Ulwakwa Davidi, ilyo abepele ukupena pa cinso cakwa Abimeleki, nao amutamfya, epakuya. ¹ Ine nakulapaala Yawe na matotelo inshita shonse, nshakaleke ukulamulumbanya. ² Umutima wandi wakulalumbanya Yawe, na bacucutika omfwe, bakwate no kusekelela. ³ Lumbanyeni Yawe pamo na ine, natusansabike ishina lyakwe bonse pamo. ⁴ Nalilombele ubwafwilisho ukufuma kuli Yawe, nao anjasuka. Ampokolola na kuli fyonse ifyalentiinya. ⁵ Bonse abamulolesha balaba ne nsansa pa menso yabo, tabalengwe nsoni kabili nakalya. ⁶ Umulanda wine uyu alila, na Yawe amumfwa, no kumupususha mu mafya yakwe yonse. ⁷ Malaika alekala nashinguluka abantu abakwatila Yawe akatiina, kabili alabapokolola. ⁸ Sondeni no kuimwena mwe bene ukuti Yawe musuma, alishuka muntu uufisama muli ena. ⁹ Muleba na katiina kuli Yawe mwe bamushilo bakwe, pantu abakwatila Yawe akatiina tababulisha akantu nangu kamo. ¹⁰ Ne nkalamo shilanaka no kubulwa icakulya mu nshiku shimo, lelo abapetamina Yawe tababulwa icisuma nangu cimo. ¹¹ Ala iseni kuno mwe bana, umfweni kuli ine, mufundeko pa mulandu wakukwatila Yawe akatiina. ¹² Nani pa kati kenu uufwaya umweo, no kukabila ukwikala pesonde inshiku ishingi ¹³ Asunge ululimi lwakwe ukufuma ku bubifi, ne milomo yakwe kukubepa ubufi. ¹⁴ Taluka ku bubifi no kucita icisuma, cita umutende no kuusupila. ¹⁵ Amenso yakwa Yawe yaba pa bololoke, kabili amatwi yakwe yalakutika ku mapepo yabo. ¹⁶ Lelo alafutatila abacita ububifi, no kubacita kwati tababapo pesonde. ¹⁷ Yawe alomfwa inkuuta ya bololoke, no kubapokolola ku mafya yabo yonse. ¹⁸ Yawe alapalamina abafunshika imitima, kabili alapususha abafunshika imipashi. ¹⁹ Fingi ifyo uwalungama engaculako, lelo muli fyonse Yawe alamupususha. ²⁰ Alamusungila na mafupa, tekuti pafunike nelyo limo. ²¹ Ububifi bulepaisha umuntu umubifi, abalwani ba bololoke bakasekwa. ²² Yawe alubula imyeo ya babomfi bakwe, tapali umuntu nangu umo uufisama muli Yawe uyo uukasekwa.