Ulwimbo, Amalumbo ya kwa Davidi. ¹ Umutima wandi walikala, mwe Lesa! Nakulaimba, ee, Nakulaimba ishamalumbo pamo no bukata bwandi. ² Ima, we sesena we nsango; Nalabusha amacaca. ³ Nakulapela ukutasha kuli iwe, we Yawe pakati ka mishobo; ine nakulaimba isha malumbo kuli iwe mu nko. ⁴ Pantu icilelekela ca cipangano cobe cikalamba ukucila imyulu; elyo ne cishinka cobe cafika mumakumbi. ⁵ Ube uwa sumbulwa, we Lesa, ukucila imyulu, elyo ubukata bobe busumbulwe ukucila isonde lyonse. ⁶ Pakuti abo abo iwe watemwa balubulwe, tulubule ifwe no kuboko kobe ukwa kukulyo elyo mungasuke. ⁷ Lesa alisosele muli bumushilo bwa kwe; "ndi no kusekelela; ndi no kwakanya Shekemu ne cipitulwa ukufuma mu mupokapoka wa Sukoti. ⁸ Gileadi yandi, na Manase yandi; Efulemu nayo ecimpompo candi; Yuda enkonto yandi. ⁹ Moabu ecakusambilamo candi; pali Edomu ine epo nkalaposa insapayo shandi; nkapundila mukucimfya pa mulandu wa kwa Filishiti. ¹⁰ Bushe ninani ukandeta mu musumba uwakosa? Ninani uukantungulula ku Edomu?" ¹¹ Mwe Lesa, Bushe Tawatukana ifwe? Tawaya mu bulwi pamo nabashilika besu. ¹² Tupeni ifwe ubwafwilisho pamenso ya balwani pakuti ukwafwa kwa muntu takwafwa. ¹³ Tuli no kucimfya pamo no kwafwa kwakwa Lesa; ali nokunyantaula abalwani besu panshi.