¹ Kabili Yosaya acindikile Yawe mukusefya Ipasaka, inshikunkulu ya Cakucilila, mu Yerusalemu, elyo na pa bushiku bwalenga ikumi limo na shine aipaya umwana wa mpaanga wakusefesha Ipasaka. ² Abika bashimapepo mu fifulo fyabo ifyakubombelamo no kubakoselesha mu milimo ya mu ŋanda yakwa Yawe. ³ Elyo aeba abena Levi, abali na mano yakufunda abena Israeli kabili abali abatuulwa kuli Yawe ati, “Bikeni Imbokoshi ya Cipangano mu ŋanda yakwa Yawe iyo Solomoni mwana Davidi imfumu ya bena Israeli yakuulile. ⁴ Tamufwile ukusendela pa mabeya yenu. Eico nomba ambeni ukutumika Yawe Lesa wenu elyo na bantu bakwe. 4Iteyanyeni mu ndupwa shenu mu mpuka mu mpuka ukulingana ne fyakonkomeshe Davidi imfumu ya bena Israeli no mwana wakwe Solomoni. ⁵ Mwiminine mu cifulo camushilo na kabungwe ka bena Levi pali cila mpuka sha ndupwa sha bekalacalo banenu abo ababomba mukwafwilisha. ⁶ Elyo mwipaye abana ba mpaanga ba pe Pasaka. Muisangulule mwe bene no kupekanya abana ba mpaanga ba bamunyinenwe, no kucita ifyo Yawe amukonkomeshe ukupitila muli Mose.” ⁷ Yosaya epakupeela abo ababomba mukwafwilisha abana ba mpaanga na ba mbushi amakana amakumi yatatu ishakupeela umutuulo we Pasaka elyo na bacilume ba ŋombe amakana yatatu, ifi fyonse fyafumine pa fyakwete imfumu. ⁸ Bacilolo bakwe bacita cimo cine, mukuitemenwa bapeela ku bantu na kuli bashimapepo elyo na ku bena Levi. Elyo Hilikiya, Sakaria na Yehieli bacilolo ba mu ŋanda yakwa Lesa bapeela bashimapepo abana ba mpaanga na ba mbushi amakana yabili ne myanda mutanda ishakutuula pe Pasaka elyo na bacilume ba ŋombe imyanda itatu. ⁹ Kabili Konaniya pamo pene na Shemaiya na Netaneli bamunyina, elyo Hashabiya, Yehieli, Yosabadi, abali ni ntungulushi sha bena Levi, nabo bapeele abana ba mpaanga na ba mbushi amakana yasano ishakutuula pe Pasaka elyo na bacilume ba ŋombe imyanda isano isha ku bena Levi. ¹⁰ Ilyo fyonse fyapekanishiwe ifya pakusefya Ipasaka, inshikunkulu ya Cakucilila, bashimapepo baiminine mu ncende shabo ishakubombelamo na bena Levi nabo mu mpuka shabo ngefyo imfumu yakonkomeshe. ¹¹ Abena Levi epakwipaya abana ba mpaanga be Pasaka, babuula umulopa bapeela bashimapepo nabo baukana, elyo bapwishishisha ukuputaula inama. ¹² Elyo bapatulapo inama ishakutuula ilambo lyakoca bapeela ku mpuka sha ndupwa sha bekalacalo abali nokutuula kuli Yawe ngefyo calembwa mu citabo cakwa Mose. Kabili bacita cimo cine kuli bacilume ba ŋombe. ¹³ Baoca inama ye Pasaka pa mulilo ngefyo calembwa elyo ishamushilo shonse bashipika mu malongo, mu mipika na mu nongo elyo bashipeela na ku bekalacalo bonse. ¹⁴ Panuma ya ifi, elyo nabo baipekanishisha elyo bapekanishishako na bashimapepo. Bacitile ifi pantu