¹ Mini anecneuc Apolosi Korinic bami ampamemi, Poli yampac magafac yankagen yemi Efesasi taoni gin yeraemi, manaca disaipori minigim bami yonemi. ² Poli yemi indaemi, "yigeni birivic omi, Ayo Inta marega fono?" Afo bemi yevege sameno, "Iye ino, yenamac Ayo Inta van iyevaci indigecyamumpe." ³ Poli semi, "Neginac yigeni nom maregafono?'' Yeni seno, "Yoninic nom manyinkantimino." ⁴ Poli yevegen siyimemi, "Yoni banta anasi nom manyinkami, yindun baecde Kotin avakurogo vani nom manyinkemino. Beni banta anasi siyimemi, yeni amankac icnaen yinanin kac birivic ogo, beni, Jisasi ino." ⁵ Banta anasi mini indireni, yeni Iyeno Jisasin avic kim nom mareno. ⁶ Afo icnaemi, Poli yen yicnon kac ayan demi ogam mukurami, Ayo Inta yen naroc yeraini yeni ena ena baya ginke a seni, profeti bayauc sevano. ⁷ Amankac 12 baintauci nom mareno. ⁸ Poli kandac mana vac igonagaci mam mac kin umpecemi eran namaci siguru banta anasi fuga baya namac Kotinic inarum magu namagani siyimevami. ⁹ Afo manaca Yudauc yirac erarureni baya iye indini, yeni Jisasin avakuran andaugani manda bayauc banta anasi yugampac sevano. Micnami, Poli yemi yere yinkaremi, disaiporiuc yivicmanaremi Tairanusi siguru yimevan rumu gim maro rukemi birivi ic anda ucbacdemi siyimevami. ¹⁰ Mini kantan orande gimi micnom bevami, micnvani maside Esia magusim ban inimbaintauc Yudauc namac Grikiuc namac Iyenon avaya indeno. ¹¹ Koti enac ugan avucavaguc Polin ayan kaci uvarevami, ¹² micnimi ankisipi namac yimuc patena badouc Polin ayogaurani maro yic inimbaintauc kac dani yiyofan marami, manda spiritiuc baci yenkinke acdevami. ¹³ Afo manaca Yudauc manda spiritiuc siyinkaman karucdauni mini ginkac yeukevano. Yeni Iyeno Jisasin avic darana, yenkin eran yeraina manda spiritiuc siyinkarani yeni, macni seno, "Mini Jisasin avic Poli daremi semi, Seni emi samecumpe, fasapac acdono." ¹⁴ Mana yicnom prisi ben avic Skiva, beni afac kantan omandan intauc dukani yeni micnevano. ¹⁵ Mana manda spiriti yemi yevegen siyimemi, "Seni Jisasin onageci, seni Polin onagecumpe, afo yigeni iyeuga fono?'' ¹⁶ Manda spiriti mini bainta ginke karusacem mini baintauc naropac oraemi yenyic eran davacuremi manda yandaci yiremi. Yeni mini mac kinke bacdo yigec iye vani, yirugan yifuruc namac mapac acdueni, dakacde iyayeno. ¹⁷ Mini anda ampaminani masiden Yudauc namac Grikiuc, Efesasi magusapac ban inimbaintauc mini baya indeno. Yenkin anom fegan yini, Iyeno Jisasin avic anan yani eno. ¹⁸ Amucna birivi inimbaintau baci manda andauc namac yena manda avucavac uvarageyonuc siman facbareno. ¹⁹ Amucno ban yogaric ageyon inimbaintauc baci yeyic afan youc mandareni mare managin baguyureni, macden inimbaintauc yugam kaci iga sareno. Yeni benic uman yandare onami 50 tauseni silva monoci bami. ²⁰ Micnimi, Koctin avaya eran namaci masidempac benyen emi. ²¹ Icnaemi, Poli beyic yogan Efesasi magusim kiparemi, Ayo Intaic eran poni Masedonia magusin oraen Akaia magusinke yankagen Yerusaremi birani indemi, beni semi, "Seni Yerusaeremi magugim bageci icnaemi Romi magafac biric anan ontecumpe. ²² Poli kantan yogam bainta ganda, Timoti nuc Erastusi nuc siyinkani