¹ Kabili moneni umuntu wakwa Lesa uwa muli Yuda aishile mu cebo cakwa Yawe, ku Betele ilyo Yeloboamu aliminine pa cipailo mu kufuntumuna ububabi. ² Na peshiwi lyakwa Yawe asesemene pali ubu bulambo ati, ''we bulambo we bulambo, umfwa ifyo Yawe alanda, kuli nokufyala umwana umwaume mu nganda yakwa Dabidi, uo bakalaita Yosaya. Pali iwe epo ali nokwipaila bashimapepo aba ncende shakupepelamo imilungu abesa mukutuula imituulo pamo, na mafupa ya bantu yali nokupiila pali iwe.'' ³ Pa bushiku bwine ubu umuntu wakwa Lesa apeele icishibilo, ''Ici ecishibilo Yawe alapeela ubulambo bwalabongoloma ne mito ilipo yalaitika.'' ⁴ Ilyo imfumu Yeloboamu aumfwa ifyo umuntu wakwa Lesaseseme pa bulambo ubu ku Betele afumya ukuboko ku bulambo no kutila, ''Mwikateni. ''Nomba ukuboko asonteleko uyu muntu kwatunkana icakuti afilwa no kukubwesha. ⁵ ( Elyo ubulambo nabo bwabongoloka ne mito yaitika ukulingana ne cishibilo capeele umuntu wakwa Lesa mukukonka ishiwi lyakwa Yawe. ⁶ Elyo imfumu yatila ku muntu wakwa Lesa, ''Mpapatilako kuli Yawe Lesa obe no kumpakuti ukuboko kwandi kufunguluke.'' kanshi umuntu wakwa Lesa epakupapata kuli Yawe no kuboko kwa mfumu kwafunguluka no kubafye ifyo kwaba na kale. ⁷ Imfumu yaeba umuntu wakwa Lesa aiti.'' Tuleya ku nganda kumwandi uyelyako ifya kulya, na ine njekupelako ne cabupe.'' ⁸ Lelo umuntu wakwa Lesa ayasuka imfumu ati, ''Nangufye cingaba ukuti ulempela icalo cobe pakati, teti nje iwe nangu ukulya umukate no kunwa amenshi kuno, ⁹ Pantu Yawe alinkonkomeshe kwishiwi lyakwe ati, ''Taufwile ukulya umukate nangu ukunwa amenshi nangufye ukubwelela mu nshila wa pitilamo.'' ¹⁰ Kanshi epakupita inshila imbi, akaana ukubwelela munshila apitile pakwisa ku Betele. ¹¹ Nomba kwali kasesema uwakale uwaleikala ku Betele uyo abana bakwe baishile londelwela fyonse ifyo umuntu wakwa Lesa acitile pali bulya bushiku. Elyo baeba shibo ifyo uyu muntu aebele imfumu. ¹² Shibo abepusha ati, ''Ninshila nshi elemo? Kabili abana bakwe epakumulangilila inshila umo umuntu wakwa Lesa uwafumine ku Yuda ailemo. ¹³ Ena aebele abana bakwe ati, ''Mpekanishisheniko kabalwe, ''kabili ilyo bapwisha ukupekanya kabalwe, aisa aninapo. ¹⁴ Elyo ukonka ukwaile umuntu wakwa Lesa mpaka aya musanga naikala mwisamba lya cimuti ca Oki. ¹⁵ Elyo amwipusha ati, ''Bushe niwe muntu wakwa Lesa uwa fumine ku Yuda?'' Nao ayasuka ati, ''Nine.'' Elyo kasesema amweba ati, ''Tuleya ku nganda uye lyako icakulya.'' ¹⁶ Umuntu wakwa Lesa ayasuka ati, ''ati mbwelele kunuma ukukonka iwe, nangu ukulya umukate nangu ukunwa amenshi muli ino incende. ¹⁷ Yawe alinkonkomesha kwishiwi lyakwe ukukana lyako umukate nangu ukunwa amenshi, nangu ukubwelela mu