¹ Afo Sori, fani eram bayauc siyinkemi Iyenonic disaiporiuc bac yiruman fugirani sevami. Beni yicnom prisi bankac oraemi ² afan yo Damaskasic mam mac kinkac kena uvandan amino vani indaemi. Beni iyenafi onanama Iyenonic ana avakurevan, anasifi haca bantafi fakaren yivigen Yerusaremi yirani indaemi. ³ Beni ayana bagemi, Damaskasic acdekac oraimi anducdimi mána on inarumpate eran karic em bemi yeukemi. ⁴ Beni magagac yanden kumben indimi mána ameni bemi samemi, "Sori o, Sori o, eni nagac eci semi mandaic usinkefono?" ⁵ Afo Sori bemi yevegen samemi, "Iyeno o eni iyec befono?" Iyenonic bemi samemi, "Seni Jisasi bauna, eni semi mandaic usinkanamino, ⁶ ece eni ukuke iyena taoni gin umpegano, minigimi emi ne anecnefi uvaranovani samintemino." ⁷ Benamac bom baintauc ukukagami ayac iye sinayonic imi, amenanan indeno, mayam bac iye onani. ⁸ Sori magagake ukukemi, beni ogam magemifo, mána anecne vac iye onani, yeni ayam bacna fakareni avige Damaskasic beno. ⁹ Beni kandac mánavac nurami ogam bac iye onani bemi, beni yunana nonuc iyen nemi. ¹⁰ Mána disaipori ben avic Ananaiasi bami beni Damaskasi magugimi bami. Bemi Iyeno kainkaci samemi, "Ananaiasi o!" Beni semi, "Iyeno o, seni máná minin becumpe." ¹¹ Iyeno bemi samemi, "Ukuke, Anteckane sire avic dan a sac, Yudasin amakac oraevaci mána Tarsusi kena bainta ben avic Sori narac indaono, beni ogami mukem bemino. ¹² Beni kainkaci onevami mána bainta ben avic Ananaiasi yeraemi benkac ayan demi, amankac beni yevegen onano vani micnemi." ¹³ Ecemi Ananaiasi bemi yevegen samemi, "Iyeno o, mini bainta vani amucno fate indecumpe, beni Yerusaremi magusin enkac birivic an inimbaintauc yiruremi mandaici uyinkevamino. ¹⁴ Beni yicnom prisiuc pate eran mandemi en avic dan inimbaintauc karavusic irani fakaman devamino." ¹⁵ Afo Iyeno bemi samemi, "Bono, nevaraino, sentic yogam baintaic ino vani bemi avigecumpe, mapac inimbaintauga, kinuga, Israeri inimbaintauc kinkaci beni senani siyimen yeukintemino. ¹⁶ Nevaraino, sen sivigan nacuman anavisigafi marananimi seni bemi yocagantecumpe." ¹⁷ Afo Ananaiasi yereren oraemi mini mac afakaremi, beni mini mackim umpegemi. Bey ayam benkac demi bemi samemi, "Sifactiva Sori o, Iyeno Jiasasi, asapac yanama enkac ye afotagic eni, eni amankac yevege ogan onevanana enkin Ayo Inta uvikano vani semi sisinkac yecumpe." ¹⁸ Micni sevami eseci Sorin ogampenke noyac anda gacnac ugan anecne kugufami yevegen onemi, beni ukukemi nom maremi. ¹⁹ Beni disaiporiuc namac manaca nurami Damaskasi magugim bagemi. ²⁰ Eseci beni kungandemi Jisasinan Kotin agage siremi Yudauyic mam mac kim siyimemi. ²¹ Iyeuyafi inden inimbaintauc yigan dani, yeni seno, "Mana baintaci mini avic dan inimbaintauci Yerusaremi magusin yirurem mandaic uyinkagenifino? Beni managac yenimi banta anasi fakaren yivigen yicnom prisiuc pac birani yemino. ²² Micni sami Sori mam baya siyimintim anon erani maram bemi, Jisasinan Kraisi ino siremi siyimevani Damaskasic ban Yudauc yirac arevano. ²³ Icnaemi amucna nuran yankagaimi, Yudauc