¹ Lero, mwe bagula, er'irhegeko kulimwe! ² Nkaba murhayunvirhi, nakaba murharhimanyizi okuja izino lyan'irenge, narhuma mulimwe obuhanya, na naheherera emigisho yinyu; neci, nayiheherera, bulya murhabirhimanyizi. ³ Lolaga, nashereza emburho zinyu, namushiga amazi ebusu. Amazi ebi mulimwarhula, bagaliyishi muheka haguma nabyo. ⁴ Aho mwayishimanya oku namurhegesirentyo, lyo endagano yani na Lawi egendekera, kwo Nnamubaho w'emirhwe adesire. ⁵ Endagano yani rhwenaye yali ndagano ya buzine na ya murhula, yonalimuhire oku akanyoboha; analingwerhe kw'ecobà, akagijuguma embere ly'izino lyani. ⁶ Irhegeko ly'okuli lyali omukanwa kage, n'obugoma burhamuli okukanwa; akagigerha haguma nani oku murhula n'oku bushinganya, ahugula na bantu banji omu mabi. ⁷ Bulya akanwa k'omugula kwagwasirwe kahulike, n'omukanwa kage mwo badosa ihano, bulya erintumwa ya Nnamubaho. ⁸ Cikwone mwe, mwaciyegwire n'enjira, mwahindula irhegeko nka cirhumire ca kuhirima kwa banji, mwavunyire endagano ya Lawi, kwo Nnamubaho w'emirhwe adesire. ⁹ Nani, nayishi mujira baganyagusibwa na bagalaganda emw'olubaga, bulya murha langanga enjira zani, na murhacikenga muntu nka muli mwa gerereza irhegeko. ¹⁰ Karhweshi rhurhagwerhi larha muguma? Karhali Nnamahanga muguma warhulemaga? Bulyagurhigi rhurhali bikubagirwa rhwene oku rhwene? omukuhemukira endagano ya larha? ¹¹ Yuda aibonesize mugoma, n'obugoma bwajirikana omw'israeli n'e Yerusalemu, bulya Yuda ahemukire ebyali bizir'ishembo bya Nnamubaho, ebi Nnamubaho azigira, erhi arhola omunyere wa mungu w'ihanga. ¹² Nnamubaho ayishiberula omuntu ojirantyo, olimasu, n'oliwahuza. Ayishi muberula omu bigala bya Yakobo. Na ayishiberula orhulira Nnamubaho w'emirhwe. ¹³ Cirigyulole ebindi mukajira: munakaheba emirenge oku luhero lwa Nnamubaho, amalira n'emidudumo, birhume arhaci lalire enterekero na ntabyo ankayakirira omu maboko ginyu. ¹⁴ Mugalilerha: Bulyagurhi?...bulya Nnamubaho ali muhamirizi egarhi kawe na mukawe w'obusole, olya oliwahemukira, ciru mukaba muli mwembi na mukawe wa ndagano. ¹⁵ Ntaye wajijirentyo, erhi acigwerhe engerezo nyinja. Muguma abijijire, na bulyagurhi? bulya akagilonza iburha Nnamubaho amulaganyagya. Mucilange omumirhima yinyu, nantaye wahemukiraga omukazi w'obusole bwage. ¹⁶ Bulya ngayire okulekana, kwo Nnamubaho, Nnamahanga w'israeli, na ye ocibwika buhane, kwo Nnamubaho w'emirhwe adesire. Mucilange omumirhima yinyu, murhanabe bahemusi. ¹⁷ Mulimwarhamya Nnamubaho n'emyanzi yinyu, munagaliderha: rhwamurhamya n'ebici? Erhi muderha: ngasi oliwajia amabi alimwinja embere za Nnamubaho, na asima abajirantyo! erhi: ngahi Nnamahanga w'okuli ali?