¹ Lolaga, narhuma entumwa yani. ayishi yigiriza enjira embere zani. Na caligumiza ayishi daha omu nyumpa ya Nahamwirhu mulimwalonza. Na entumwa y'endagano mulimwalonza, lolaga, ayishire, kwo Nnamubaho w'emirhwe adesire. ² Ndi wayishi rhabaza olusiku ayisha? Ndi wayishi yimanga erhi akaboneka? bulya kwayishibà nka muliro gwa mutuzi, nka nsabuni ya kufula. ³ Ayishidahala nk'oliwacesa enfaranga, anayishi cesa bene Lawi, ayishi bashuka nk'oliwashuka amasholo n'enfaranga, na bayishi rhulira Nnamubaho entulo oku bushinganya. ⁴ Lero enterekero ya Yuda n'eya Yerusalemu yayishi simisa Nnamubaho, nkoku byali burhanzi. ⁵ Nayishimuyegera okutwa olubanja, na nayishi harhula oku hamiriza enyanya z'abalozi, abashungu, balya balapa obunywesi, balya barhalyula abakozi, balya balibuza abakana n'enfuzi, ababonere omunyamahanga, na abarhanyoboha, kwo Nnamubaho w'emirhwe adesire. ⁶ Bulya ndi Nnamubaho, ntana hindamuka. Ninyu, bene Yakobo murha sherezibagwa. ⁷ Kurhenga amango ga ga sho, mwayanzire amarhegeko gani, murhagakengaga. Mugaluk'emwani nani namugalukira, kwo Nnamubaho w'emirhwe adesire. Na mwanaderha: Okubici rhugwasirwe rhugaluke? ⁸ K'omuntu anarheba Nnamahanga? Bulya munakanteba, mugaliderha: okubici rhwakurhebire? oku cihimbi c'akalikumi n'enterekero. ⁹ Muheherirwe, na mulimwanteba, ishanja lyoshi! ¹⁰ Mulerhe omunyumpa y'omuhako gwa ngasi cihimbi ca kalikumi, lyo ebiryo biba omunyumpa yani; muntangule, kwo Nnamubaho w'emirhwe adesire. Na mwabona erhi ntamuyigulire amalunga, erhi ntamuyunjuze migisho oku bwinji. ¹¹ Kulimwe nahinva oka yona, arhanayishi shereza emburho z'omwidaho, na ecinywebwa cirhabule omunciga zinyu, kwo Nnamubaho w'emirhwe adesire. ¹² Amashanja goshi gayishi muderha banyiragi, bulya mwayishiba cihugo ca mulimbo, kwo Nnamubaho w'emirhwe adesire. ¹³ Emyanzi yinyu eri midarhi enyanya zani, kwo Nnamubaho w'emirhwe adesire: bici rhwakuderhire? ¹⁴ Mwadesire: busha bakolera Nnamahanga; bici rhwayungusire okukenga amarhegeko gage, n'okugenda omu bululu erhi Nnamubaho w'emirhwe orhuma. ¹⁵ Buno rhubwine nk'abagoma bo banyiragi: neci, abagoma bagendekire. ¹⁶ Lero abakenga Nnamubaho babwirana bone; Nnamubaho ayunvirhiza, ayunva, n'ecitabu c'enkengero cayandikwa embere zage kulibalya bakenga Nnamubaho n'oku kuza izino lyage. ¹⁷ Bayishiba bani, kwo Nnamubaho w'emirhwe adesire, babà bani, olusiku nteganyize; nayishi babera obwonjo, konku omuntu anababalira Omwana wage omurhumikira. ¹⁸ Na ho mwayishibonera olubero lw'omushinganya n'endyalya. oku okolera Nnamahanga n'orhamukolera.