¹ Peelni ukutasha kuli Yawe pantu ena musuma, icitemwiko cakwe ca muyayaya. ² Lekeni abo Yawe alubula balelanda aya mashiwi, abo alubula ukufuma ku balwani abalebacusha, ³ abo abwesha ukufuma mu fyalo, ukufuma ku kabanga na ku masamba, na bufuma ku kapinda ka ku kuso na ku kapinda ka kukulyo. ⁴ Bamo balelulumbafye mu matololo umushali nshila, tabasangile nshila iyakuya ku musumba uko bengekala. ⁵ Baculile nganshi ku nsala ne cilaka, na mano yakupudukilamo yasukile yapwa. ⁶ Kanshi epakupunda mutuule kuli Yawe mu macushi yabo, nao epakubapokololako ku mafya yabo. ⁷ Epakubatungulula mu nshila iyalungama ku musumba ukwakuya ikala. ⁸ Ee, balekeni baletotela Yawe pa citemwiko cakwe icichipwa, na pa fintu ifyakupapa ifyoo acitila abantu bakwe. ⁹ Pantu eupwisha ne cilaka ca bantu, nno kulisha abali ne nsala ifyakulya ifisuma. ¹⁰ Bamo balikele umwafiita fititi elyo na mu malangulushi, kabili bali mu macushi ya fyela. ¹¹ Pantu balitalamine amashi yakwa Lesa, kabili balisuulile amanno ayo Lesa mukulu alebebako. ¹² Ecalengile abapose mukubomba imilimo yacibe nganshi, nangu bawe batalansuke takwaleba nangu umo uwakubemyako. ¹³ Kanshi epakupunda mutuule kuli Yawe mu macushi yabo, nao epakubapusushako ku mafya yabo. ¹⁴ Yawe epakubafumya mu mfifi na mu malangulushi, elyo aputuula ne minyololo yabo. ¹⁵ Balekeni baletotela Yawe pa citemwiko cakwe icishipwa, na pa fintu ifyakupapa ifyo acitila abantu bakwe. ¹⁶ Pantu alapankula impongolo sha mukuba, na kuputaula immipilikisho yashikko ya fyela. ¹⁷ Bamo basangwike ifiwelelwele pamulandu wa bucisanguka bwabo, kanshi epakuculisha pa mulandu wa fyakubika fyabo. ¹⁸ Casuka ne cakulya cine calabaselausha ku mikoshi, kanshi epakubafye mupepi ne milomo ya cilindi. ¹⁹ Kanshi epakukuuta mutuule kuli Yawe mu macushi yabo, nao epakubapusushako kumafya yabo. ²⁰ Atuma shiwi, no kubondapa lyabondapa, abafumya na ku milomo ya cilindi. ²¹ Ee, balekeni baletotela Yawe pa citemwiko cakwe icishipwa, na pa fintu ifyakupapa ifyo acitila abantu bakwe. ²² Balekeni balemutuulila amalmbo yakutotela, kabili no kulalanda pamilimo yakwe mu nyimbo shansansa. ²³ Bamo baleenda ne fimato pali bemba, ifyo balebombelamo imilimo ya makwebo pali babemba abakalamba. ²⁴ Balemona ne milimo Yawe abomba, ne fintu fyakupapa ifyaba muli bemba. ²⁵ Ena atila nga alanda, awe ninshi ne cimwela calapupa, caimya na matamba pali bemba. ²⁶ Ne fimato nafyo epakulaimina mu mulu no kulaiteneka pa menshi, abantu basuku bakwata no mwenso, na mano yapela. ²⁷ Baletalansukafye no kulapungaila kwati bantu bakolelwe ubwalwa, ne fyakucita ninshi fyabula. ²⁸ Kanshi epakukuuta mutuule kuli Yawe mu macushi yabo, nao epakubafimyako ku mafya yabo. ²⁹ Mukatepentepe atalika ne cimwela, na matamba ya pali bemba tatakakafya tondolo. ³⁰ Nabo tepakusansamuka ico bemba yatalala tondolo, nao epakubatungulula kuntu baleya ku cabu. ³¹ Ee, balekeni baletotela Yawe pa citemwiko cakwe icishipwa, na pa fintu ifyakupapa ifyo acitila abantu bakwe. ³² Balekeni balemulumbilisha mu lukuta lwa cintubwingi, no kulalumbanishisha mu cilye ca bakalamba. ³³ Ayalwile imimana ukubafya amatololo, no kukamya utumfukumfuku twa menshi. ³⁴ Eusangula ne calo caumfwika ukuba ica cicele, pa mulandu wa bubifi bwa bantu abekalamo. ³⁵ Eusangula amatolo ukuba ifishiba fya menshi, ne mpanga iyauma ndi ukubakp tutmfukumfu twa menshi. ³⁶ Kulya eko atwele abantu abali ne nsala pakuti eko baleikala, nabo epakukuulako no musumba uwakuti emo baleikala. ³⁷ Batandile ne mbuto mu mabala, elyo balimbamo ne nyangashi, awe balasombolamo ne fisabo ifingi ngashi. ³⁸ Ena nao abapaala nabo balasanduluka ngashi, kabili asandukula ne fitekwa fyabo. ³⁹ anshi impendwa yabo yalicepeleko, kabili balipwile amaka, pa mulandu wakutitikishiwa no bucushi pamo no bulanda. ⁴⁰ Alangile ukuti tasekele mu ntungukushi shabo, aleka nokuti baye balepupushikafye mu matololo umushaba nshila. ⁴¹ Lelo abapina bena abapusushako mu bulunda bwabo, asandulula ne ndupwa shabo nge mikuni ya mpaanga. ⁴² Abantu abololoke pakumona ifi bena balasansamuka. lelo ababifi bonse bekalafye tondolo. ⁴³ Ala mwe bamano, muletontonkanya pali ifi fintu, kabili muletontonkanya pa citemwiko icishaikulila nganshi icakwa Yawe.