¹ Elyo abantu ba mu calo babuulile Yehoahasi mwana Yosaya eo bapyanika pa bufumu mu Yerusalemu pa cifulo cakwa wishi. ² Yehoahasi akwete imyaka yakufyalwa amakumi yabili na itatu ilyo atendeke ukuteeka pa bufumu, kabili ateekele icalo pa myeshifye itatu mu Yerusalemu. ³ Elyo imfumu ya mu Egupto yaisa mutamfya pa bufumu mu Yerusalemu, yapingula na bena Yuda ukulipila umusonko amatalanta umwanda umo aya silifa, elyo ne talanta limo ilya golide. ⁴ Imfumu ya ku Egupto yasonta na Eliakimu, munyina wakwa Yehoahasi ukuba imfumu ya bena Yuda na mu Yerusalemu, elyo yapilibula ne shina lyakwa Eliakimu ukuti akulaitwa Yehoyakimu. Lelo Yehoahasi munyina kwa Eliakimu ena Neko amusenda ku Egupto. ⁵ Yehoyakimu akwete imyaka yakufyalwa amakumi yabili na isano ilyo atendeke ukuteeka pa bufumu, kabili ateekele imyaka ikumi limo na umo mu Yerusalemu. ⁶ Acitile ifyabipa pa cinso cakwa Yawe, Lesa wakwe. Elyo imfumu Nebukadinesa iya ku Babiloni yamusansa, yamukaka ku minyololo ya mukuba, yamusenda na ku Babiloni. ⁷ Kabili Nebukadinesa asenda ne fipe fimo ifya mu ŋanda yakwa Yawe kulya kwine no kufibika mwisano lyakwe. ⁸ Palwa fintu fimbi ifya pa bufumu bwakwa Yehoyakimu, ne fintu ifyamakankamike ifyo acitile, fyonse fyalilembwa mu citabo ca milandu ya shamfumu sha bena Israeli na bena Yuda. Elyo umwana wakwe Yehoiyakini amupyana pa bufumu. ⁹ 9Yehoiyakini akwete imyaka yakufyalwa ikumi limo na cine konse konse ilyo atendeke ukuteeka pa bufumu, kabili aikele pa bufumu imyeshifye itatu mu Yerusalemu ne nshiku ikumi limo. Acitile ifyabipa pa cinso cakwa Yawe. ¹⁰ Ilyo umwaka wayalwike, imfumu Nebukadinesa yatuma abakumuleta ku Babiloni pamo ne fipe ifyacindama ukufuma mu ŋanda yakwa Yawe. Elyo abuula Sedekiya uwali munyina wakwa Yehoiyakini ukuba imfumu ya bena Yuda na ba mu Yerusalemu. ¹¹ Sedekia ali ne myaka yakufyalwa amakumi yabili na umo ilyo atendeke ukuteeka pa bufumu, kabili aikele pa bufumu imyaka ikumi limo na umo mu Yerusalemu. ¹² Acitile ifyabipa pa cinso cakwa Yawe, Lesa wakwe, kabili afililwe no kuicefya kuli Yeremia kasesema, uwalandile icebo cakwa Yawe kuli ena. ¹³ Kabili asangukila imfumu Nebukadinesa uwamusontele pa bufumu no kumulenga ukulapa mwishina lyakwa Lesa. ¹⁴ Elyo akosha umutima no kutalama icakuti afilwa no kubwelela kuli Yawe, Lesa wa bena Israeli. Kabili abakalamba bonse aba bashimapepo na bantu bene bacishamo ukuba ababula icishinka, mukukonka imicitile iyabipisha iya mishobo ya benafyalo elyo no kukowesha ŋanda yakwa Yawe iyali iyashishiwa mu Yerusalemu ¹⁵ Yawe, Lesa wa fikolwe fyabo, akonkanyapofye ukubatumina amashiwi ayalelanda inkombe shakwe, pantu alikwatile abantu elyo ne ncende yakwe uluse. ¹⁶ Lelo baletumfya inkombe shakwa Lesa, ukususha amashiwi yakwe no kuseka bakasesema bakwe mpaka Yawe afulilwa abantu bakwe, ukufulwa ukushili kwakubwesha umutima. ¹⁷ Lesa epakubemisha imfumu ya bena Kaludea uwaishile ipaya abalumendo bonse ku lupanga abali mu cifulo camushilo, kabili tashilepo nangu umo umulumendo nangu umukashana, umwaume umukalamba nangu umukote. Lesa apeelefye bonse mu minwe yakwa Nebukadinesa ¹⁸ Asenda ifipe fyonse ifya mu ŋanda yakwa Lesa ku Babiloni, ifikulu ne finono. Elyo asenda ne cuma conse ica mu ŋanda yakwa Yawe pamo ne cuma ca mfumu na bacilolo bakwe. ¹⁹ Baoca Iŋanda yakwa Lesa, babongolola ne linga lya ku musumba wa Yerusalemu. Baoca na mayanda yonse aye sano elyo no konaula icipe conse ica mulimo uukankala. ²⁰ Elyo asenda abantu bonse muli bunkole ku Babiloni abapuswike kukubepaya, baya ba ababomfi kuli ena na ku bana bakwe mpakafye lintu ubufumu bwa bena Pesia bwatendeke. ²¹ Ici cali mukufikilisha ishiwi lyakwa Yawe ilyalandilwe na kasesema Yeremia ilyakuti icalo cali nokubaka Amasabata yaciko mu nshita yonse iyakonaulwa mpaka imyaka yonse amakumi cine lubali ikakumane. ²² Cali mu mwaka wakutendeka uwakuba pa bufumu bwakwa Sairasi imfumu ya ku Pesia, pakufikilisha ishiwi lyakwa Yawe ilyasosele kasesema Yeremia, Yawe aimishe umutima wakwa Sairasi imfumu ya ku Pesia ukuma imbila mu bufumu bwakwe no kuilemba ati, ²³ “Ifi efyo Sairasi imfumu ya ku Pesia yasosa, ‘Yawe, Lesa uwaba mu mulu nampeela ifyalo fya shamfumu fyonse ifya pano isonde kabili nine asontele ukumukuulila iŋanda mu Yerusalemu iyaba mu Yuda. Na bonse abakwa Yawe pali imwe mwe bali pano, kuti mwabwelela ku Yuda mukuya bomba uyu mulimo, na Yawe Lesa wenu abe na imwe.’ ”