¹ Elyo Solomoni atendeka ukukuula iŋanda yakwa Yawe mu Yerusalemu pa lupili lwa Moriya, palya Lesa amonekele wishi Dabidi. Cali ni pa lubansa lwakutwilapo ulwakwa Arauna umwina Yebusi, incende iyo Dabidi apekenye. ² Pa bushiku bwalenga shibili mu mweshi walenga ibili mu mwaka walenga bune uwa pa bufumu, epo atendeke ukukuula. ³ Umufula Solomoni apangile uwakukuulapo iŋanda yakwa Lesa wali amakubiti amakumi mutanda mubutali elyo na makubiti amakumi yabili mubwipi, ukubomfya icipimo cakale. ⁴ Umuputule wa pa mwinshi wa ŋanda walepele amakubiti amakumi yabili ukucilinganya mubwipi, elyo amakubiti amakumi yabili ukulola mumulu. Akupa mukati golide wine wine. ⁵ Atantika imbao sha fimuti fya paini mu muputule ukalamba, ashingulako na golide iyawamishiwa bwino. Alengapo no tuncindu ne minyololo iyapikana. ⁶ Ayanshika mu ŋanda utumabwe utwayemba. Kabili abomfya na golide wa ku Pafaimu. ⁷ Ashingula golide ku myalo ya mu mutenge, ku nceshi, ku fibumba elyo na ku fiibi fya mu ŋanda, abasa na bakerubi pa fibumba. ⁸ Akuula Umuputule uwamushilo icine cine. Ubutali bwauko ukucilinganya iŋanda walepele amakubiti amakumi yabili elyo na makubiti amakumi yabili mubwipi. Ashingula mukati monse na golide uwawamishiwa bwino uwa matalanta imyanda mutanda, ⁹ insunga sha golide shafinine ukucila citika wa kilo. Kabili ashingula golide mu ncende sha pamulu. ¹⁰ Mu muputule wamushilo icine cine apangilamo bakerubi babili, ashingulako na golide. Amapindo ya bakerubi yalepele amakubiti amakumi yabili. ¹¹ Ipindo limo lyalepele amakubiti yasano kabili lyashinta mu cibumba ca ŋanda, elyo ipindo libiye nalyo lyalepele amakubiti yasano, lyena lyasuntinkana ne pindo lyakwa kerubi umbi. ¹² Kabili mu musango umo wine ipindo limo ilyakwa kerubi wabubili lyalepele amakubiti yasano elyo lyashinta ku cibumba cibiye ica ŋanda, ne pindo libiye nalyo lyalepele amakubiti yasano nalyo lyasuntinkana ne pindo lyakwa kerubi wantanshi. ¹³ Ubutali bwa mapindo ya bakerubi ninshi nayasuntinkana yalepele amakubiti amakumi yabili . Bapangilwe nabeminina pa makasa yabo baloseshe amenso ku muputule ukalamba. ¹⁴ Apanga icisalu icakucingako ku bushishi bwacifufya, ubwakashikila no bwakashika cee elyo ne nsalu iyabuuta iyapikulwa ubusaka, iyo bapikwilepo bakerubi. ¹⁵ Apanga inceshi shibili kuntanshi ya ŋanda isho shonse ishalepele amakubiti amakumi yatatu na yasano, na cila luceshi lwali no mutwe pamulu uwali amakubiti yasano. ¹⁶ Apanga ne minyololo ya citabataba no kubika pa mulu wa fyaimikwa. Apanga na mateke umwanda umo, akambatika ku minyololo. ¹⁷ Aimika inceshi pantanshi ye Tempele, lumo ku kapinda ka ku kulyo lumo nalo ku kapinda ka ku kuso. Ulwa ku kapinda ka ku kulyo alwinika Yakini elyo ulwa ku kapinda ka ku kuso alwinika Boasi.