ben arirani baya uyeno. ²⁴ Micni sire opac uvaram baya Sori bani indemi. Yeni ben arirani bayankona namac ayufun namac anon kugu onagac dafisevano. ²⁵ Micnami benic disaiporiuc ayufumi avige anon kugugac maro reni basgeti gimi ugicdami magapac kumemi. ²⁶ Beni Yerusaremi magusin yeraemi, Sori disaiporiuc namac managinic irarini, yeni ben agani fegeni, bena disaipori ic uganani iye birivic eno. ²⁷ Afo Banabasi bemi avigemi aposoriuc bankac maro remi, siyimemi, inkenic urenaci Sori asapac Iyenon onaranaci, Iyeno benamac asenafi, beni inkecnic urenaci Damaskasic Jisasin avic kim iye fegan eran namac siyimageninu gani siyimemi. ²⁸ Beni yenamac bemi, Yerusaremi maguana umpecen acduen evami. Beni eran namaci Iyeno Jisasin avic kimi siyimemi, ²⁹ Griki baya san Yudauc namaci baya foni aruevani, micnevani ben aruman fugirani aniyogevano. ³⁰ Afacava unam mini van indireni, bemi avige Sisariac marogun deni sankami Tarsusic bemi. ³¹ Mini anecne ampamini, macdem mam maguc Yudiaga, Gaririga, Samaria maguginkac nanayin baric ugeni maro erar eno. Yeni Iyenon agan fegeni Ayo Intaic avacbac kim bami, amucna inimbaintauc yindun bageno. ³² Mini yamuc kinkaci Pita macdem mini amampac yeukagemi, beni Lida taoni gim baci Kotin kim birivic an inimbaintauc yonarani kumumi. ³³ Minigimi beni mána bainta ben avic Aeneasin onemi, beni afac kandac manavac omandan orande gaci beyic sagoc kin dugem bami, beni agar ayam fukami bagemi. ³⁴ Pita bemi samemi, "Ainiasi o, Jisasi emi ayofemino. Ukuke eyic sagoc uvarano," micni sevami eseci ukukemi. ³⁵ Micnini, amucna inimbaintauc Lida magusim bac Saron magusinke mini bainta onareni yeni Iyenon kin yindun baegeno. ³⁶ Afo Yopa magusimi mána disaipori inini bami ben avic Tabita (mini avic Griki baya fac baecdanami "Dokasi" nen sinteno) bagemi. Mini inini avoguc avucava benkin uvikagami, irocan inimbaintauc yivacbac uyinkevami. ³⁷ Mini yamuc kinkaci beni ac anecne maremi fucini, yeni ben o sesecuankareni, yan amugapac ban rumu gimi maron dami bami. ³⁸ Lida magu Yopa magu acdekaci bami, disaiporiuc indemi Pita minifac bani, yeni kantan bainta ganda siyinkani orae, ben avankeni seno, "Iyakac iye beva yenamac baunafac agagae yeno." ³⁹ Pita ukukemi yenamac bemi. Beni minigac oraini, yeni avigeni yam ban rumu gimi ureno, kentoc ininanuc ben acnagac ukukageni ific deni, Dokasi yenamac ayum fa ben andukuman dagenim bacdouc bemi yocageno. ⁴⁰ Pita mini rumu ginke macde siyinkani mapac kundaomi, beni agon noyankac kundaemi, ogam mukemi, ben o vapac yo baegemi, beni semi, "Tabita o, ukukano." Afo beni ogam macdemi, Pitan onemi beni ukukaman kumandemi. ⁴¹ Pita ben ayan kac fakaremi ayanocman yanic uman demi, beni Kotin kim birivican inimbaintauc namac kentoc ininanuc namac yaraman dani undaomi, bemi ayum fa bami yemi yimemi. ⁴² Mana mini baya Yopa magusinkac ben yen ini, amucna inimbaintauc Iyenon kaci birivic eno. ⁴³ Afo Pita amucna nurami Yopa magusim Saimoni namac bagemi, beni safura andauc kac anecneuc uvarevam bainta bagemi.