Kuli kembisha mukalamba. Ukulingana na Gititi. Ulwimbo lwakwa Asafu. ¹ Imbeni ne nsansa kuli Lesa uwaba amaka yesu, imbileni Lesa wakwa Yakobo inyimbo no kupundisha! ² Samuneni ulwimbo, mulelisha ne nsombo, akulisheni bwino amaseese ne nsango. ³ Lisheni ipenga pa kutampa kwa mweshi, na palya wabulungana, na pa bushiku bwa nshikunkulu yesu. ⁴ Pantu e funde lya muno calo ca Israeli, e cipope cakwa Lesa wakwa Yakobo. ⁵ Eco akonkomeshe nge cebo kuli Yosefu, ilyo aile lwisha icalo ca Egupto, kulya twaile umfwa ululimi tushateseshe. ⁶ Alesosa ati, “Ala nine namutulileko ifisendo fyenu ifyafina pa mabeya yenu, namwafwako no kuteka imiseke panshi pakuti mube abantungwa. ⁷ Mwalikuutile ilyo mwalecula, na ine naisa mupususha, mwikumbi ilyalepanta emo ine namwasukile, namweseshe pa menshi ya ku Meriba.(Selah) ⁸ “Umfweni mwe bantu bandi, lekeni musoke, mwe bena Israeli, nga mwingomfwa kuli ine. ⁹ Mwilaba ne milungu imbi, nangu ukulapepa imilungu ya benafyalo. ¹⁰ Ine nine Yawe, Lesa wenu neka, nine namufumishe mu calo ca Egupto, eico muleasamunafye akanwa, nine nakulamulisha. ¹¹ “Nomba abantu bandi bena balikaana ifyo mbeba, abena Israeli balikaana ukulambeela. ¹² Kanshi eico ine nimbalekako pakuti bashale abaumalala ifyo fine, baleicitila ifintu umo abene balefwaila. ¹³ “Iye ala abantu bandi abalaŋumfwa, na bena Israeli abalambeela, ¹⁴ lyena nga kuti nacimfya abalwani babo bwangu, no kunasha bonse ababacusha. ¹⁵ Elyo abapata Yawe, nga nabesa cimba, no kukandwa kwabo nga kwamuyayaya. ¹⁶ Lelo abantu bandi bena nga kuti ine nabalisha ubunga bwa ŋanu ubwapeleka bwino, no kulabekusha ubuci bwa mu mabwe.