¹ Kabili apangile ubulambo bwa mukuba ubwali amakubiti amakumi yabili mubutali na makubiti amakumi yabili mubwipi, elyo na makubiti ikumi limo ukuya mu mulu. ² Apanga icishiba icaengululwa ku fyela, icashinguluka, icali amakubiti ikumi limo ukufuma pa mpela ukufika pa mpela elyo amakubiti yasano ukuya mu mulu. Intambo iyalepa amakubiti amakumi yatatu eyalebomba ukupiminako mukucishinguluka pamulu. ³ Pesamba apangilepo ifinama ifyapala bacilume ba ŋombe ukucishinguluka. Fyali ikumi limo pali kubiti umo. Apanga bacilume ba ŋombe ashitantika mu milongo ibili nashikambatila ku cishiba. ⁴ Icishiba caikala pa mulu wa bacilume ba ŋombe ikumi limo na babili. Batatu balolesha ku kapinda ka ku kulyo, batatu ku kapinda ka ku kuso, batatu ku kabanga elyo shitatu ku masamba. Icishiba catekwa pa mulu wa ŋombe, ne numa shashiko shakumanina pakati. ⁵ Umutika waciko waba nge cisansa ca lupi, no mulomo waciko waba ngo mulomo wa lukombo nangu uwe luba. Icishiba calesunga amenshi ayali balita amakana amakumi mutanda na mutanda. ⁶ Apanga imbale shakusambilamo ikumi limo, elyo abika shisano ku kapinda ka ku kulyo ne shibiye shisano ku kapinda ka ku kuso. Muli ishi mbale emwakusamfya ifyakubomfya pakutuula amalambo yakoca, lelo mu cishiba mwakusambafye bashimapepo beka. ⁷ 7Apanga ifyakutekapo ifisaniko ikumi limo ifya golide ukulingana nomo fyapekanishiwe, elyo afibika mwi Tempele. Abika fisano ku kapinda ka ku kuso elyo fimbi fisano ku kapinda ka ku kulyo. ⁸ Kabili apanga amatebulo ikumi ayabika mwi Tempele. Abika yasano ku kapinda ka ku kuso elyo na yasano ku kapinda ka ku kulyo. Kabili apanga inweno umwanda umo isha golide ishakusanshilako. ⁹ Apanga ulubansa lwa bashimapepo. Elyo apanga icibansa icikalamba elyo ne fiibi fya ici cibansa kabili ashingulako no mukuba ku fiibi. ¹⁰ Abika icishiba lwa ku kapinda ka ku kuso ukulemenena lwa ku kabanga. ¹¹ Kabili apanga amalongo elyo na bafosholo elyo ne nweno shakusanshilako. Kanshi Huramu epakupwisha imilimo yonse iyo abombele imfumu Solomoni iya mu ŋanda yakwa Lesa: ¹² Inceshi shibili, imitwe ibili iyapala inweno iya pa mulu wa nceshi, iminyololo ibili iyapikulwa nge citabataba iyakuwaminisha imitwe ibili iyapala inweno iya pa mulu wa nceshi, ¹³ amateke imyanda ine aya ku minyololo ibili, cila capikulwa kwali imitande ibili iya mateke iyakuwaminisha imitwe iyapala inweno pa mulu wa nceshi, ¹⁴ Ifyakutekapo ne misambilo nayo, ¹⁵ icishiba na bacilume ba ŋombe ikumi limo na babili pesamba lyaciko, ¹⁶ Imipika, bafosholo, imitunkulo ne fipe fyonse ifyaba ngefi. Ifipe fyonse ifyo Huramu Abi apangile imfumu Solomoni ifya mu ŋanda yakwa Yawe fyali fya mukuba uwawamishiwa bwino. ¹⁷ Imfumu yaengulwile uyu mukuba mwibumba lya mwiwanga lya mu Yordani pakati ka Sukoti na Saretani. ¹⁸ Ifi fyonse fintu Solomoni apangile fyali ifingi nganshi icakuti no kufina kwa mukuba teti kwishibikwe. ¹⁹ Kabili Solomoni apangile ifipe fyonse ifyakubomfya mu ŋanda yakwa Lesa: ubulambo bwa golide, amatebulo ayakutekapo imikate iya ku cinso cakwa Lesa, ²⁰ ifyakutekapo ifisaniko ifya golide wine wine ne fisaniko fyafiko ifyakwaka pantanshi ya muputule wamushilo ngefyo catantikwe, ²¹ amaluba ya golide, ifisaniko ne fyakumanikilako, fyonse fyali fya golide wine wine, ²² utwakushimisha umulilo, inweno shakusanshilako, imbale elyo ne fyabubani, fyonse fyali fya golide wine wine,elyo ne fiibi ifya mwi Tempele, ifiibi ifya ku muputule wamushilo icine cine elyo ne fiibi fya mu muputule ukalamba, fyonse fyali fya golide.