¹ Yicnom prisi bemi indaemi, "Mana bayauc fugac seyafono?" ² Stiveni yemi siyimemi, sifactiva unan namac sentifo unan, kapinagegaci sen tivaya indego: Kotinic erani yigeunamac sifo, Abrahemin kaci afotagic emino, beni Mesopotamiac bemi, Harani magusapac iye ovami. ³ Koti bemi samemi, 'ey ankunuc namac eyic maga namac yere ece sena yocaganuna magafagac bono.' ⁴ "Icnaemi beni Kaldia magafac yere ecemi Harani magusimi ovami, minigac bami, ben afo fucimi, Koti bemi avigemi managac yemino, mage yigena bam magagage. ⁵ Koti bemi mini maga iyen amemino, iyeino, sitoc maga aravac agan dananinic ugam bac iyen amemino. Abrahemi am bac iye dukami, Kotin bemi promasic uankemino micnuremi, bemi mini maga ben namac ben anvasinuc icnaen yinayou yiminan yen yindaic ino vani samemi. ⁶ Koti bemi macni siremi samemi, ben anavasinuc sito kac ena magafac sito kac ovami, mini magafateno yemi karavusic urani fayan yogam baintaic ugami 400 orandegaci mandaic uyinke bantenone. ⁷ 'Afo Israeriuc yenyic yogaric uyinkeyon magafatenoni koci yimentecumpe,' Koti micni semi, 'afo icnaemi yeni miniginke fasapac yeraeni mana magugimi sen kac man sintenone.' ⁸ Afo icnaemi Koti yife yinda akecyan lo Abrahemin amemi, micnurami Abrahemi Aisakin afoic uemi 8 nuran yankagaimi ben afe anda akecyemi, Aisaki Yekopin afoic imi afo Yekopi 12 yicnom baintauc yifoic emi. ⁹ Nevarai, yicnom baintauc manda indiric Yosepin uankareni, bemi Isipi magafac fayan yogam baintaic ino vani ayac urani, sankami bemi, micnenofo Kotin benamaci bemi ¹⁰ benic macden umantinke ayayemi. Beni Yosepin avacbac namac avuguc indin namac Fero, Isipiu yic kin ogampac, amicdami, bemi Isipi magafaci kavanaic uankaremi, umacdem beyinda anecneuc kaci dafic ankemi. ¹¹ Afo umacden Isipi magafac namac Kenani magafac anon yarani yimi, anon manda ampamimi, mayau sifo unam amankac yunan afakanayon ayac iyen bami. ¹² Afo Yekopi indimi Isipic witi va raisi va antiviriuc bami, beni yenamac sifo unami siyinkani beno. ¹³ Afo yevege bon kimi, Yosepi bey afacava unam facbaruremi beni iyec benafi siyimemi, Yosepi ankunani Feron agankac bimi indemi. ¹⁴ Yosepi bey afacava unami siyinkani yevege orae Yegopin maro samina, macdem bey ankunuc, 75 inimbaintauc namac Isipic bino vani siyinkani beno. ¹⁵ Afo Yekopin namac mayau sifo unan namac Isipi kumbeni fugeno. ¹⁶ Yemi kandauye Sekemic, Abrahemi silva monoc po Hamonin agafandaupate ayac uram bamasic kimi maron masic eno. ¹⁷ "Afo promasic uranin yamuc yevami, mini promasi Koti Abrahemin uvar ankarukagenimi, Isipi magusim banta anasi anon uvikaric eni amucnaic eno. ¹⁸ Micne vami ena kin ukukemi, Isipi magusin dafisemi, mini kin Yosepi nandac iyen indigami. ¹⁹ Beni mayausic banta anasi umac siyinkemi, mayau sifo unan yirure mandaic uyinkemi, mage macdukan inta agaguc mandan afotagic urana yiruman fugirani yivankevami. ²⁰ "Mini yamuc kimi Mosasim magemi. Beni Kotin ogan kac anon avogugic ugam bami ben afon amac kimi kandac manavac igona