¹ Ndekomolaani mwana molome mununu awe omoteche motema bole isahoo obateche motema biyanaa biikelome itebale ne babotwanao. ² Obateche motema banabakachibanunu balee inawoo,ne banabakachii bosee. ³ Mobaheshimu bajanee,badia babe bajane bekwedii kwedii. ⁴ Bobo ite mojane ole ne baana nane baichokolo obaleke bango baifunzee komonesa heshima kwe bando be mondabo yaboo mwenee,mobalekee babalekee bazazi babo machii, bobolepee bazazi babo machii kwe boboena yashikondeza kombala ye Firinyambi. ⁵ Nane mojane kwedii kwedii ne odia obe kosala ikye yaake nawe kobeka tegemeodiakee kwe Firinyambi.Lusuulosee washii kuchikana kolee salaa ne koengela butu ne chobaa. ⁶ Nane bodia,mwana mokachi odia washikochikanela kwe motema washii kokwaa,etabo bunii odia mushima. ⁷ Ne oyaubirii ena mianda ite bobobakabe ne lawama. ⁸ Nane ite mondo ndabe kobatonza mobotwanakee,ndekozania bodia babeleako mondabo yakee,washikotona imani ne nemobehe koeta mondo otachi kuitaboka. ⁹ Bobo mwana mokachii ndekoandekesha kole orodha itashikoba omore wake obe miaka makumimosambo nawe washikoba mokachi wemolome omosa. ¹⁰ Ne bwachii obe kochebebekana kwe matendoo machii,ite ne bodia obekobakatola baana nane obee mokobakaribeshaa badia baenyi,nane washikoetomba maoloo ye babekoetabokaa,nane obe kobasaidia badia babe ne makomo,nane wabe kojeala kwe molemo hosee mwachii. ¹¹ Nane kwe badia bajane biyana,bashikokona kobaandekesha kolee orodha ye bajane kwe kobababe kwingela kole tamaa yelokoba komoetela kole kristo,bashii kokoenda koselwa. ¹² Kwe njela ena otaingele kolee hatia kwe bodia hubuka kujiola kwaboo kwe awadii. ¹³ Na bokwingelaa kole mazoezi ye uvivu.Aboo bashikunyunga ndabo kwendabo kushii tubodia ne bavivu nane bobo babe ne lotendano ne bale kwingelea mwianda ye bakinee.Aboo bashikoocha mianda etashii kooyaocha. ¹⁴ Kwe bodia meno nashii kokonda bana bakachi biyana baselebwe,babotee banaa,baimanelendabo yabo,bodia bashimwabele shetani neibowa ye kotolaomo kwe kotecha zambi. ¹⁵ Kwe sababu bakine bashikushila kufululuka ne komolonda shetani. ¹⁶ Ite mwana mokachi hosee ole ne bajane,bobo ne obasaidie awe mwene,kanisa lelemelanga,bobo leobee kobasaidia badia babe bajane kwedi kwedi. ¹⁷ Bobo banunu badia babekotawala bwachii babalekebwa kwe kobabashikustarii heshima maraelefu,baasa badia babekotabeka ne kofondesha mwanda we Firinyambi. ¹⁸ Kwe bobo andiko yashikoocha"ndekumuchiba kanwa ngombe omokodia nafaka"ne" ole mokoketa molema atapashwee komwabela mushara wake." ¹⁹ Nde kotaboka mashitaka ajidii ye mununu etashiikoba kobe mashaidii babele nane basato. ²⁰ Badia babe koloa koketa zambi mobakemelee kombala ye basee,bodia ne bakine batenee, ²¹ Nashikokolaa kombala ye Firinyambi,ne kombala ye kristo Yesu,ne kombala ye bamalaika bateule,oyakete edia kotashi kohukumu lobelonde koketa mwanda hosee kwe obaguzi. ²² Nde komobeka mondo kosee maboko lobelo nane ndekoetaboka zambi chebando bakine ujibeke motema waho obe bwachi. ²³ Tanguu nani ndekosola machee ikye yaake,na bodia,osole maluu kidogo kwe ajidii ye ikundu ne malwachii mao mekela saa. ²⁴ Zambi che bando bakine yashikochebeka na kwe uwazi yashikotangudia koyaka komakamano.Bakine zambi chabo yashikobalonda. ²⁵ Bwakale bodia,matendo yebe machii emokochebekana etaobeleke koyaeseka.