Masikili wakwa Davidi. ¹ Alishuka umuntu uo Lesa abelela uluse pafyo alufyanya, uo Lesa afumisha ifyabubifi fyakwe. ² Alishuka umuntu uo ifyabubifi fyakwe Yawe tafibukisha, kabili mu mutima wakwe tamwaba bufi. ³ Ilintu nafililwe ukuyebelela ifibi fyandi, umubili wandi walipomponteke, pa mulandu wa kuteta akasuba konse. ⁴ Akasuba no bushiku nali uwatitikishiwa na maka ya kuboko kobe. Amaka yandi yalipwile, nga fintu ulupimbili luuma ku cikabilila ca mu lusuba.(Selah) ⁵ Elyo nayebelele bumpulamafunde bwandi kuli iwe, nshafishile ububifi bwandi, natile, “Kanjebelele ifyabupulumushi fyandi kuli Yawe,” na iwe walimbelelako uluse ku fibi fyandi fyonse.(Selah) ⁶ Eico, leka bonse abakupetamina bakupepe ilintu wingasangwa, pantu nelyo ilyeshi lingesa tekuti libasunkanye. ⁷ Niwe mfisamamo ico ulancingilila ku mafya, no kuleka inyimbo shakupususha shinshinguluke.(Selah) ⁸ Ndi nokukulondolwela elyo no kukufunda inshila yakwendamo, ndi nokukupandako amano kabili amenso yandi yakulalolesha pali iwe. ⁹ Wiba nga kabalwe nangu punda ifishaba na mano, lelo kanofye ukutungululwa ku mikobelo ne nshinga. ¹⁰ Ababifi balaponenwa na macushi ayengi nganshi, lelo abatetekela Yawe bashingulukwa no kutemwa kwakwe ukushifilwa ¹¹ Mwe bololoke sangalaleni muli Yawe, musansamuke mwe balungama imitima.