¹ Solomoni ayambile ukukuula Itempele ilye shina lyakwa Yawe elyo ne sano lyakwe. ² Apekenye abantu 70,000 abakusenda ifipe, elyo na bantu amakana amakumi cine konse konse 80,000 abakutoba amabwe mu mpili, elyo na 3,600 nga bakangalila wa babomfi. ³ Elyo Solomoni atuma amashiwi kuli Hiramu imfumu ya ku Turi ayakuti, “Ntuminako imilando ya cimuti icalepesha ica keda filya fine wacitile kuli tata Davidi ilyo wamutumine ifimuti fyakukuulila isano aleikalamo. ⁴ Nomba nalayamba ukukuula iŋanda ye shina lyakwa Yawe Lesa wandi elyo no kuipeela kuli ena ngo mwakulaocela ububani ubwanunka bwino pa cinso cakwe, ukulatantikamo imikate lyonse elyo no kupeelelamo amalambo yakoca cila lucelo ne cungulo, pa Masabata na pa kutendeka kwa myeshi elyo na pa nshikunkulu ishasontwa ishakwa Yawe Lesa wesu. Ili lifunde lya pe ku bena Israeli. ⁵ “Iŋanda nalakuula ili nokuba iyicindami, pantu Lesa wesu alicindama ukucila imilungu imbi. ⁶ Lelo nani engalinga ukukuulila Lesa iŋanda? Apofye imyulu nangufye imyulu ya pamulu teti imukumane. Bushe ine nine ani uwakukuulila Lesa iŋanda, kanshi kanofye incende umwakocela amalambo pa cinso cakwe? ⁷ “Eico ntuminako umuntu uwacenjela ukubomba mu fya golide na silifa, umukuba ne fyela, ubushishi ubwakashikila, ubwakashikisha elyo no bwacifufya, kabili uwaishiba ukulenga pa fyela, uwakwisa mukubombela mu Yuda na mu Yerusalemu pamo na babomfi bandi abacenjela abo tata Davidi apekenye. ⁸ Kabili ntuminako imilando ya fimuti ifyalepesha ifya keda, iya paini ne ya aligumi ukufuma ku Lebanoni, pantu nalishiba ukuti abantu bobe abaume balicenjela mukutema imilando uko. Abantu bandi bakulabomba na bantu bobe ⁹ kukupekanya imiti iyingi, pantu iŋanda ndekuula ifwile ukuba iyikalamba kabili iyalulumbi. ¹⁰ Ndi nokupeela ababomfi bobe abakaputula ifimuti amalipilo ya iŋanu ishasokolwa amakilo amakana yane ne myanda ine, bale iyafina amakilo amakana yane ne myanda ine, imyangashi amalita amakana imyanda ine na makumi yane elyo na mafuta ya miolifa amalita amakana imyanda ine na makumi yane.” ¹¹ Hiramu imfumu ya ku Turi yayasuka Solomoni mu nkalata aiti, “Pantu Yawe alitemwa abantu bakwe, eco akubikile pa bufumu.” ¹² Hiramu alundapo amashiwi yakuti, “Napaalwe na matotelo Yawe, Lesa wa bena Israeli uwabumbile umulu ne sonde. Apeela imfumu Davidi umwana uwamano, uwapeelwa ukwishiba elyo no kwiluka, euli nokukuula Itempele lyakwa Yawe elyo no kuikuulila iŋanda yakwe iye sano. ¹³ “Nalatuma Huramu Abi kuli iwe, umuntu uwacenjela nganshi. ¹⁴ Nyina wa uyu muntu afumine ku Dani elyo wishi afumine ku Turi. Alikanshiwe ukubomba mu fya golide na silifa, umukuba ne fyela, ukubasa amabwe no kulepula imbao, ukubomba mu nsalu ishakashikila, ishacifufya ne shakashikisha. Alishiba bwino imilimo yakulenga ifintu fyonse kabili kuti alenga icintu conse engasontelwa. Akulabomba na bacenjela bobe elyo na ba mfumu yandi Davidi wiso. ¹⁵ “Lekeni nomba imfumu yandi itumine ababomfi baiko iŋanu, bale, amafuta ya miolifa elyo no mwangashi yalaile. ¹⁶ Na ifwe tuli nokutema imilando yonse iyo ulefwaya ukufuma ku Lebanoni. Elyo pakuileta ku Yopa tukaikakanya ikese ileelela pa mulu wa menshi ya pali bemba, elyo na iwe ukese isenda ukutwala ku Yerusalemu.” ¹⁷ Solomoni epakupenda abenafyalo bonse abali mu Israeli, ukutula apo wishi Davidi apendele abenafyalo, asanga impendwa bali amakana umwanda umo na makumi yasano na 153,600. ¹⁸ Asalapo abantu 70,000 ukuba abakutunta ifipe, bambi 80,000 ukuba abakutoba amabwe mu mpili elyo bambi 3,600 ababika ukuba bakangalila pali bena pakuti abantu balebomba imilimo.