¹ Sekeleleni muli Yawe, imwe mwe balungami, amalumbo yalilinga ku bololoke. ² Pekeni amatotelo kuli Yawe ne nsango limbeni amalumbo kuli wene ngango ya nsale ikumi, ³ Mwimbileni ulwimbo lupya; lisheni bwino bwino kabili imbeni no kusekelele. ⁴ Pantu icebo ca kwa Yawe ca lyololoka, kabili nefyo acita fyonse fyamulinganya. ⁵ Alitemwa ubulungami no mulinganya icalo caisula icipangano ca bucishinka bwakwe. ⁶ Ku cebo ca kwa Yawe imyulu yalegelwe, kabili intanda shonse sha lengelwe ku mupu wa kanwa kakwe. ⁷ Alonganya pamo amenshi ya muli bemba ngo mupili, abika amatenga mu matata. ⁸ Lekeni icalo conse citine Yawe; lekeni bonse abaikala pe sonde beminine mu katina ka kuli wene. ⁹ Ico wene asosele, kabili calicitwa; wene alandile, kabili ca shimpilwe mu cifulo. ¹⁰ Yawe acilinganya ukumana akapi kwa nko; wene acincintila amapange ya bantu na bantu. ¹¹ Amapange yakwa Yawe ya iminina umuyayaya, Amapange ya mutima wakwe ya nkulo shonse. ¹² Lwalipalwa uluko ulo Lesa waluko ni Yawe, abantu abo asala nge ca bupyani cakwe. ¹³ Yawe alolesha ukufuma ku mulu; amona abantu bonse. ¹⁴ Ukufuma ku cifulo uko ekala, wene alolesha panshi pali bonse abekala pa calo. ¹⁵ Wene uyo upika imitima ya bonse alingulula imicitile yabo yonse. ¹⁶ Takwaba imfumu ipusushiwa no mulalo uwakulisha; impalume taipusuka ku bukose bwa iko ubwa cila. ¹⁷ Kabalwe lisubilo lya bufi ku kucimfya, nangu engaba no bukose ubwa cila, teti apokololeko. ¹⁸ Moneni,amenso yakwa Yawe yaba pali abo abamutina, pali abo abasubila mu cipangano cakwe icabucishinka. ¹⁹ Ku kupususha imyeo yabo ukufuma ku mfwa kabili nokubasunga aba mweo mu nshita ya cipowe. ²⁰ Tulolela Yawe, wene ekafwa wesu kabili inkwela yesu. ²¹ Imitima yesu isekelela muli wene, ico twatetekela mwishina lyakwe ilya mushilo. ²² Yawe lekeni icipangano ca bucishinka cibe na ifwe ilyo tulebika isubilo lyesu muli imwe.