Masedonia beno. Afo beni yevegemi manaca nurami Esia magafac bantemi. ²³ Mini gake yemi sitoc umandac Efesasi magusin Jisasin avakurin avucavagan iyem bami. ²⁴ Mana bainta ben avic Dimitriusi, beni silvau kac aneneuc uvareva bemi, beni yenyic Koti Atemisin aman uvaremi, monoc uvaran yogan mini anecneuc uvaran baintauc mare yimemi. ²⁵ Minugami, beni masidem mini yogaricam baintauc mandan managim baguyuremi siyimemi, "Bantaugo, yigeni indigamino, mana yogan tinken yigeunamac anom monoc uvarecumpe. ²⁶ Yigeni onareci indemino, Efesasi magafac ànavaino, macden Esia magafaci mana Poli amucna inimbaintauc yirac baecman ena asapac demino. Beni semi, mana koti vac yiyam po uvandukan koti iyem bemino. ²⁷ Yigeunamac monoc uvareguna asapac anava uyagantena ino, yigeunamasic koti Atemisin avic bac erar iye vanami, benic iyena onaman fayar anecneici intenone. Yigeunamac masicden Esia magafac bac mana magagac bac ben kac manan man senone. ²⁸ Yeni mini baya indirami, yiran anecne uvikani, bacduman acnureni seni, ''Atemisi, Efesasiu yic Iyeno ino.'' ²⁹ Masiden mini taoni ginkena inimbaintauc amucna indiric ureni, yeni mana indintac ana beni managin iyayeni iyaran mac kim manan umpegeno. Yeni Poli namac yoga nom bainta ganda fakaman deno Gaiyusi nuc Aritakusi nuc, yeni Masedonia fate yevano. ³⁰ Poli mini inimbaintauc yicbanac kin umpegarar imi disaiporiuc umocduankeno. ³¹ Afo Esia magafate manaca ofisauc yeni ben agandauc afan yo gim baya uvandeni bemi sameno, mini iyaram mac kin iye umpegano vani umocduankeno. ³² Manaca inimbaintauc mana anecne van bacdure sami, manaca ena anecne van semi, mini foni anasi banta yicnonuc anana ini, amucna indiric eno. Amucna inimbaintauc nevarac ye baguyeyafo yeni iyen indigano. ³³ Manaca inimbaintauc Aleksendan indir ameno, bemi Yudauc aveke baguyugam baintauc yugampac beno. Micnami Aleksenda ayan yanic uremi avavec emi, mini inimbaintauc kapinagana macni siren siyimiman amandarani. ³⁴ Afo yeni ben onami, Yuda bainta vani, macden inimbaintauc bacduman acnureni seni, "Atemisi Efesasiu yic Iyeno ino" mana yimentac deni micni se vami, igona amun kantar awa yankagemi. ³⁵ Taoni ginkena kuskusi mini inimbaintauc mandan nanayuman demi, siyimemi, "Yigeni Efesasi baintaugo, inkenic baintac iye indirukenafino Efesasi taoni iyena Atemisinic mam mac banare, afo ben aman onacban inarumpate yanden kumbeninare?" ³⁶ Yigeni mini anecneu gani indigamifo, yigeni agagaurec mana manda anecne iyevac yemi uvanyinkago. ³⁷ Yigeni mana baintauc koc kac yivigec mare dukamino, yeni mam mac kinke mana anecne umor iye mareni, yigen yic anasi kotim manda baya iyen siankenone. ³⁸ Micnugami Demetriusi namac silva gac anasi koti Atemisin uvaram baintauc namac yeni iye namagaci umaruc dukeyafo, koc onauc digami kamanin avantac koc indam baintauc minigim benone. Ecayaci yenafo yeyic umaruc koc kin antegago. ³⁹ Afo yigena ena anecneugana siman anteganteci, yige yic yicnom baintauc yonaregac siman antegago. ⁴⁰ Fuga ugane yigeunamac mage mana baguy uvandaunama yiran anecne ampameminani yigeunamac baya dukantecumpe." Beni micni siremi banta anasi siyinkani beno.