¹ Yosaya akumenye imyaka yakufyalwa cine konse konse ilyo atendeke ukuteeka pa bufumu, kabili aikele pa bufumu pa myaka amakumi yatatu na umo mu Yerusalemu. ² Acitile ifyawama pa cinso cakwa Yawe no kwendela mu nshila shonse ishakwa wishi Davidi, ukwabula ukulayalukila ku kulyo nangu ku kuso. ³ Mu mwaka walenga cine konse konse uwa pa bufumu ninshi acilifye umwaice, elyo ayambile ukulafwaya Lesa wakwa wishi Davidi. Kabili mu mwaka walenga ikumi limo na ibili ayamba ukufumya incende shakupepelamo isho bacindika mu Yuda na mu Yerusalemu, aputaula inceshi sha mulungu Ashera, afumyamo utulubi utwabaswa elyo ne fimpashanya ifyaengwa fyonse. ⁴ Apeela icipope cakubongolola ifibumbili fya malambo ifya milungu ba Baali. Aputaula mu tupimfya tupimfya ifibumbili fya malambo ifyakufutumwinapo ububani ifyabelele pa mulu wafiko elyo abongolola ne nceshi sha mulungu Ashera, afumyamo utulubi utwabaswa ne fimpashanya ifyaengwa fyonse. Abuula fyonse afishonaula ayafiposa na pa nshinshi sha baletuula aya malambo. ⁵ Aoca na mafupa ya bashimapepo pa fibumbili fya malambo yabo. Kanshi ifi efyo asangulwile Yuda na Yerusalemu. ⁶ Ifi fine efintu acita na mu misumba ya bena Manase, abena Efulemu, abena Simeoni ukufika na ku Naftali, elyo na mu ncende sha mumbali. ⁷ Abongolola ifibumbili fya malambo no kuputaula inceshi sha mulungu Ashera no kushonaula utulubi tonse elyo aputaula tupimfya tupimfya ifibumbili fya malambo ifyakufutumwinapo ububani mu calo conse ica Israeli, elyo abwelela ku Yerusalemu. ⁸ Mu mwaka walenga ikumi limo na cine konse konse uwa pa bufumu bwakwa Yosaya, emo abombele imilimo ya kusangulula Iŋanda yakwa Yawe elyo ne calo, atuma Shafani mwana Asariya na Maaseya kateeka wa musumba, pamo na Yoahasi uwali kalemba, mukuya lungisha iŋanda yakwa Yawe, Lesa wakwe. ⁹ Baisa kuli Hilikiya shimapepo mukalamba mukumuletela indalama ishatuulilwe mu ŋanda yakwa Lesa, isho abena Levi abalelinda pa mwinshi balonganike ukufuma ku bantu ba mu fyalo fya bena Manase, abena Efulemu na bonse abashelepo ku bena Israeli, na ku bena Yuda na bena Benjamini bonse, na bekashi ba mu Yerusalemu. ¹⁰ Epakubuula ishi ndalama no kushipeela mu minwe ya bantu abo basalile ukwangalila imilimo ya mu ŋanda yakwa Yawe. Aba bantu ebalelipila ababomfi abalelungisha Iŋanda. ¹¹ Babuula impiya shimo bapeela bakabasa wa mbao elyo na bakakuula pakuti bashitemo amabwe ayabaswa elyo ne mbao shakulundinkanya ne shakupalikila amayanda ayo imfumu sha bena Yuda shalengele ukonaulwa. ¹² Aba bantu babombele imilimo iyi ne mitima iyacishinka. Na baletungulula abanabo mukubomba iyi milimo bali ni Yahati na Obadiya abena Levi abafumine mu lupwa lwakwa Merari, kabili Sakaria na Meshulamu abafumine mu lupwa lwakwa Koati. Elyo abena Levi bonse abali abacenjela mukulisha ifilimba, ¹³ ebaleangalila abakusenda ifipe no kutungulula ababomfi bonse mu milimo iyalekana lekana. Elyo na bamo abena Levi ebali bakalemba, bambi nabo bakafwa wa bakalemba elyo bambi abakulinda pa mpongolo. ¹⁴ Ilyo bayambile ukufumya indalama isho batuulile mu ŋanda yakwa Yawe, elyo Hilikiya shimapepo asangile icitabo ca mafunde yakwa Yawe yalya Lesa apeele ukupitila mu mubomfi wakwe Mose. ¹⁵ Hilikiya epakweba Shafani kalemba ati, “Ninsanga icitabo ca mafunde mu ŋanda yakwa Yawe.” Elyo abuula icitabo acipeela kuli Shafani. ¹⁶ Elyo Shafani abuula icitabo atwala ku mfumu no kuya sosa ati, “Bacilolo bobe balebomba ifintu fyonse ukulingana nefyo