¹ Parisi irubaro Ihuba airu bainti bara nai kai'a bainti'a kero biba airu bainti namai a'u nimiteharo Jonira kai'a bainti bata atarakora. ² (Iboma Ihuba kiama nai bainti namai a'u nimitaibo, bira kai'a bainti bikama bika namai a'u nimitabo.) ³ Biba Judia batuka a'irakero Kariri batuka bura. ⁴ Biba Sameriani abutana nuba'iro bura. ⁵ Biba Sameria batukaini orurora, Bika auturareka Sikainibe tianaini. Biba baireba Jekopuba nai ma'u Josepira ami batara aumanto baura. ⁶ Jekopura huri namai mini baura. Ihuba anibaro kia kekau baubaro, biba bi huri namaira aumanto ani o'ubiro baura. Bira 12 kirok bero'ata. ⁷ Sameria nahenti bo bano namai ka'areba anubaro, Ihuba bira tibamiro tiharo, "Are namai timi'e te nare tiro." ⁸ Bira kai'a bainti Sameria batuka kara ko'ai'ireka bubaro. ⁹ Sameria nahenti bano Ihura tibamiro tiharo,"Nantibae are Juda bainti bano ti Sameria nahentiara tiha namai timi'e nare tiaro?" ¹⁰ Ihuba anirantero tiharo, "Are bate Kotira paresen tabera are ta baintiba ariara tiharo, namai timi'e nare tira tabarera. Bira irairo biba ai mara'ura bai namaira amitiri." ¹¹ Nahenti bano bira anirantero tibamiro tiharo, " Nora bainti baubo, are kiama paketi bataroma, huri namai bano bebanto'irama baibo. Are taihairae mara'ura bai namaira barenabe? ¹² Are tinabu oora Jekopura bata atara karabae iaro, biba bi huri namaira tinabu timiro nai baintiti bata kau bata timi manta tenabu bi huri namaira'ima ka'a nebauro." ¹³ Ihuba bira anirantero tibamiro tiharo, "Eka bainti taukae bi huri namaira'i naika bika aunta bano aharu'ama buanarobe, ¹⁴ iboma tabae bi namaira te amiaina namaira nairaba kiama bira aunta bano e'a bata aharu'a narobe. Iboma namai te amiairaba, biba huri namai bo'arama bira'i barianarobe, bi namaiba eka enta baiharoma bira eka enta ko'ebi bairiaina mara'urarama amianarobe. ¹⁵ Nahenti bano bira tibamiro tiharo, "Nora baubo, are bi namaira ti timiane, timi'e nairo ti aunta bano kia aharu'ai'e te kia e'a bata namai ka'are orurante aniare." ¹⁶ Ihuba anirantero nahenti tibamiro tiharo, "Oru nena baati bata bitakera orurantera ma'a aniane." ¹⁷ Nahenti bano bira tibamiro tiharo, "kiama te baati bata batauro tubaro, Ihuba bira tibamiro tilharo, "Are u'ama tiaro are kiama baati bataro, ¹⁸ Bate 5-nabuma ai baati bariabo, bate are barate bariana kia bira ai baati aube, ai uba bano u'ama baibo." ¹⁹ Nahenti bano bira tibamiro tiharo, Nora baubo, bate te tabauro are poropeti banobe. ²⁰ Tinabu okabara ma a'inara'a mono'i bariarabe, mintima ne tiha, Jerusaremi batuka bainti nahenti mono'i barabe tiabo." ²¹ Ihuba bira tibamiro tiharo, "nahenti baubo, are ti'a mara'ura utuane, bo entabano anira, kiama ne ti Ora'a mono'ireka ma ai'inara'ae o Jerusaremini bata mono'i barabe. ²² Ne mono'i bariara ne kia tabahikara'ama mono'i bariabo, tenabu mono'i bauna tenabu tabauna hikara'ma mono'i bauro. Bira nanare, bainti nahenti bitate ti kai'aba Juda batanakaini'ai anirabe. ²³ Mintiboma bi entaba aniro bate aniraibo, eka bainti nahenti ti Ora'a u'a okara'a bata Aiho bainti'a batama mono'i barabe. Ti Oba mintia bainti nahentika bira'a mono'ia terama rante baibo . ²⁴ Kotiba nai Aihoha banobe bainti nahenti bira'a mono'ireka, Aiho'a bata u'a okara'a batama mono'i barabe." ²⁵ Nahenti bano bira tibamiro tiharo, "Te tabebe, Mesaiaba anianarobe (bira autu rareka "Karaitirabe tiaba"). Biba tubiro, ekahikara tinabu tibama timianarorabe." ²⁶ Ihuba bi nahentira tibamiro tiharo, "Te ma bikama aikanti uba tibauro." ²⁷ Tumanta bi entra'i, bira kai'a bainti orurante anura. Bika airu abuato barebaura bira nanare biba nahenti