bashimapepo, aba mu lupwa lwakwa Aroni, bali no mulimo wakutuula amalambo yakoca pamo ne nama sha mafuta mpaka ubushiku. Kanshi ecalengele abena Levi ukuipekanishisha abene no kupekanishishako aba mu lupwa lwakwa Aroni. ¹⁵ Bakemba, aba mu lupwa lwakwa Asafu bonse, bali mu ncende shabo ukulingana nefyo Davidi, Asafu, Hemani na Yedutuni uwali kamona wa mfumu basosele. Bakalinda wa cila mpongolo tabafumine pa milimo yabo, pantu abena Levi banabo balibapekanishishe ifyakulya. ¹⁶ Kanshi efyo imilimo yonse iyakwa Yawe yabombeke, iyakusefya Ipasaka elyo ne yakutuula amalambo yakoca pa bulambo bwakwa Yawe ngefyo imfumu Yosaya yakonkomeshe. ¹⁷ Ifi efyo abena Israeli abasangilwepo pali ilya nshita basefeshe Ipasaka ne nshikunkulu ya mikate iyishatutumuka pa nshiku cine lubali. ¹⁸ Takwaliko Ipasaka ilyo basefeshe muli uyu musango ukufuma mu nshiku shakwa kasesema Samwele. Elyo kabili takwatalile akuba imfumu ya bena Israeli iyatalile aisefya Ipasaka ngefyo Yosaya acitile na bashimapepo bakwe abena Levi, abena Yuda elyo na bena Israeli bonse abali pamo na bantu ba mu Yerusalemu. ¹⁹ Kwali ukusefya ili Ipasaka mu mwaka walenga ikumi limo na cine konse konse uwa pa bufumu bwakwa Yosaya. ²⁰ Panuma ya ifi fyonse, ilyo Yosaya apwishishe ukuwamya Itempele, Neko imfumu ya ku Egupto yaima ukuya ku bulwi pa Kakemishi ku mumana wa Yufurate, nao Yosaya aima aya kukumulwisha. ²¹ Lelo Neko atuma inkombe shakuya mweba amashiwi yakuti, “Bushe mulandu nshi iwe na ine twalalwila we mfumu ya bena Yuda? Ine teiwe njishile mukulwisha, lelo ndeya mukulwishafye iŋanda imbi. Lesa eunjebele ukwendesha, eico leka ukulwisha Lesa uuntumine pantu alekonaulapofye.” ²² Lelo Yosaya akaana ukumfwa nokuti abweleko, ena aifungushanya atendeka no kumulwisha. Afilwa ukumfwa amashiwi yakwa Neko ayo Lesa amukonkomeshe, lelo aya mukumulwisha mwiwanga lya Megido. ²³ Bakaposa wa mifwi balasa imfumu Yosaya, elyo aeba bacilolo bakwe ati, “Nsendeni mumfumye kuno, pantu bancena nganshi.” ²⁴ Kanshi epakumufumya mwiceleta alimo, bamubika mwiceleta limbi, bamusenda bamuleta ku Yerusalemu eko aisa fwila. Bamushiikile mu nshinshi sha fikolwe, na bantu bonse baloosha Yosaya abaleikala mu Yuda na mu Yerusalemu. ²⁵ Yeremia ashika ne nyimbo sha pali Yosaya, kabili ukufika na ino nshita bonse abaume na banakashi bakemba balebukisha Yosaya mu nyimbo. Ici caishile pilibuka caba no lutambi mu Israeli no kulembwa mu nyimbo shabulanda. ²⁶ Palwa fintu fimbi ifya pa bufumu bwakwa Yosaya nefyo acitile pakuipeelesha ukulingana ne fyalembwa mu mafunde yakwa Yawe, ²⁷ elyo ifintu fyonse acitile ukufuma ku kutendeka ukufika na ku mpela fyalilembwa mu citabo ca shamfumu sha mu Israeli na mu Yuda.