Ulwimbo lwakwa Asafu. ¹ We Lesa, ala abenafyalo nabasansa icalo ca bantu bobe, nabakowesha ne Tempele lyobe ilyamushilo, nababongolola no musumba wa Yerusalemu. ² Bapeele ifitumbi fya bantu bobe ku fyuni pakuti filelya, bafipeela na ku finama fya mu mpanga nafyo filelya. ³ Nabasumya umulopa wa bantu nga menshi ukushinguluka Yerusalemu, tapashele nangu umo uwakushiika ifitumbi fya banankwe. ⁴ Natuba abasebana ku bena mupalamano besu, baletuseka no kutuwela. Bushe kufika lilali we Yawe? ⁵ Uli nokwikala uwafulwa inshita yonse? Bushe kufika lilali ubufuba bobe bwakulabilima ngo mulilo ku bukali? ⁶ Shifulilwa abantu ba mishobo abashikupepa, elyo ne shamfumu ishishiita peshina lyobe, ⁷ pantu nabepaulula Yakobo, nabonaula ne calo cakwe. ⁸ Witubika pakukandwa pa bubifi bwa fikolwe fyesu, ifwe twalombafye ukuti, “Utubelele uluse, mukwangufyanya tukumanye, pantu ifwe amano nayapela.” ⁹ Sotwafweko we Lesa, we Mupusushi wesu, pakuti ishina lyobe licindamikwe, utupokololeko no kulatwelela ububifi bwesu, pa mulandu we shina lyobe. ¹⁰ Nga cinshi imishobo ingalasosela aiti “Nga Lesa wabo ali kwi?” Kanshi leka tumoneko uko ulekanda imishobo, pa mulandu wakwipaulula ababomfi bobe. ¹¹ Uleke ukulila kwa bafungwa kumfwike kuli iwe, ku bulamba bobe upokolole abo bapingula ukwipaya. ¹² We Yawe umusaalula onse uo abena mupalamano besu bakucitila, leka ubabwelele mu ceni cabo imiku cine lubali. ¹³ Elyo ifwe fwe bantu bobe, fwe mukuni wa bucemi bobe, twakulakutotela pe na pe, ukufuma ku nkulo ukufika ku nkulo ibiye twakulalondolola amalumbo yobe.