batakero uba tibaumanta, mintumanta bo bainti bano bata kia bira ira mitero tiharo, "are nanare antu'aruaro?" o "Are nanahare bikantira uba tibariaro?" tura. ²⁸ Mintubaro bi nahentiba nai namai ta'u a'irakero, anirantero tauni'i biro, buru bainti nahenti tiba nimiro tiharo. ²⁹ Ne ani bo bainti tabate. Te nanahika mintuna biba tiba o'ai'ama kaibo. Bi baintiba Karaitibama ianarobe?" ³⁰ Tumanta bika tauni a'irake bibinaini anura. ³¹ Bi entara kai'a bainti bira tibami tiha, "Iata bainti baubo, are kara nane." ³² Tubaro biba bika tibanimiro tiharo, "Ti kara baibo bi karara kiama ne tababo." ³³ Biba minti tumanta bira kai'a bainti nai abutana raireha tiha, "Auriro bo bainti bano kara barero bira buru amianarobe?" ³⁴ Ihuba bika tiba nimiro tiharo, "ti kara baireba, tabae ti atitaimanta te tubuna te bira antu'a abatakema bira kai'a tai'a karabe. ³⁵ Kia ne tiha, '4-toranabu bairoma kara bano a'utanarobe tiate?' Te ni tiba nimuro, ne iata tuaherake naho'ira tabate, kara bano a'utema bibo. ³⁶ Ta baintibae kara anti bairaba, biba nai ko'a bareharoma eka enta mara'ura bariaina karara ruba'i baibo, mintiboma bainti tabae kara uti bairaba bata kara anti bairaba bata, bikahanta bohama uahebarabe. ³⁷ Mintiboma bi ubaba u'ama baibo, bo bano uti tairoma bo bano antua narobe. ³⁸ Te ni atite kara antuate tuna kia ne kai'a barata nahora'iauma ni atitauro. Nai boka kai'a baratara bika to'abu'a hinara ne uminama kara anti barabe." ³⁹ Airu bainti nahenti Sameria tauni ihai bira'ata mara'ura utura bika bi nahetira uba iri, "Nanahika te mintuna biba tiba o'ai'ama kaibo tumanta." ⁴⁰ Mintumanta Sameria batanaka bibinaini anuka, bira ireha tiha tara enta nabu bata tinabu batakera bariana ti tura. ⁴¹ Airu bainti nahenti bira uba iri mara'ura utura. ⁴² Bika bi nahentira tibami tiha, "Kia tenabu ai uba iriauma mara'ura uturo, kiabe, tenabu nai bira uba irima tenabu tabauro, nai bi baintibama eka bainti nahenti ma batarai hainauka bitairababe." ⁴³ Tara enta aitarobaro, biba mini a'irakero Karirini bura. ⁴⁴ (Ihuba nai tiba o'ai'akero tiharo, poropeti bano kiama nai baata okara'ira autu baibo.) ⁴⁵ Biba karirini anumanta, Karirini batanaka biba anirara uahora. Bira nanare bika bata nora mono Jerusaremini tunaini bi oru tabobo ekahika biba bi entara minti baumanta. ⁴⁶ Ihuba e'a anirantero Kana tauni'i Kalili bura, bi batukara'i baka biba umina namai ka'akero waini namai bo'ara tu'anta kaira'i bura. Kinira kai'a bainti bobano, bira ma'u bano Kapenia tauni'i baiba robara baraibo. ⁴⁷ Bi baintiba irumanta hinikiaka tiha Ihuba Judia batuka kero Kalilinima tubibibo tubaro, biba Ihu binaini orubiro bira irairo bira ma'u bano inantaka utubire'ina a'i himpi kaire tiro. ⁴⁸ Ihuba bira tibamiro tiharo, "Are kia bo'ari bo'ari mirikorira tabairera, kiama are mara'ura utinarabe. ⁴⁹ Kinira kai'a bainti bano biba tibamiro tiharo, Nora bainti baubo, maini tubira ti ma'u tabane, biba utubuantorabe." ⁵⁰ Ihuba bira tibamiro, "Are buane ai bainti bano a'ima barianobe." Biba Ihuba uba tira'a mara'ura utiro,biba bura. ⁵¹ Biba aarana otubibaumanta, bira kai'a bainti aarana uri bira tibami tiha, "Ai ma'u bano kiama utibo a'ima baibo." ⁵² Biba bika irero tiharo, nana entae bira aiha bano tai'aibo? tumanta, Bika bira tibami tiha, "Enta 1-kirokima aiha bano bira a'ira kaibo." tubaro, ⁵³ Bira oba iriro tiharo bi entaura'a Ihuba tiharo, "Ai ma'u bano a'ima barianobe tiro Ihuba tura anirantero nai irura."Mintibo biba Ihura'a mara'ura utimanta eka bira pamari bata bira'a mara'ura utura. ⁵⁴ Ihuba Judia a'irakero Karirini aniro e'a bo mirikori bata minturama.