iboma bainti tabae narubaini hairo tubiba, biba Bainti Baiinti banobe. ¹⁴ Haru Moseba umina batana memaru babi arataira, boha'arina okarara'ama, bika bainti baiinti hiri tebarabe. ¹⁵ Mintira eka bainti nahenti tukae bira'a mara'ura utika, bika eka enta eka enta bai mara'urara barebarabe. ¹⁶ Kotiba bo'akero ma batraihaina bainti nahentiara antu'arubo, biba nai ma'u bohai'a tinabu timura. Mintiro bainti tabae bira'a mara'ura utiraba biba kia kaka'ianarobe, kiabe, biba eka enta bariaina mara'urara baranarobe. ¹⁷ Kotiba nai ma'u barakobaro ma batarai tubira kia biba bainti nahenti ko nimiane tiro barakobaro tubiraube, kiabe biba bika ntitareba tubirabe. ¹⁸ Bainti bano Kotira Ma'u'a mara'ura utiraba ,kiama biba kaka'ianarobe. Iboma bainti bano kia bira'a mara'ura utiraba, biba kaka'iama bibo, bira nanare, biba kiama Kotira ma'u bohau bira autu'a mara'ura utibo. ¹⁹ Ko okara mintiroma baibo, atairaba ma batarai tubi manta. Bainti nahenti konkira hikara'i antu'ariha ataira hikara kia antu'aruara. Bira nanare, bika okara bano orai'ama ibo. ²⁰ Eka bainti ora okara minti baika, bika atairara popohake kia atairara'a anireka. Bira nanare, bika tabebe nai ora okara bano a'ira'a obarai'a buaina bika birara etakebe. ²¹ Iboma, bainti u'a okara minti bariaka, bika ataira'ama bariabo, hinikiaka bata tabe tiha Kotira antu'ama abatabo tibarabe." ²² Bihaikaba obarai'ura bira nantiara, Ihura batake bira kai'a bainti Judiaini bura. Biba bikara hampata baiharo bainti nahenti namai a'u nimitebaura. ²³ Joniba bata Aikonia batuka aumanto Salimini bainti nahenti namai a'u nimite baura, bira nanare airu namai mini baubaro. Bainti nahenti biraini anubaro biba bika namai a'u nimitebaura. ²⁴ Bi entara Joniba kia karabuhi'i birai tiro. ²⁵ Ibaro bo tirorira bano Jonira kai'a bainti abutana bata bo Juda bainti abutana obarai'ura, namai tuntunkeha baria bantaraini. ²⁶ Bika himpi Joni binaini bi tiha, Iata bainti baubao ti, Bainti tabae Jodan namai hini batarai baiba, are birara tinabu tiba timiana, biba eka bainti nahenti namai a'u nimite baumanta eka bainti nahenti bibinanima bibariabo." ²⁷ Joniba bika anirantero tibaniro tiharo, "Bainti bano kiama bohika baranarobe narubai haina Kotiba kia bira amiro. ²⁸ Ne nentama tababo nana uba te ni tiba nimuna, "Te ni tiba nimi tiha Te kia Karaitikaube tunara, "te mintiakema ni tibanimuro, te bira abuni tuburaukabe." ²⁹ Bainti tabae natabati'a biraba, biba'ima bi nahentira bati barianarobe. Iboma bati'a bina baintira ana'obano, himpiro uaharahika'a mpi'ama buanarobe bainti bano bati'iaina ubara iriro. Bi haikaba mintiakabo ti auha bano uaharahika'a mpi'ama bibo. ³⁰ Bira autu bano bo'abata uribiro, Ti autu bano tubibuaire. ³¹ Bainti tabae narubaini hairo tubiba, biba eka bainti atara kaibabe. Bainti tabae bataihainaba, biba bataini hainababe. Mintiboma biba bataihaina hikara'ima tibarianarobe. Bainti tabae narubaihai tubiba, biba eka bainti atara keroma baibo. ³² Biba tireba nahika biba iriro tabaina bi haikarama tianarobe. Mintumanta bainti biba uba tura'a kia mara'ura utuarabe. ³³ Iroma bainti tabae bi ubara'a mara'ura utiraba, biba tiba o'ai'akero u'a Kotirabema tianarobe. ³⁴ Mintibo Kotiba bi baintira barakaibo tubiba, biba Kotira uba tibaurabe. Bira nanare, Kotiba nai Aiho bira amibo bira'i u'ai'ake mpi'a bibabe. ³⁵ Bainti bano Kotira Ma'u'a mara'ura utiraba, biba eka enta eka enta ko'ebi bai mara'urarama baranarobe, iro bainti bano bira Ma'u uba rauhairaba, kiama biba mara'ura baranarobe. Kiabe, Kotira arara'itara hika banoma bikantiro barianarobe."