gaci dafisevano. ²¹ Afo bemi doye mapac marogun dami, Feron aramum mandemi bey agagic uremi dafisevami anonic emi. ²² Mosasi masicden Isipi magusinkena avoguc indirukimi siguru maremi, afo benic yogantim bac ben avaya gim bac anon erani dukami. ²³ Afo beni 40 orandeic uimi, bey afacava unam, Israerin anavasinuc yonananin indini ben andutim yemi. ²⁴ Beni onevami Israeri bainta arurem mandaic uankevami, Mosasi ben kafaruremi Isipi bainta aruman fugemi. ²⁵ Beni indimani ben afacava unan omare indintenone Koti, ben ayan kimi, yemi yiyayevani, yeni omare iyen indeno. ²⁶ Mini nuran yankagaimi ena nurami Israeriuc vapac oraen onani ye yiran yiruami, beni yekanda managim bago vani macni siremi siyimemi, 'Mana baintaugo, yige untavani bamino, ne gafaraci yige yiran mandaic egafono?' ²⁷ Afo agona mandaic uankenim bainta Mosasi avekaman nenkac demi samemi, 'Iyec emi dafisiric uankarenaci bendegac yasi ic ono siankarukaya fono? ²⁸ Eni nuran Isipi bainta aruman fugonaic ure sem bac siruman fugirara fono?' ²⁹ Mosasi mini baya indiremi dakacden iyayemi, beni Midia magafaci maro anamuruic ugagemi, minifaci kantar intauc yifoic emi. ³⁰ "40 orande yankagaimi Sainai Anuic fayan magafaci, uc iga gen oyarevan kimi mana enyoro benkac ye afotagic emi. ³¹ Mini iga Mosasi onarami, bemi agan dami, acdekac oraen onaran bevami mana ameni Iyenon ofenke yemi, semi, ³² 'Seni enafo unanyic Kotim beci, Abrahemi na Aisaki na Yegopi uyic Kotim becumpe.' Mosasi mini baya indirami anon andiremi ouc dundun imi ena yacbac onananinic iyen emi. ³³ Iyeno bemi samemi, 'Ey agantinke sendori ayucman fasapac dano, ena banagaci anteckan magagac ukukaganamino. ³⁴ Isipi magusim sentic banta anasi umana marami seni fuga sirec onecumpe. Seni yenyic ifici indireci, yen yiyayirani kumecumpe, mage yeno, seni sankana eni Isipici binonamino.' ³⁵ "Mana Mosasimi yeni yicnaen amenone, yeni macni sireni, ''Iyec emi dafisiric uankarenaci yasi ic ono sirukaya fono?' Mini Mosasim manan Koti dafisiric uankaremi yevegen yivigan baintaic urami Isipic karavusi ginke yivigen yemino. Koti bemi uc agac kin Mosasin kac afotagicin enyoro ayan kimi demi sankami bemino. ³⁶ Mosasi amucna mirikoriuga, ena ugan avucavaguc Isipi ga Koran non kina fayam magafac 40 orandegac uvaragen demi Isipi magusinke yivigemi mapac acden yemino. ³⁷ Mini Mosasi manan Israeri inimbaintauc siyimemino, 'Kotin mana profetin yigen yifacyiva unan kinke, sen kacnac ugami ukukaman dantemino.' ³⁸ Mana bainta manan afac kacmapac Sainai Anugac enyoro benamac a semino, beni yigeunamac sifo unan namac bagemino, beni ayum fa van baya yigeunamac simirani maremino. ³⁹ "Afo mayau sifo unam ben avaya indirani, bemi avekaman nenkac deni, Isipigani yevege indenone. ⁴⁰ Mini yamu kimi yeni Eronin sameno, 'Mana kotin acnaric uen yenamac sivigem binanin uvan sinkano. Nevaraino, mini Mosasin Isipi magusinke yenamac sivigem mapac acden yemino, yenamac iyen indigecumpe, ne anecne benkac ampankenafino.' ⁴¹ Micnugami yeni mana burimaka agac aman uvandeni ofa mini aman amicdeni, yeni yimoyeno, nevarai, ye siyampo uvantan anecne vani. ⁴² Afo Koti acnaen yimicdemi, ecani inarunkakena bayo gac man siankeno, micni siremi profetin yic yo gin santemi, 'Israeri inimbaintaugo, yigeni 40 orande gac afac magafac nogegon kinkac ofa mare simevaga fono? ⁴³ Yigeni mana yirac kaci deci Morekin namac kot Refaninic bayoic seri gac mam maga, amanuc yige yuyampo uvandukanuc man siyinkarani maramino, micnugaci seni yigemi doyec Bebironi vac yankageci maro yinkantecumpe.' ⁴⁴ "Yenamac sifo unami serigac mam maci fayam magafac dukagenone, oganic ugan Kotin Mosasin eram baya ginke samenimi, beni afan dac amam bac oneninic ugan uvarano vani samemi. ⁴⁵ Mini seri mac mayau sifo unam manareni Yosua namac mini maga mande yeyindaic ureni Kenani magagin umpegeno. ''Afo mayau sifo unam yugan kaci, mandemi anecne mini inimbaintauc yenyic maga ginke yivakundemi, mayau sifo unami yenyindaic ureni yimemi. Mini seri mam mac fananan bagemi Devit banin kaci yeraemi. ⁴⁶ Afo beni Kotini ayini afakemi, beni amankac mana magu Yegopinic Koti bananin mac uvarankarani indaemi. ⁴⁸ "Micnurami, Iyeno beni yanic ugan Koti bemi beni banta yiyampo uvandam mac kinkac iyem bemino, micni siremi profeti sirukamino, ⁴⁹ 'Iyeno micni semi, inarum magui, sentic kinic sia ino, afo magai seni sigan deguna gac ino. Inkenic ugam magac yigeni ugan sinkararaci segafono? ⁵⁰ Sen siyam macdem mana anecneuc iye uvarenafino?' ⁵¹ "Yigeni baya aran inimbaintam bamino, yigeni yige yindura yaganuc kackena yindauc iyen akecyarukamino, yigeni ecami Ayo Inta beyic yogan iye maremino, mini avucavaguc yigena uvarami, feyugam yigen yifo unam uvarageyonic ugami amino. ⁵² Inkenic profetiugaci yigen yifo unam mandaic iye uyinkeyafono? Yigen yifo unami acnantapac bana yageyon profetiuc yirevanone, mana Anteckam Bainta iye yigani, micnugaci mage yige yacbaci bantauc yivcman namugouc yiyan kin damino, minifoni yigayaci bemi aruman fugamino, ⁵³ yigemi enyorouc lo mandan yimeci maramifo, yigeni mini lo iyen fakamino." ⁵⁴ Afo kansorouc mini bayauc indirami yirac ampicrarani Stivenin anon yiran anecne marankeno, ⁵⁵ micnami Stiveni Ayo Inta, benkin uvikagami, beni inarumpac maron onemi, beni Kotini erani onemi, Jisasi Kotin ayan ugampaci ukukagami beni onemi. ⁵⁶ Stiveni semi, 'Onago, seni onaunami inarum ona diyimi, Banta Ayac kotin ayan ugampaci ukukagemino." ⁵⁷ Minigac kansorouc yagan kac yiyan uyac deni erarure bacdureni, umacde iyaye manacyaci Stiveni bankac oraeno. ⁵⁸ Stivenin fakareni difite taoni ginke mapaci marogun deni onacban arami banta anasi minigac ukukage onageni, yeni yeyic yagetiuc ayucdeni mana fumara agantimi yere reno, ben avici Sori i. ⁵⁹ Afo Stivenin onacban arami beni Iyenon araremi semi, "Iyeno Jisasi o, sentic ayo inta marano." ⁶⁰ Beni agon noyan kac kundaemi bacdureni semi, "Iyeno o, yenyic mana anda yenkac. iyevac fakano. "Beni micni siremi, fugemi.