¹ Icnaemi umaruc kipaimi, Poli beyic disaiporiuc ye onago vani yaremi. Afo beni baya siyimiman iraru yinkaremi Masedonia magafac bemi. ² Afo beni mini magugin kac bemi eraruyinkam bayauc siyimiremi, Grisi magafac bemi. ³ Minifac bami kandac manavac igona yankagaimi, beni Siria magafac sipi marem birar evami Yudauc beni umar amirani baya uyeno. Micnimi beni Masedonia magaginkac oraen yevegem birani indin uvaremi. ⁴ Afo benamac yageyom baintauci Sopata ben afo Firusin agaci, beni Berea maguginkenoi, Aristakusi nuc Sekundusi, Tesalonia maguginkena birvi bainta ganda, Gaiyusi beni Debe maguginke, Timoti, Tikikusi, Trofimasi yeni Esia magafateno bano. ⁵ Mini baintauc yenare Troasi magugin oveni yenama kac dafisevano. ⁶ Yisi iye vam breti van indin nuran yankagaici yenamac Filipai maguginke sipi gimi yererec begunami mana yacman nuran yankagaici, yevankac Troasic oraecyamu. Minigac yenamac afac kantan omandan nurami bagecyamu. ⁷ Mini wiki acnan nurami, yenamac breti kicdire narani ye managim baguyuanami, Poli birivican inimbaintauc mam baya siyimemi iyakac bevami maro nurampagic emi. Beni ena banuran yererem birani indir uvandukami. ⁸ Yenamac baguyugauna mac amugapac ban rumu gim amucna ramu uci bami. ⁹ Minigim mana fumara ben avic Eutikusi undua gaci kumantami, ogam mukimi mucdaron emi onkac baremi. Poli iyakac sam bevami, kandac manavac mac amugapate mini fumara yandem magapac kumini, kun donde onami, beni fukami. ¹⁰ Afo Poli magapac kundaemi ben amugapac yafauremi baremi. Afo beni semi, "Yigeni umar indiric iyevac ogo, beni fani ayum bemino." ¹¹ Afo inaemi Poli yevegen amugac rumu gin undaemi breti dakacden nemi. Yenamanac iyakac a sam bevami maro banuranic imi, beni yereremi bemi. ¹² Yemi yirac avogugic ini anon yimoyeno mini fumara ayum fa vani. ¹³ Poli yere ankarecyami yenamac acnaric ureci sipi gin Asosi oraeci, minigafi Poli yenamac bauna sipi gin urintemi. Mini i Polinic indinino, nevarai beni magagac birani indir uvaremi. ¹⁴ Beni Asosi magusin oraici, yenamac bemi avicman sipi gin deci, Mitilene magusapac becyamu. ¹⁵ Yenamac minifaci sipi gin undaeci gake non kim becyami ena banurami Kiosi ailani mecyan avafac bami mana avafac oraecyamu. Afo ena nurami yenamac Samosi ailani gac oraeci, minigake becyami ena nurami Miletusi taoni gin oraecyamu. ¹⁶ Poli sipi gim mana bemi Efesasi magu yankagem birani indemi, nevarai beni Esia magafac manaca nuram bac iye barani micnemi. Nevarai, amankagicma inam beni Pentikosi onarani, beni Yerusaremi magusapac agagem birani indemi. ¹⁷ Afo Miletusi magugim bemi, manaca baintauc Efesasi magusapac mam mac kim yicnonic ugam baintauc siyimina ben yerae onago vani siyinkemi. ¹⁸ Yeni yeraomi beni semi, "Yigenafoni indigamino, sena Esia magafac oraec sigan dauna nuran kake, seni yigenamac inkenic barigaci evagafu, yigeni onarukamino. ¹⁹ Seni sesic indin magapac deci Iyenonic yogan suvanom namaci mareci, amucna umani afakagecu, nevarai Yudauc semi mandaic usinkarani sevanone ²⁰ Yigeni indigamino seni mana anecne yigen amankac avoguc anecneuc yiyayinaninan siyimirani yevegec iyem fakevacumpe. Afo ne anecnaugarafi yigemi umacde bayuyankagafi, maya maya yimac kinkac siyimevacumpe, ²¹ yigeni indigamino, Yudauc namac Grikiuc namac Kotimpac yindun baecdeya yigeunamasic Iyeno Jisas kim birivic ogo vani siyimevacumpe. ²² Afo mage indego, Ayo Inta beni sirac mandaci seni Yerusaremi magufac bontecumpe, afo minifac ne anecnefi senkac ampamintenafi seni iyen indigecumpe, ²³ Ayo Inta semi sankarono vani sisimemino, masiden iyena taoni ginkac seni namac uman namaci senka dafitemino. ²⁴ Afo seni seyarani iyena anecne ino indiric iyen ecumpe, afo sena iyayeguna erarurec maro kipareci, afo Iyeno Jisasimpate mandukauna yogandac maro kipantecumpe, mini yogani, Kotin avacbagani siyimentecumpe. ²⁵ Afo mage indego, seni indigecumpe macde yigen yicbanac kinkac beci Koti kinic ugananinana siyimageguno, yigeni enayacbac sen soni iyen onanagomino. ²⁶ Micnugaci, seni mage yigemi facbarurec siyimentecumpe, mana bainta yigen yicbanac kinke oyoganami, mini i sentic umar ino. ²⁷ Nevaraino, seni mana baya vac yevegec iyem fakecumpe, macdem baya Kotinic ayirani yigemi siyimecumpe. ²⁸ Micnugemifo, yigesagac dafiman ayogugic egaci, Ayo Inta yigen uyac yinkarukan inimbaintauc bagaci dafisego. Yigeni avogugic uregaci Kotinic man mac kim ban inimbaintauc kac dafisego, yemi bey agagic koram poni ayac urukemino. ²⁹ Seni indigecumpe sena yererec buonami afasan iyanuc yigen yicbanapac yeraeni yemi yere iyen ecantenone. ³⁰ Seni indigecumpe yigen yicbanac kinke manaca baintauc ukukaeni iye antekam bayauci sireni banta anasi indin anana uyinkarani yemi yivakurintenone. ³¹ Micnugemifo yigesagac dafisego. Yigeni mana vac omare indego, kandac manavac orande anduntimi, ayufum bac bayankon namac saum bac iye rani suvanon kim macden anecneugani siguru yimevacumpe. ³² Afo seni mage Kotin namac benic avacbac kimi yinkecumpe, mana minifoni yigemi eraruyinkaremi, amankac Koti uyacdukan inimbaintauc yicbanakin anecneuc yimintemino. ³³ Semi silva namac kori namac bacdou gandac iyen siyemino. ³⁴ Afo yigeni indigamino, mana siyami yogan mandami semi siyayemino. ³⁵ Masicden anecne gimi seni uvareci yigemi yocyigecumpe inkenic uregaci yogan mandegaci erar iye dukan inimbaintauc yiyayintegafo, inkenic uregaci Iyeno Jisasi avaya omare yakac inac indintegafe, mini bayauc benafo senimi, 'yimi anda avoguci maranonamino, maran andai avoguc iyen maranonamino."' ³⁶ Beni mini avucavagugan bayauc siyimicdemi, beni acnom magapac demi macde yenamac ogam mukemi. ³⁷ Yeni anonic ure ific deni Polin ye yafaure umac neno. ³⁸ Yeni anon yigun anecne mareno, bena macni siranani, bemi enayacbac ben or iyen onantenone. Icnaemi banamac aveye beni sipi bankac maro ankeno.