¹ Pa nshita ine ilya, Abiya mwana Yeroboamu alilwele, ² na Yeroboamu aeba umukashi wakwe ati, “Kabiye, uilufyanye pakuti bekwishiba ukuti niwe muka Yeroboamu. Elyo uye ku Shilo. Ahiya kasesema eko ali, ulya uwanjebele ukuti ndi nokuba imfumu ya aba bantu. ³ Usende mikate ikumi limo, umukate uwanaka bwino no lukunku lwa buci elyo uye kuli ena. Alaya kweba ifili nokucitika ku mwana.” ⁴ Eico muka Yeroboamu acita ifyo mulume amwebele aya ku ŋanda yakwa Ahiya ku Shilo. Nomba Ahiya alilekele ukumona pa mulandu wakukota. ⁵ Lelo Yawe alyebele Ahiya ukuti, “Muka Yeroboamu ali mukwisa kukwipusha palwa mwana wakwe umulwele. Eico nga afika, wise umwasuke ifi nefi. Ilyo alefika aleisa icita kwati muntu umbi.” ⁶ Kanshi ilyofye Ahiya aumfwa inshindo pa mwinshi atila, “Ingila muka Yeroboamu. Cinshi ico uleilufyanishisha. Nintumwa ukuleta amashiwi ayabi kuli iwe. ⁷ Kabiye, kebe Yeroboamu ukuti ifi efyo Yawe Lesa wakwa Israeli alanda, ‘Nakwimishe ukufuma mu bantufye no kwisa kubika pa bufumu bwa bantu bandi abena Israeli. ⁸ Napatwile ubufumu ukufuma kuba mu ŋanda yakwa Davidi, napeela kuli iwe. Nomba naufilwa ukuba ngo mubomfi wandi Davidi, uwabakile amafunde yandi no kuyakonka no mutima wakwe, na lyonse ukulacita ifyalungama mu menso yandi. ⁹ Naucita icabipa ukucila pali bonse abakutangilile. Nauyipangila imilungu yobe we mwine, ifimpashanya ifyaengululwa, naunkalifya umutima no kumposa ku numa yobe. ¹⁰ “‘Pa mulandu wa ici, nalaponya icinkunka pa ŋanda yakwa Yeroboamu. Ndi no kuputula ukufuma kuli Yeroboamu umwaume onse uwakulekelesha mu Israeli, umusha nangu uwakaele. Ndi nokoca iŋanda yakwa Yeroboamu, ngefyo boca amafi, mpaka yalokota. ¹¹ Imbwa shikalya bonse aba mu ŋanda yakwa Yeroboamu abakafwila mu musumba, elyo ifyuni fya mu lwelele nafyo fikalya abakafwila mu mpanga.’ Yawe efyo alanda. ¹² “Nomba iwe bwelelamo kumobe. Ilyo walaya ingila mu musumba umwana alaya fwa. ¹³ Abena Israeli bonse bali nokumuloosha kabili no kumushiika. Ena e umofye paba mu ŋanda yakwa Yeroboamu uo Yawe, Lesa wakwa Israeli asangilemo ubusuma. ¹⁴ Yawe umwine ali nokufwailapo imfumu imbi pa bena Israeli iyo iyili no kwisa onaula iŋanda yakwa Yeroboamu. Buno bwine e bushiku, nga cinshi? Ee ni nombalinefye. ¹⁵ Kabili Yawe ali nokupunganya abena Israeli ukuba kwati litete lilepungana mu mulonga wa menshi. Ali nokushimpula Israeli ukufuma muli cilya calo icisuma ico apeele ifikolwe fyabo, no kubasalanganishisha kwishilya lya mumana, pantu nabakalifya Yawe umutima pakupanga inceshi sha mulungu Ashera. ¹⁶ Kabili ali nokubasha pa mulandu wa pa bubifi ubo Yeroboamu acitile no kulenga abena Israeli nabo ukubifya.” ¹⁷ Elyo muka Yeroboamu aimine afuma no kuya ku Tirisa. Lilya line afikafye pa lubansa lwa ŋanda, no mwana afwa. ¹⁸ Bamushiika elyo na bena Israeli bonse bamuloosha nge shiwi Yawe asosele ukupitila mu mubomfi wakwe Ahiya. ¹⁹ Imilimo imbi iyo Yeroboamu acitile mu nshiku shakwe ishabufumu, ubulwi alwile, ifyo ateekele, fyonse fyalilembwa mwibuku lya milandu ya shamfumu sha bena Israeli. ²⁰ Ali imfumu pa myaka amakumi yabili na ibili elyo afwa ayalala ukwalala ifikolwe fyakwe. No mwana wakwe Nadabu ewamupyene ukuba imfumu. ²¹ Reoboamu mwana Solomoni ali imfumu mu Yuda. Ali ne myaka amakumi yane na umo ilyo aishile ba imfumu. Kabili aikele pa bufumu imyaka ikumi limo na cine lubali mu Yerusalemu, umusumba uo Yawe asalile ukufuma mu nko shonse isha bena Israeli umwakwikala ishina lyakwe. Ishina lyakwa nyina ni Nama, umwina Amoni. ²² Abena Yuda bacitile icabipa mu menso yakwa Yawe. Ukucila na pa fyabubifi ifikolwe fyabo fyacitile. ²³ Baikuulila ne ncende shakupepelamo imilungu yabo, baimika amabwe ne nceshi sha mulungu Ashera pa mulu wa mpili shonse ishitali na pesamba lya cimuti conse icafumba. ²⁴ Mwaba na bacilende ba ku mfuba abaume mu calo. Abantu bonse baiposa mukucita ifyamakankamike ifyalecita abantu abo Yawe atamfishe ku cinso ca bena Israeli. ²⁵ Mu mwaka walenga isano iya bufumu bwakwa Reoboamu, Shishaki imfumu ya ku Egupto yasansa umusumba wa Yerusalemu. ²⁶ Asenda icuma conse icali mu ŋanda yakwa Yawe ne cuma ca mu ŋanda ye sano. Asendafye fyonse, asendela kumo ne nkwela sha golide isho Solomoni apangile. ²⁷ Kanshi imfumu Reoboamu epakupanga shimbi inkwela isha mukuba ishakupyanikishapo, yashipeela na ku bakalamba ba bashilika abalelonda pa mpongolo ya kwisano. ²⁸ Ilyo lyonse imfumu yaya ku ŋanda yakwa Yawe, abashilika baya nabafwala, elyo pakubwela bashibwesesha mu muputule wakushisungilamo. ²⁹ Palwa fintu fimbi ifyakwa Reoboamu, ifyo acitile pa bufumu, bushe tafyalembwa mwibuku lya milandu ya shamfumu sha bena Yuda? ³⁰ Paali ukulwishanya ukwatwalilila pakati kakwa Reoboamu na Yeroboamu. ³¹ Kabili Reoboamu ilyo afwa aile lala ukwalala ifikolwe fyakwe, aya shiikwa pamo nabo mu musumba wakwa Davidi. Nyina ishina lyakwe ni Nama umwina Amoni. Elyo Abiya umwana wakwe amupyana pa bufumu.