shila naishilemo,'' ¹⁸ Kasesema wakale ayasuka ati, ''Naine winw ndi kasesema nga iwe. Ni malaika eunjebele kwishiwi lyakwa Yawe ati kamubweseshe ku nganda yobe pakuti ese alye umukate no kunwa amenshi. Ninshi kanshi alemupepafye. ¹⁹ Kanshi umuntu wakwa Lesa epakubwelela nankwe ayalya no kunwa mu nganda yakwe. ²⁰ Lilya bacili nabekala petebulo ishiwi lyakwa Yawe lyaisa kuli kasesema wakale uwamulengele ukubulela. ²¹ Abilikisha ku muntu wakwa Lesa uwafumine ku Yuda ati, ''Ifi ifyo Yawe asosa ati, ''Pamulandu wakuti wasuula ishiwi lyakwa Yawe kabili wafilwa ukubaka ishiwi ilyo Yawe Lesa obe akukonkomeshe, ²² Lelo wabwelela kunuma nokwisa lya umukate no kunwa amenshi muli ino ncende umo akwebele ukukana lyamo umukate nangu ukunwamo amenshi, kanshi nomba umubili obe tawakashikwe ukwashikwa ifikolwe fyobe. ²³ Ilyo umuntu wakwa Lesa apwishishe ukulya no kunwa, kasesema uwamubweseshe amupekanishisha kabalwe wakwe. ²⁴ Lilya acili mukuya inkalamo yamukumanya pa musebo no kumwipaya yaposa no mubili wakwe mu musebo. Elyo kabalwe aiminina ku lubali lumbi ulwa citumbi ne nkalamo nayo ulubali lumbi. ²⁵ Bantu abalepita basanga icitumbi nacilala mu musebo ne nkalamo naiminina mumbali, elyo baya eba ,aba mumusumba umwaleikala kasesema wakale. ²⁶ Ilyo kasesema uwamu bweseshe pa lwendo lwakwe aumfwile, alandile ati, Niulya umuntu wakwa Lesa uwafililwe ukubela ishiwi lyakwa Yawe. ²⁷ Yawe eupele ku nkalamo iyacimwikata no kumwipaya ngefyo icebo cakwa Yawe casokele.'' Kasesema aeba abana bakwe ati, ''mpekanishisheni kabalwe, 'nabo efyo bacita. ²⁸ Elyo aima ayasanga icitumbi nacitambalala pa musebo ne nkalamo naiminina pa mbali. inkalamo ytayalile icitumbi nangu ukwikata kabalwe. ²⁹ Elyo kasesema aimya icitumbi ca muntu wakwa Lesa abika na pali kabalwe acileta na ku musumba wakwe kukwisa mulosha no kumushika. ³⁰ Aya lalika icitumbi mu nshishi yakwe elyo bamulosha no kulanda ati, ''lye we munyinane.'' ³¹ Panuma ya kumushika elyo aeba abana bakwe ati, ''ine nga nafwa, mukanshike mu cilindi ici cine twashikamo umuntu wakwa Lesa. mukabike amafupa yandi pa mbali ya mufupa yakwe. ³² Pantu imbila abilile kwishiwi lyakwa Yawe pa mulandu wa bulambo mu Betele na pa mayanda yonse ya ku ncende shakupepelapo imilungu isha mishi ya mu Samaliya ili nokufikilishiwa. ³³ Lelo na panuma ya ifi fyonse Yeloboamu tafumine ku nshila shakwe ishabubifi lelo nakabili abwekeshapo ukusonta bashimapepo ku ncende shakupepelapo imilungu ukufuma ku bantu abalekana lekana. Onsefye uwafwaya ukuba shimapepo amusuminisha , amupela ne ncende yakupepelapo. ³⁴ Neci cinti caishileba lubembu kuba nganda yakwa Yeloboamu ku kuba posa kabili ku kubafita pano isonde.