Kuli kembisha mukalamba. Ulwimbo lwakwa Asafu. Ku ciunda ca “Ubusuma bwa Cipangano,” mu musango wa mutuntwa nsupa. ¹ We mucemi wa bena Israeli wingatumfwa, we utungulula Yosefu ngo mukuni wa mpaanga, we waikala pakati ka bakerubi. ² Uisokolole ku nko sha bena Efulemu, abena Benjamini na bena Manase, ulange ubulamba bobe no kwisa tupokololako. ³ Utubwekeshe mufyo twali we Yawe, lenga icinso cobe ciloleshe luse luse pali ifwe pakuti tupusuke. ⁴ We Yawe Lesa umwine wa fita, bushe uli nokufika lilali ukwikala uwakalipa nelyo abantu bobe balekupepa? ⁵ Amacushi e cakulya ico wabapeela ukulalya, ulukombo umwaba ifilamba elo wabapeela ukulanwamo. ⁶ Kabili walenga na bena mupalamano besu baleumanina icalo cesu, na balwani besu baletuseka. ⁷ Utubweseshe mufyo twali we Lesa umwine wa fita, lenga icinso cobe ciloleshe luse luse pali ifwe pakuti tupusuke. ⁸ Niwe walimbwile umwangashi mu Egupto, waisa tamfya abantu ba mishobo mu calo cabo, emo waisa ulimba. ⁹ Walautungwila pakuti ulekula bwino, ne mishila yauko yaya bwino panshi, elyo wakumana icalo conse. ¹⁰ Icintelelwe ca mwangashi calakupa pa mulu wa mpili, wakupa ne misambo ya fimuti ifyalepesha ifya keda. ¹¹ Imisambo yauko yayandalala ukufika kuli Bemba, no kuya fikafye ku Mumana. ¹² Nga kanshi cinshi ico wabongolwela ifibumba fya mwangashi, tepapa nomba bonse abalepitapo baleibako ifitwalo? ¹³ Na bakapoli ba mu mpanga baleonaula ne nama sha mu mabala shileulyako. ¹⁴ We Lesa umwine wa fita ala ubwelele kuli ifwe, ukufuma uko waba ku mulu, lolesha pano tuli panshi, lolesha pali uyu wangashi, ¹⁵ uyo uo we mwine walimbile no kuboko kobe ukwa ku kulyo, umusambo uyo waikushisha we mwine. ¹⁶ Nabatema umwangashi obe, baoca na mu mulilo. ¹⁷ Uleke ukuboko kobe kube pa muntu wa ku kulyo kobe, pa mwana wa muntu uo washimpa we mwine. ¹⁸ Ifwe tatwakatale atukusangukila nakabili iyoo, tupuputulefye na ifwe tuli nokwita peshina lyobe. ¹⁹ Utubwekeshe mufyo twali we Yawe Lesa umwine wa fita, lenga icinso cobe ciloleshe luse luse pali ifwe pakuti tupusuke.