¹ We Lesa, weo ine numbanya, witalalafye tondolo. ² Pantu ababifi na bantu incenjeshi balelanda pali ine, balembepesha ne fyakumbepesha no tunwa twabo. ³ Balelanda ifintu ifyalupato pali ine, balendwisha ne ushili na mulandu. ⁴ Bena balenjimina nelyo ine kwena nabatemwa, lelo ndi muntu uupepa nganshi. ⁵ Ine kuti nga nabacitila ifisuma, bena bancitila ifyabipa. Nga nati kambatemwe bena ninshi kumpata. ⁶ Saleni umuntu imbifi eo amulubulwishe, muleke no mulwani eminine ku kuboko kwakwe ukwa ku kulyo. ⁷ Lekeni bamusange no mulandu ilyo alelubulula, na pa mipapatile pene apeelelwepo imilandu. ⁸ Kuti calinga inshiku shakwe ishakwikala pano calo shicepeleko, na pa mulimo wakwe papyanine umbi aletungulula. ⁹ Kuti cawama abana bakwe ukushala bakashiwa, no mukashi wakwe abe mukamfwilwa. ¹⁰ Kuti calinga bamwane baleseulukafye mukulapula, nokuti babatamfye na mu fipompa fyabo ifya mayanda. ¹¹ Kuti cawama uwamukongweshako ese amupoke ifyuma fyakwe fyonsefye, na bantu bambi bambifye ebo bese bamutape fyonse ifyo acucutikila. ¹² Kuti cawama pebafye nangu umo uwakumulangulukilako, kabili pebafye nangu umo uwakukumbusukako bakashiwa bakwe. ¹³ Kuti cawama aba mu luko lwakwe bakalobelelefye bonse nakalya nakalya, na mashina yabo yekeshibikwa na mu nkulo iyikakonkapo ¹⁴ Kuti cawama we Yawe, uleibukisha ifyabupulumushi fya fikolwe fyakwe, kabili ne fyabubifi fyakwa nyina fikatala afifutwa. ¹⁵ Kuti cawama we Yawe, uleibukisha ifibi fyabo lyonsefye, epakuti na pano isonde bekalabebukishapo. ¹⁶ Pantu ena taletontonkanyapo ukucitila abantu bambi uluse, ena alecusha umupina na babusu, na bafunshika imitima mpaka bafwa ¹⁷ Ena alitemenwe ukulatipwila bambi, kanshi nao intipu kashimulye. Tasangilemo insansa mukupaala, kanshi nao peba nelyo umo uwakumupaala. ¹⁸ Ena afwale intipu nge cakufwala cakwe, intipu shakwe shali munda mumwakwe nga menshi, shamwingilile mu mafupa nga mafuta. ¹⁹ Lekeni shimukupilile nge nsalu afwala, kabili shimufyentefye ngo mushipi wa mu musana umuyayaya. ²⁰ Kanshi ifi efyo we Yawe ulimune abalwani bandi, abalanda ifyabipa pali ine. ²¹ Lelo we Mfumu Yawe, pa mulandu we shina lyobefye untuuleko, mpokololako pa mulandu wa busuma bwa citemwiko cobe icishipwa. ²² Pantu ine ndi mupina kabili nshikwete nangu kamo, no mutima wandi naupakaswa mukati kandi. ²³ Ine ndefumapo nge cinshingwa ilyo akasuba kawa, ndetafulukafye nga makanta. ²⁴ Amakufi yandi nayapomponteka pa mulandu wakufunga ukulya, no mubili wandi ushelefye imisakalala. ²⁵ Ine nsangwikefye uwakuwelwa ku bampata, abantu baleti nga bamona uko ndepita, awe bena balakuntafye imitwe ²⁶ We Yawe, we Lesa wandi, ala mpusushako ukulingana ne citemwiko cobe icishipwa. ²⁷ Uleke beshibe ukuti kuboko kobe, we Yawe, ekwacita ici. ²⁸ Ilyo bena balendapisha, lelo iwe ulempaalafye! Ilyo banjiminina, uleke balengwe nsoni, uleke ine ne mubomfi ndesansamuka. ²⁹ Uleke abalwani bandi basebane, ne nsoni shibakupe nge cakufwala. ³⁰ Na kanwa kandi nakulakutotela we Yawe, nakulakulumbanishisha na mu lukuta. ³¹ Pantu wiminina kukupokololako umulanda, ukupususha umweo wakwe ku bamupingwila ukufwa