¹ Bena fuginani Sori avoguc araci maremi. Micnuremi Sori kugandemi Yerusaremi maguginkac bagenim mam maguc anankayomi bemi. Macdem birivican inimbaintauc Yudia baga Samaria maguginkaci dakacde iyayoni aposoriuc mánan minigac bano. ² Kotin kim yindun munkugam baintauc Stiveninan anon yigun anecne mandeni, kunic ure masiceno. ³ Sori mam mac anankayirani emi. Beni mana mana mac kinkac umpecemi banta anasi difitaman mapa demi, yivigem maro karavusigin demi. ⁴ Micnevani minivar iye indini 0birivican inimbaintauc miniginkac yeukeni mam baya siyimevano. ⁵ Filipi mana taoni gimi, Samaria kumbemi Jisas Kraisinan siyimemi. ⁶ Amucna inimbaintauci Filipi siyimevam bayauc avogugic ureni indeno. Mána indintaci beni indeni, yeni enacugan anecneuc uvarevani oneno. ⁷ Amucna inimbaintauc Manda spiritiuc amucna inimbaintau kim bageninuc bacdureni fasapac acdeno, amucno yigan yiyam fukan inimbaintauc baci yiyofa yinkemi. ⁸ Micnini, mini taoni gin anon yimusimi mareno. ⁹ Afo mána bainta bami, beni Saimoni bemi, beni acnantapac manda spiriti gimi erar avucavaguc uvarevami, mini anecneuc uvarevami Samaria inimbaintauc yigan dani, benani avic dukam baintaino sevano. ¹⁰ Amucno, yivic iye dukan inimbaintauc bac yivic dukan inimbaintauc bac ben kimi yeyic indin dukeni, seni, "Maná bainta i Kotinic anon erani dukemino." ¹¹ Beni mini erar anecneuc iyakaci uvarevami, yemi yigan devani, ben avaya indevano. ¹² Afo Filipi avoguc baya Kotinic inarum magu namac Jisas Kraisin avic namagani banta anasi siyimini indire birivic ureni, nom mareno. ¹³ Saimoni beyac baci birivic emi, nom maremi, beni Filipi namaci bagemi. Filipin onami enacugan avucavaguc uvarevami, bemi anon agami demi. ¹⁴ Afo Yerusaremi magusinkena aposoriuc indeni Samaria inimbaintauc Kotinic baya mandani, yeni Pita nuc Yoninuc siyinkani yena vapaci kumeno. ¹⁵ Yeni kundaeni, Ayo Inta marago vani yugam muku yinkeno. ¹⁶ Yeni Iyeno Jisas Kraisin avic kimi nom mána manyinkarami, Ayo Inta yen naroc iyen yevami. ¹⁷ Afo Pita nuc Yoninuc nuc yen naroc yiyan deni yugam muku yinkarani Ayo Inta mareno. ¹⁸ Afo Saimoni yonani aposoriuc banta anasiuc kac yiyan dan kinke Ayo Inta marami, beni monoc yimemi. ¹⁹ Beni semi, "Mini eran sembac simego, seyandac micnurec iyen inimbaintauc kagafi siyan dana amankac Ayo Inta marago." ²⁰ Afo Pita bemi samemi, "Ecanan enic monoc enamac oyogano, nevaraino, eni Kotinic gifti monoc po ayac irani indanamino. ²¹ Eni mána yogandac managin iyen duke, mána anecne managin eninda vac iyem bemino, nevaraino, en anduni Kotin namaci iyen anteckemino. ²² Minugemifo, en anduntim benim manda avucavagan andun baecdevaci, Iyenompac ogam mukurananaci beni en andun mararan ayeninuc manda indiruc amankac utuc ankano. ²³ Emi onaunami en anduntim manda indiruc uvikagaya, iye anteckan anda gimi karavusic uganamino." ²⁴ Saimoni bemi yevegen samemi, "Iyenompac ogam muku sinkaranaci, ena sena anecneuc senkac iye ampamino." ²⁵ Pita nuc Yoninuc nuc Iyenonic baya afotagic ure siyimicdeni, Yerusaremi magusapac yevege beni, mam baya Samaria maguginkac siyime beno. ²⁶ Afo Iyenonic enyoro Filipin samemi, "Ukuke sautifac, Yerusaremi fate Gasa kumban asapagaci bono." (Mini ani kacmac magafaci bemi.) ²⁷ Beni ukukem oraen onami, mána Itiopia bainta kuinic yogaric emi, beni kuin agagntimi bemi, anon avic dukemi kuinic monokac dafita minigac bami, Yerusaremi magusimi man sirani yevagemi. ²⁸ Beni beyic karisi gimi kumantemi yevegem bemi, profetiuc Asaianic yoginken yandevami. ²⁹ Ayo Inta fililpimi samemi, "Mini karisi acdekac orae ukukano." ³⁰ Afo Filipi iyayen minigac oraen, indevami profet Asaianic yoginken yandevami, bemi indaemi semi, "Ena yandana eni indi igac efono?" ³¹ Bemi yevegen samemi, "Mána bainta iye sisiminage, inkenic uregaci seni indi ic onuno?" Beni Filipin araman dami, benamac karisi gin un kumandemi. ³² Mini Itiopia bainta afan yogim mánán yandevamino, "Bemi sipisipi gacnaci arirani avige benone, beni sipisipi gacnaci ayo akecyevam bainta ogampaci nanayugemi bemi, micnami beni avandac iyen osafemino. ³³ Bemi onaman mandaic uankareni iye anteckan koci siankeno. Ben anavasinanuc icnaen yinayouni iyeci benani siyimintenafino? Nevarai, bemi máná magagakena bena ayum fa bani sipaci marenone." ³⁴ Afo mini Itiopia bainta Fililpimi indaemi, "Seni en indairare, eni sisimeno, iyenaraci mini profeti senafino, beyararaci senafino, haca enonaraci senafino?" ³⁵ Filipi bemi kugandemi Jisas Kraisinic avoguc baya gaken samem bemi. ³⁶ Yekanda ayana bageni, nom bankaci yeraomi mini Itiopia bainta semi, "Onano, máná minin nomi bemino. Sena nom maranami, ne anecneci semi uyagantenafino?" ³⁷ (Feyan afan yogim mánágac iyem bemino.) ³⁸ Afo mini Itiopia bainta beyic karisi minigac maro fakemi. Yekanda nonkin kundaeni, Filipi bemi nom marankemi. ³⁹ Yekanda non kinke fasapac acde undaomi, Iyenonic Ayo Inta Filipin enafac yo avigem bemi. Mini Itiopia bainta bem bac iyen onemi, ecemi anon amusin kimi beyic asapac bemi. ⁴⁰ Afo Filipi Asotus magusac oraemi mini gacke mini magafac yeukemi mam baya macden iyena taoni ginkac siyimen yagemi Sisariaci yeraemi.