mwabebele. Nabafumya impiya ishali mu ŋanda yakwa Yawe no kushipeela kuli bakangalila na babomfi.” ¹⁷ Nabafumya impiya ishali mu ŋanda yakwa Yawe no kushipeela kuli bakangalila na babomfi.” Elyo Shafani kalemba aeba imfumu ati, “Shimapepo Hilikiya nampeela icitabo.” ¹⁸ Elyo Shafani kalemba abelengela imfumu ifyalimo. ¹⁹ Ilyo imfumu yaumfwile amashiwi ya mafunde, yabuula ifyakufwala fyaiko yalepaula. ²⁰ Yakonkomesha aya mashiwi kuli Hilikiya, Ahikamu mwana Shafani, Abdon mwana Mika, Shafani kalemba elyo na kuli Asaiya uwalesunga imfumu ayakuti, ²¹ “Kabiyeni mwishina lyandi nelya bantu abashalapo mu Israeli na mu Yuda muye twipushishako pali aya mashiwi yalembwa muli ici citabo basangile. Pantu ubukali bwakwa Lesa ubuli nokutwishila bukalamba pa mulandu wakuti abafyashi besu balifililwe ukubaka ishiwi lyakwa Yawe. Kabili tabalecita fintu ukulingana ne fyalembwa muli ici citabo.” ²² Hilikiya elyo na bantu imfumu yatumine pamo nankwe baya kuli Hulida kasesema mwanakashi, uwali umukashi wakwa Shalumu mwana Tokati, nao uwali umwana wakwa Hasira, uwalesunga ifyakufwala fya mfumu. Uyu mwanakashi aleikala mu Yerusalemu, mu ciputulwa cabubili awe baya mushimikila umulandu. ²³ Elyo Hulida abeba ati, “Ifi efyo Yawe, Lesa wa bena Israeli asosa ifyakuti, ‘Kebeni uyo muntu amutumine kuli ine ukuti, ²⁴ ifi efyo Yawe asosa ifyakutila, “Ndi nokuleta ifinkunka pali ino ncende na pa bantu bekalamo, ukulapisha konse ukwalembwa mu citabo ico baciya belengela imfumu ya bena Yuda. ²⁵ Pa mulandu wakuti nabamfutatila, no kocela imilungu imbi ububani no kunkalifya umutima pa tulubi utwapangwa ne minwe yabo, eico ubukali bwandi buli nokuponena pali ino ncende kabili takwabe icilebulesha.” ²⁶ Kebeni imfumu ya bena Yuda iyacimutuma kukwipusha kuli Yawe ukuti, ifi efyo Yawe Lesa wa bena Israeli asosa pa mashiwi umfwile ayakuti, ²⁷ “Pantu umutima obe naulanguluka elyo no kuicefya kuli Lesa ilyo wacumfwa ifyo acilanda palwa ino ncende na bantu bekalamo, kabili pa mulandu wakuti waciicefya kuli ine icakuti walepula ne fyakufwala fyobe no kwamba ukulila, eico ine ninkumfwa, efyasosa Yawe. ²⁸ Nomba ndi nokukutwala ukwalala ifikolwe fyobe kabili uli nokushiikwa mu cibote. Amenso yobe tayali nokumonako ifinkunka fyonse ndi nokuleta pali ino ncende na pa bantu bonse abekala pano.”’ ” Kanshi nabo epakubwesesha amashiwi yonse ku mfumu. ²⁹ Elyo imfumu yalonganika abakalamba bonse aba mu Yuda na mu Yerusalemu. ³⁰ Imfumu yaingila mu ŋanda yakwa Yawe na bena Yuda abaume, abekashi ba mu Yerusalemu, bashimapepo elyo na bena Levi na bantu bonse ukufuma ku twaice ukufika ku bakulu. Yabelengela abantu pakuti bomfwe amashiwi yonse ayali mu citabo ca cipangano icasangilwe mu ŋanda yakwa Yawe. ³¹ Elyo imfumu yaiminina pa ncende yaiko apali uluceshi no kubukulusha icipangano pa cinso cakwa Yawe icakulaenda mu nshila shakwa Yawe, ukubaka amalango yakwe ne fipope fyakwe na mafunde yakwe no mutima waiko onse elyo no mweo waiko onse, ukubeela amashiwi ya cipangano ayalembwa muli ici citabo. ³² Elyo abuula bonse abali mu Yerusalemu na bena Benjamini ukusuminisha icipangano. Abena Yerusalemu bacitile ici umwabela icipangano cakwa Lesa uwaba Lesa wa fikolwe fyabo. ³³ Yosaya epakufumya utulubi twamuselu mu calo conse ica bena Israeli, elyo alenga na bekalacalo bonse abaliko ukwamba ukutumika Yawe Lesa wabo. Kanshi na bantu tabalekele ukutumika Yawe Lesa wa fikolwe fyabo mu nshiku shonse ishakwa Yosaya.