¹ Umanti kipavim anekai, Polimi wayami dami beni disaipoli yuka'i yema amonago yanti. Bemi manta akeuyi karem naemi avoguge siremi Masedonia bemi. ² Bemi maside ayapa, novemi bemi sima yimakuku wata anasi akeuyi karem naemi bemi Grisi. ³ Wami kamorem biyomi yakagami mini ayapa'i, Judayu'i namugoyi uakami sipi maremi Siria magafa biranti. Minimi beyi intiru wayedemi yerademi Masedonia biranti. ⁴ Sopeta Pirasi Beria kanomi; Aristakas ya Sekondasi; yimakuku wata ganti Tesalonaika kemi, Gaiusi Debikemi. Timoti ya Tikikasi, Trofimasi Esia kemi benampa bemo Esia'i. ⁵ Ugami mini watayu ananta bemo Troasi minifa seyuya sive evem wage'emi. ⁶ Seyuya Filipai yera deya anekai sigonimo marasim buwam wayawam inte inte'i kanagai. Boti yomareya beya Troasi'i fawareya mofom faifi'a (5) wa'yawami, Troasi'i seveni'a(7) wa'yawami wage'eya. ⁷ Wikimano amanta wayawami, masideyu yema duwantu uveya sigoni kidiranti manafim, Polimi Kotimi waya sewami ayufu awamagi emi, nayeyara yera yiremi mana'a wayawami boviranti. ⁸ Mini rumu yan afa wapimi yema duwantu eya mofau, nesu ramumi waga'em. ⁹ Poli waya sevem wami, mana fumara wata ben avi'i Yutikasi kumantemi windo aga'i, ma'anomi ka yanta'i wawemi. Polimo waya dirifewem wami, dufamemi mente kamore rumufike merapake yanafake magaga kuma fugemi. ¹⁰ Polimi ben amuga kuma wawemi kuma ayafa uremi fakemi. Yiyimemi semi "yigemi yira umanti bu ogo, bemi bufugemino, fami bemino". ¹¹ Naemi Poli yeradem naupa untavemi sigoni kidiremi nemi, enawa yenampa waya sewami maro sagemi, yera yiremi bemi. ¹² Yemi yira faru nampa, yimo yantapimi wage'emo mini fumara aga'i fa wami. ¹³ Seyuya Polimi yera areya sipi mareya oma anari eyamo fau Asosi'i, me'e minifa Polimi seyuya nampa sipifimi dauntatemi minimi Polini intitino nayeyara, bemi magafi bira intir ruka. ¹⁴ Asosi'o yema simonemi, seyuya nampa daunta weya sipifimi Mitaileni beyamofau. ¹⁵ Minifa'i botifim daunte yamofau, ena waya wami me'a afapa'i Kiosi ailani beya mofau, ena wanurami, ena magu Miletusi beyamo fau. ¹⁶ Polimi inte inte evemi botifimi bemi Efesasi yakaga remi naye yara, bemi Esia bu waranti eva. Naye yara, kana inamotemi ame'uremi Jerusalemi oravemi Pentikosi waya wami anona ranti. ¹⁷ Miletusi'i watayu yiyikami Efesasi bemi yinom wata mono ma'ano yema bemi amonago yanti. ¹⁸ Be waka yeravomi, mani sirem yiyimemi semi, yige nana'o intagami, ananta nurami Esia'o simo kampama dauna semi siye nampa wage'eu. ¹⁹ Sesi intiru daunam kumi'i ano namanoni yoganti suga'i anonampa, nesu umanti amone'u naye yara, Juda yu'i siriranti waya antau maka. ²⁰ Yige nana'o intagam semi mana'o anene yerade fakare'i mana yanta'i yiyime'i mini avogu anene amaka yigemi yofa inanim, nayemo yiyimuna magu fawa mana mana yigenyi naupa. ²¹ Yige intaga semi Juda akunanti Griki yu'i yira'i wayedega Kotipa anomanoka yimakuku ogo Jisasimi. ²² Magemi amonago, Ayo aga'ano mini'ise Jerusalemi bote'u, naemo seka'o fawarinami bu intagau. Me'a afapa'i. ²³ Ugami Ayo aga ano sima fawaremi semi masidem magufimi seniwa uma wa'i seve evem bemi. ²⁴ Ugami, semi inta naumi seti wantanomi bu avogu yantaganta semi bu ugeu, ugafo semi yoganti semo anona Jisasini awa awa ganti. ²⁵ Magemi amona, semi inte'i maside yuka yiwa napa'i siyime'i Inaru yanti seti sorasi'i enawa bu amona nago. ²⁶ Ugami, mage mana wayawami, semi yigemi yiyime'i be'i semi sayeke mana wayini naremi bemo afi'inai. ²⁷ Naye yare, semi mana yanta'i bu ayofadukau, bumi, maside Kotini ayiru'ia'i masidemi yiyimidukau. ²⁸ Ugafo yigega dafima soke ogo, sipisip yu'o Ayo aga ano uyademo yenti dafisiru ogo, avogu urega mono mapim wam sipisipi yu, mini akumo, yemi beyi nare nako meyam uga. ²⁹ Semi intarukau semo yerade'o bowonami savi afa iyanu ano yigen yiwanapa yeravemi sipisipi yu'i ifa bu yiranayo. ³⁰ Semi intarukau mana'a akumi yigen yiwanapake nesu nesu bu atekananim waya siremi disaipoli yu'i iyemi awakurogo yanti. ³¹ Minu gafo yigemi dafima soke ogo, yigemi intago waya wam ba ayufum ba, kamore kirisimasika, semi saumi bu darukau yigemi yiyimi ranti masiden yanta'i suga anonampa'i. ³² Magemi yigemi Kotimi ame'u beni awa awa, mini mano yigemi manta akeurau na'i bemi amaka yiminani wata anasi Kotimo uya rukayi. ³³ Semi silva yanti antu budurukau, goli yanti a'a mana wayini unam wado yanti. ³⁴ Yige nana'o intagami mana siya mano semi sofaino yoganti yogemi. Senampa wayimi. ³⁵ Masiden yantapimi, semi yimidukau amami yigemi yigatire'i anene bu dukayi yoganti erarure bu marana yoyimi yigemi intanago anona Jisasini wayami. Wayami senana'o seu "anene enomo amewayini amoyinta ena ewami, anene mo mare wayimi ena ewa. ³⁶ Mini waya sewami mini anta yanti, be orasi'i magafimi demi yenampa augam mukemi. ³⁷ Polimi yema ayafa uremi amonaremi ifi'i dagemo. ³⁸ Yigunanti uakemo intamo semo, se torasi'i bu amonanago enawa'i, naemi bemi avigemi botifim magu dami botifimi dauntavemi bemi.